Ye biôm bi mo bii fo’o kaban zôsôô été môs éziñ?
E mesi mesi, bôt ba ke ba bo biduñ a zô’é minjoñe minjoñ amu ba yi na mam me tyendé. Mam me dañeya beta zu ndamane a beta ôkon (Covid-19), amu a te kô’ôlane confinement, njembane biôm; nselane ane zañe minkukum a minzôzoé a nga kôme fe dañe beta yené amu sa ke môt ase nye a bili moné a sili na a saéban.
Ye avale minju’ ete dé fo’o man émo? Ôwé! Bible a kate nkômbane Zambe a lat a minju’u bia tôbane mie.
Bengaka’a Zambe a bo bia mfa’a ya minju’u mia yite bôte den
Minjuk: Bone be bôt be vo’o bo na mezene ya bi moné me bo tyi’ibi asu môt ase, a jalé miñyiane mi bôt bese.
Ngaka’a: Zambe é tyendé bijôé ya émo a énjé. Jé tebe yôp a jôe si se.—Daniel 2:44; Matthieu 6:10.
Mvo’é bii bi: Mbôl Éjôé Zambe nje jé wulu mame mese ya si nyu, jé bo de avale da yiane. Azoé a minju’u mise mi tii a njembane moné mia ye man. (Besam 9:7-9, 18) Bôt bese bé bi ma’ane ya bisaé biap, menda me bôte mé bi mbamba ényiñ. Bible a bo ngaka’a na: “Ba ye lôñe menda, a tabe me; ba ye bé mefupe mindik, a di bibuma ya été. Ba ye ke lôñ, a mfe a viane tabe été; ba ye ke bé, a mfe a viane di.”—Ésaïe 65:21, 22.
Minjuk: Mona môt a vo’o kamane na bôt be jembane mam me ne be mfi ényiñ a na be tôbane minjuk.
Ngaka’a: A zene ya Éjôé jé, Zambe é mane vaa mam mese ma bo na bi ko woñ a tyelé minleme yôp.
Mvo’é bii bi: Éjôé Zambe si, teke jam éziñ jé bo na bôt be jembane mame ma yiane be asu ényiñe jap. Biôm aval ane bita, njembane bidi, a bibubua bi akon bia ye ke beta bo. (Besam 46:9; 72:16; Ésaïe 33:24) Zambe a jô na: “Nalé bôte bam ba ye tabe évôvoé éto, a bitaba’a bi ne mvo’é, a mevôme ya awo’on me ne ne mieññ.”—Ésaïe 32:18.
Minjuk: Bôte ba wo’otô ba bevok a étibila’a fo’o ve asu mfi wop.
Ngaka’a: Bôte bé nyiñ Éjôé Zambe si bé yé’é nya nye’ane a telé miñyiane mi bôte bevo’ ôsu.—Matthieu 22:37-39
Mvo’é bii bi: Éjôé Zambe si, môt ase é jeñe na a vu nye’ane Zambe, ñwô ôte “ô ne te jeñe mam mé.” (1 Becorinthien 13:4, 5) Bible a jô fe na: “Ba ye bo te ndaman nge jian beta nkôle wom a ne étyi ase; amu si ja ye jaé ne lut a ñyemane Yéhôva a aval ane mendim ma buti mañ.”—Ésaïe 11:9.
Bible a liti na bi ntoo asu’ulane ya émo ji, a na ana’ana Zambe é tôé nsôñane wé ya vaa minju’u mise mi tii a njembane moné. b (Besam 12:5) Ve nté bia yiange na mam mete me boba’an, miñye’elane ya Bible mi ne volô wo dene na ô dañe minjuk wo tôbane mie a lat a njembane moné. Tame ke yene minlô mejô mi: « Comment vivre avec moins » a « L’argent et vous ».
a Yéhôva a ne éyôlé Zambe ya Bible.—Besam 83:18.
b Nge wo kômbô yeme beamu ya tabe ndi a Bible, lañe’e nlô ajô “Bible a ne anjeñe ya benya mejôô.”
You May Also Like
NKUME MMOMBÔ A BETE
Jé Éjôé Zambe ja ye bo melu ma zu?
Yésus a mbe a yeme’e na Éjôé Zambe étam nje é ne vaa minju’u bia tôbane mie si va. Mam mavé Éjôé éte é boya mfa’a ya yemete ndi nleme jangan asu melu ma zu?
