Aval avé Bengaa be Yéhôva ba yene sikôlô?
Bia tôñe miñye’elane ya Bible a lat a ñyemane mam a sikôlô. Ngaa Yéhôva ase a bo mone môte ya nleme wé mewôk, éyoñ a fas aval a ne tôñe miñye’elane ya Bible a lat a mame ma. *
Sikôlô a ne nya mfii
Sikôlô a volô môte na a bi ‘nya fe’e, a mbamba mfasane mam,’ Bible a liti na mefulu mete me ne nya mfii. (Minkana 2:10, 11; 3:21, 22) Yésus a nga jô beyé’é bé na be bo beye’ele ya mejô mese a nga ye’ele be. (Matthieu 28:19, 20) Ajô te nde bia volô, a ve Bengaa be Yéhôva bese ngule nyule na be bo teke nyoñe sikôlô éngbwemese, ja’a nlañan, ntilan a e yeme laan a bôt, * be yeme fe mame ya metum a miñyebe mife.—1 Becorinthien 9:20-22; 1 Timothée 4:13.
Ngovina fe a yem mfi ya sikôlô, jôm éte nje a bo na bongô be ke sikôlô (primaire a secondaire). Bia tôñ avale metiñ ete, amu bia tôñ abendé di: “Môt ase a su’u émien e si e be bejôô” nge ke ngovina. (Beromain 13:1) Nde fe na bia kate bone bangane na be bo teke biasé sikôlô, be ve ngule ya yé’é, be bo teke bo éles. * Kalate Zambe a jô na: “Mam mese mi abo, bo’ane me a nlem, aval ane nge mi abo Nti, sa bôt.”—Becolossien 3:23, Nkôñelane Matthias Meye.
Sikôlô a ye volô bia na bi toñe nda bôte jangan. Kalate Zambe a jô na: “Nge môt éziñ a nji taté [toñe nda bôte jé] émien, adañédañ ba ya nda bôt jé, a kateya mbunan. A ne abé a dañ môt a ne te buni.” (1 Timothée 5:8, Nkôñelane Matthias Meye) Sikôlô a ne volô bia na bi yeme be’e mbe’e Zambe a nga ve bia. World Book Encyclopedia a jô na nsôñane ya sikôlô ô ne na, “a volô bôte na be bo mfi asu si ba nyiñ . . . be bo mbamba bebo ésaé.” Môt a nga kôme nyoñe mfi ya sikôlô a ne ngule ya toñe nda bôte jé a lôte nyu a nji bo sikôlô.—Minkana 22:29, Nkôñelane Matthias Meye.
Bebiaé ba toñe nda bôte jap éyoñe ba kômesane bone bap mfa’a ya bo mbamba benya bôtô, sikolô a ne bo nya mfii mfa’a ôte. (2 Becorinthien 12:14) Bia ve bebiaé ngule nyule na be lôme bone bap sikôlô, to’o ba nyiñe bevôme sikôlô a nji bo zezé, be vôm a ne ayaé, nge ke bevôme metum ma bene sikôlô. * Bia ve fe bebiaé mbamba melep mfa’a ya volô bone bap ba ke sikôlô. *
Wo yiane kôme fas ôsusua na wo nyoñe mintyi’an a lat a sikôlô
Bible a jô na: “Ndimi mam (môt a ne bibuni buni) a buni éfia ése; ve môt a ne ntye a tu’a fombô nkean a ke.” (Minkana 14:15) Bia tôñ abendé éte éyoñe bia fase nge bia ye bo beta besikôlô (besikôlô môt a ne bo éyoñ a maneya lycée), a yiane fas abime moné a ye jañele a mfi y’été. Sikôlô a ye’ele ngumba ésaé a ne bo nya mfii, amu a ne teke nyoñ abui éyoñ a moné.
Miñye’elane Yéhôva a ve mi ne mfi a dañe mi émo ji ja ve. Miñye’elane Zambe a ve mia kômesane môt asu ényiñe ya nnôm éto. (Jean 17:3) Mia ye’ele fe môte mbamba mefulu, “Éyoñ éte w’aye yeme zôsô a nya ntyi’ane mejôô, a mbamba mboan, ya, mbamba zen ase.” (Minkana 2:9) Nlômane Paul a nga bo beta besikôlô ya éyoñe jé, a émien a nga loone ñyemane a nga nyoñe be Yésus na “édima ñyemane wome ya be Krist Yésus.” (Bephilippien 3:8; Mam minlôman 22:3) Aval ane nye, abui Bengaa be Yéhôva be nga bo abui sikôlô, ve ba jô na ñye’elane wo so be Yéhôva ô ne édima a dañe wu be nga nyoñe sikôlô. *
Miñye’elane Yéhôva a ve mia ye’ele bia mbamba mefulu
Beta besikôlô be ne ndaman amvôé môt a Yéhôva
Bible a jô na: “Môt a ne ntye a yen mbia jam, ve sobô.” (Minkana 22:3) Bengaa be Yéhôva ba yeme na, be université a beta besikôlô béziñ be ne njalan a mvine mimboane mi mam, nalé a ne telé môt a bo Zambe ésaé meve’ele été. Jôm éte nje abui Bengaa be ne teke tili bone bap avale beta besikôlô ete. Ba yeme fe na mbia miñye’elane miziñ mi ne vebane wôé aval ane mi:
Minsos: Moné a soo mevak a nya mvo’é
Bôt abui ba jô na beta besikôlô mbe étam be ne volô môte na a bi ésaé ja ve abui moné, nalé a bo na abui bongô be sikôlô be ke université amu ba kômbô bi abui moné. Bôte béziñ ba buni na moné nnye a ye soo be mevak a nya mvo’é, ve Kalate Zambe a kate bia na ôsimesan ôte ô ne minsos. (Écclésiaste 5:10) Jame da dañ mfi e ne na, Kalate Zambe a ye’ele fe bia na “ôzañe [akum] ô ne ndi ya mbia be mam mese,” wo bo fe na môt a jañele mbunan. (1 Timothée 6:10, Nkôñelane Matthias Meye) Bengaa be Yéhôva ba ve ngule jap ése na be bo teke timbi ôlame ya “medu’an ya akum.”—Matthieu 13:22.
