Bengaa be Yéhôva ba tôñ abendé ya Kalate Zambe da jô be na, be bo teke yalan éyoñ ése ba lume be mbia bifia. Éve’an é ne na, nkana éziñe ya Kalate Zambe wo jô na: “Te yalan ôkukut aval ane akut dé e né, ô za funane nye.” (Minkana 9:​7, 8; 26:4) Bia sañetane ki a bôte ba jeñe bia mejô, bia ve ngule jangan ése na bi ve Zambe nleme mvaé.​—Besam 119:69.

Kalate Zambe a jô fe bia na, jam ése é bili éyoñ, “éyoñe ya tabe évô, a éyoñe ya kobô.” (Ecclésiaste 3:7) Éyoñe bia yene môt a kômbô yeme benya mejôô, bia yalane minsili mié, ve bi ne teke jañele éyoñe jangan, éyoñe bia yene na, môt éziñ a kômbô ndeñele bia. Bia tôñe miñye’elan a éve’ela Yésus a nga li’i Bekristene b’ôsu.

• Yésus a nji yalan éyoñ bôte be nga bôte nye mejô asu Pilate. (Matthieu 27:11-​14; 1 Pierre 2:​21-​23) Éyoñe fe be nga ta nye ndok a nyuu bilam, a nji yalan. A nga jô’é mimboone mié mi liti avale môt a né, amu a nga tôñ ñye’elane wu: “Fek j’akaléban amu mimboane mié.” (Matthieu 11:19) Éyoñe nalé a nga yian, a nga yalane bôte be nga ta nye a ayok ese.​—Matthieu 15:​1-3; Marc 3:​22-​30.

  Yésus a nga ye’ele beyé’é bé na, be bo teke bili atek éyoñ ba bôte be mejô. A nga jô be na: “Mvom a mia éyoñ b’aye komekane mia, be kpwe’ele’e mia, a be kobô’ô mbia jam ase mfa’a wônan ane bela minsos, amu ma. Va’an, mi fôn, amu ma’ane menan me ne anen e yôb, amu nalé be nga kpwe’ele bekulu mejô be mbe mia ôsu.” (Matthieu 5:​11, 12) Yésus a nga jô fe na, éyoñe ba bôte bia mejô, nalé a ve bia fane ya kañete, éyoñ éte nje a ye tôé ngaka’a jé nyi: “Mamien m’aye ve mia avale nkobô a ñyeman, a ne ba besese’e be ne mia ngame yat b’aye bo te ngul ya tebe, nge dôan.”​—Luc 21:12-​15.

• Nlômane Paul a nga lebe Bekristene na be bo teke sañetan a bôte ba wosane be, a nga loon avale nsañetan ete na “bisô mekut.”​—Tite 3:9, Nkôñelane Matthias Meye; Beromain 16:17, 18.

• Nlômane Pierre a nga jô Bekristene na be kamane bebien nge nalé a ne boban. (1 Pierre 3:​15) Ve a nga meme na, mimboone mi ne ngul a lôte nkobô. A nga tili na: “Éyoñ mi abo zôsôô mi aye kpwéé ndimane mekute me bôt bivô.”​—1 Pierre 2:​12-​15.