Bia tôñe miñye’elane ya Kalate Zambe a lat a éjame mbim, miñye’elane miziñe ya été mi:

• E nji bo abé ya yôn éyoñ ô bili awu. Beyé’é be Yésus be nga yôn éyoñe môt ba nye’e a nga wu. (Jean 11:33-​35, 38; Mam minlôman 8:2; 9:​39) Jôm éte nje bi ne teke bo abôk éyoñe ya éjam mbim. (Écclésiaste 3:​1, 4; 7:​1-4) A ne éyoñe ya ve môt a bili awu ngule nyul.​—Beromain 12:15.

• Bewu be nji yeme jôm. Bia sa’ale metum a biyeme bise bi nji lu’an a miñye’elane ya Kalate Zambe, avale metum da bo na bôte simesane na, be wu be nji tu’a wu, a na be ne volô nge ndeñele bevevee. (Écclésiaste 9:​5, 6, 10) Avale metum ete da bo na, bôte be jaé biôme biziñe mo map, nge ke angeteñ asu môt a te wu, ba bo mebôk asu môt a te wu, ba bo mesimesa’ane me awu, ba ve bewu metuna’a, ba laan a bewu nge ke ye’elane be, ba bo fe akus. Bia sa’ale metume mese a mimboone, mia biasé atiñe ya Kalate Zambe di: “Kuian atan, . . . te nambane jôm é ne mvin.”​—2 Becorinthien 6:​17.

• Bewu ba ye beta nyiñ. Kalate Zambe a ye’ele bia na bewu ba ye wômô mesoñ, a na awu da ye man. (Mam minlôman 24:15; Nlitan 21:4) Aval ane Bekristene b’ôsu, ndi nlem éte ja volô bia na, bi bo teke yôn a lôte nné, a bibi biabebiene si éyoñe bi bili awu.​—1 Bethéssalonicien 4:​13.

• Kalate Zambe a bendé bia na bi sa’ale melitan. (Minkana 11:2) Bi nji buni na éjame mbim ja ve bia fane ya liti biôme bi mo biangan, nge ke nkôñ ényiñe wongan. (1 Jean 2:​16) Éyoñe bi bili awu, bi ne teke bo miñyené, bi ne teke bo beta bibek, mimvôman, nge ke kuse biôme bi ne dia abui.

• Bia tindi ke bôte na be yene mam ane bia mfa’a ôte. Bia tôñe ñye’elane ya Bible wu: “Môt ase ya be bia a ye bo nkat e be Zambe mfa’a wé émien.” (Beromain 14:12) Ve nge bia bi fane ya bo de, bia jeñe na bi liti bôt amu jé bia bo anô si anô ka, “a nje’ebane nlem a woñ.”​—1 Pierre 3:​15.

Vôme bia bo de: Nge nda bôt ja tyi’i na ja bo mon ékôan ôsusua na ba jame môt a te wu, ja ye bobane vôm nda bôte ja te top, a ne bo Aba Éjôé, nda, nge ke vôm mfe nda bôte ja te top.

Mame ma ye boban: Mojañ éziñ a ye bo nkañete wo ve bôte be bili awu ngule nyul, a ye belane Kalate Zambe na a timine jé é ne awu a ndi nleme ya ñwômane miñwuan. (Jean 11:25; Beromain 5:​12; 2 Pierre 3:​13) Nkañete ôte ô ne bo na bôte ba vô’ôlô be simesane mbamba mefulu môt a te wu a mbe a bili, ô ne ngoné avale bôte be ne vu nye.​—2 Samuel 1:​17-​27.

Ba ye yia jia ya nsisim. (Becolossien 3:​16) Ékôane ja ye man a meye’elan.​—Bephilippien 4:​6, 7.

Moné: Bi ne teke sili ébu’a ya ñyebe wongan na é ya’an ésaé éziñ bia bo nye, to’o môt a bo nkañete ya éjame mbim, bi ne teke sili bôte ba te zu tabe bisulane biangane moné.​—Matthieu 10:8.

Bôte be ne zu tabe ékôan éte: Bôte be nji bo Bengaa be Yéhôva be ne nyiine Aba Éjôé éyoñe ba bo nkañete ya éjame mbim. Aval ane bisulane biangane bivok, môt ase a yi a ne zu tabe.

Ngaa Yéhôva émien nye a yiane nyoñe ntyi’an ôte, a yiane vô’ôlô mone môte ya nleme wé a nga yañele a zene ya miñye’elane ya Bible (1 Timothée 1:​19) Ve bi ne teke fulane mam a miñyebe, éyoñe mame mia bo me nji lu’an a miñye’elane ya Bible.​—2 Becorinthien 6:​14-​17.