Bengaa be Yéhôva be bili ngume nta’ane mam asu ayé’é Kalate Zambe. Ayé’é te da volô be na be bi biyalane ya avale minsili di:

• Za a ne Zambe?

• Ye Zambe a nyoñe fo’o ma ngap?

• Aval avé me ne bi mbamba nda aluk?

• Aval avé me ne bi mefo’o ényiñ?

Minsili mia tôñe le, mi ne minsili bôte ba ja zu ba sili a lat a ayé’é Kalate Zambe bia bo. Tame yene biyalane ya minsili mite.

Ayé’é Kalate Zambe denan da boban aya? Bia tobe nlô ajô wua. Éko éziñ “Zambe” nge ke “aluk”, éyoñe te nje bia jeñe bifuse bise ya Kalate Zambe bia kobô ajô te. Nalé a volô na bi yem ôsimesane ya Kalate Zambe mfa’a ya nlô ajô ôte, a na bi jô’é na Kalate Zambe émien a timine mam me ne été.

Kalate a ne nlô ajô na, Jé Kalate Zambe a ne ye’ele bia?, a volô bia abui asu ayé’é Bible dangan. Kalate ate a ta’é abui minlô mejô, ane jé Kalate Zambe a tu’a ye’ele a lat a Zambe, a lat a Yésus, a lat a ényiñe ya melu ma zu.

Ma yiane ya’ane tañaya asu na mi ye’ele ma Kalate Zambe? Ayé’é da boban e zezé, ja’a bekalate wo belan asu ayé’é be ne fe e zezé.

Ayé’é da ye nyoñe ma mewolo mambé? Abui bôte da lôt awolo da, sondô ase na ba yé’é a bia. Ve, teke ngum éyoñ asu ayé’é. Womiene wo kate bia abim éyoñ wo yi na bi yé’é a wo.

Jé ja boban éyoñe ma sili na ma kômbô yé’é Kalate Zambe? Éyoñ wo sili ayé’é, mone Bengaa a zu jome wo e vôm, a awolo wo yi. A tate nyoñe mon éyoñ ya liti wo aval ayé’é te da boban. Nge wo yi, womien ô ne tyi’i na wo kee ayé’é te ôsu.

Nge ma kañese na mi bo ma ayé’é, ye nalé a tinane na ma yiane fe su’ulane bo Ngaa Yéhôva? Momo. Bengaa be Yéhôva ba nye’e be ye’ele bôte Kalate Zambe, ve be nji yemete môt éziñe na a bo Ngaa. Jame bia bo é ne na, bia kôme liti môt jôme Kalate Zambe a jô, bia yeme na môt émien nnye a yiane tobe ñyebe wé.—1 Pierre 3:15.