Minsos: Wo yiane jeñe duma bôte be nga bo beta besikôlô be bili
Mika Gilauri a mbe premier ministre ya Georgie, a nga tili mame ma bobane si jé a jô’ô na: “E Georgie va, môt ase a ne ntindane ya bo université. . . . [Melu mvus,] nge mongô éziñ a nji bi diplôme ya université a mbe a wo’o nda bôte jé ôsone nyul.” * Kalate Zambe a ve bôte ba jeñe na be wumulu be abendé. Yésus a nga yalane betebe ôsu ya ñyebe ya éyoñe jé, mbe be mbe be jeñe’e beta bito na: “Mi ne ngul ya buni aya, vôm mi anyoñane duma, bana e be ba bevok?” (Jean 5:44, Nkôñelane Matthias Meye) Ényiñe ya université é ne tindi wo na ô bo mebun, Zambe ki a vini mbia fulu ate.—Minkana 6:16, 17; 1 Pierre 5:5.
Minsos: Môt émien nnye a yiane tyik mam me ne mvaé nge abé
Bengaa be Yéhôva ba tôñe mame mese Yéhôva a tyik na me ne mvaé nge abé. (Ésaïe 5:20) Ve avale kalate mefoé éziñ (Journal of Alcohol and Drug Education) a jô, e université, bongô bevok be ne tindi môte na a “nyoñ mintyi’ane mia wosane mame mese a too a yeme na me ne mvaé nge abé.” * Kalate Zambe a liti na nalé a ne boban, éyoñ a jô na: “Mbia mewoso ma ndamane mbamba mefulu.” (1 Becorinthien 15:33, Mfefé Nkôñelan) Mame Zambe a vini ma bobane be université aval ane, mbia nyuane meyok, nyuane banga, mvine mame ya bisôk.—1 Becorinthien 6:9, 10; 2 Becorinthien 7:1.
Minsos: Beta besikôlô mbe be ne bo na émo é dañe bo mvo’é
Bia yeme na abui bôte da bo beta besikôlô sa ke amu ba jeñ abui moné, duma, nge amu mbia minkômbane miziñ, v’amu ba kômbô tyendé émo. Mbamba nsôñane le, ve Bengaa be Yéhôva be nji bi aval nsôñan ete. Bia vu Yésus, bia yange na Éjôé Zambe nje é zu kôme si nyi. (Matthieu 6:9, 10) Nté bia yange, bi ne teke ba’a mo. Bia kañete bôte ya si ése “mbamba foé ya Éjôé Zambe,” bia volô mintete betoyini be bôte ya miaé ôse na be tyendé a bi mbamba ényiñ. *—Matthieu 24:14.
^ É.N. 1 Ngaa Yéhôva é ne ésoé ja yiane bo bebiaé bé mewôk éyoñe ba nyoñe mintyi’an a lat a sikôlô wé, a yiane de bo éyoñe ntyi’ane bebiaé ba nyoñ ô nji wosane metiñe me Zambe.—Becolossien 3:20.
^ É.N. 2 Jôm éte nje bi nga kuli nsoé kalate Yeké’é nlañan a ntilan. Bia ye’ele bôte ya minkobô 120 ya si ése nlañan a ntilan e zezé. Ataté mbu 2003 akekui 2017, bi nga volô bôte bebé 70 000 na be yeme lañ a tili.
^ É.N. 3 Lañe’e nlô ajô ô ne na “Ye ma yiane jô’é sikôlô?” (nkobô fulasi)
^ É.N. 5 Bia ve bebiaé ngule nyule na be lôme bone bap (bobe fam a bobe binga) sikôlô. Lañe’e Nkume mmombô a bete ya Ngone lale é too melu 15, mbu 2003, nlô ajô ô ne na, “Ye ma yiane lôme mone wome sikôlô?” (nkobô fulasi)
^ É.N. 5 Lañe’e nlô ajô ô ne na, “Volô’ô mone wôé na a bo atyeñe sikôlô.” (nkobô fulasi)
^ É.N. 7 Lañe’e minlô mejô ya jw.org mi ne na: “Wo simesane na ényiñ é nga so vé?” (nkobô fulasi)
^ É.N. 12 Practical Economics: Economic Transformation and Government Reform in Georgia 2004—2012, afep 170.
^ É.N. 14 Volume Volume 61, No. 1, April 2017, afep 72.
^ É.N. 16 Kele’e jw.org, ô lañe minlô mejô mi ne na, “Benya mejôô ba tyendé binyiñ” na ô yen ane Mejô me Zambe a foé ya Éjôé Zambe bi nga bo na bôte be tyendé.
