Bengaa be Yéhova be jaya zu ba belan abui minkôñelane mi Kalate Zambe mife, asu ayé’é Bible dap. Ve, éyoñe bi bili Traduction du monde nouveau nkobô wongan, bia nye’e bia belane nye, amu a belan éyôlé Zambe, a kobô betotyii, a a ne fe tyi’ibi ya wôk.

• Éyôlé Zambe. Abui bekôñelane Kalate Zambe be nji lu’u miene ya Kalate ate. Éve’an é ne na, nkôñelane Kalate Zambe éziñe wo ve biyôlé bi bôte 70 be nga nyoñe ngap a nkôñelane Kalate Zambe ate. Ve, teke vôm éziñe bia koon éyôlé Yéhôva nkôñelane Bible ôte, a to ki na, Yéhôva nnye a ne miene ya Kalate Zambe.

  Traduction du monde nouveau ki, a belan éyôlé Yéhôva betoyini biyoñe vôm ase éyôlé te é mbe é too minnôme mintilan; a fe na, bôte be nga kôñelane Traduction du monde nouveau, be nga vañe bo te futi biyôlé biap été.

• Betotyii. Miñye’elane mi ne minkôñelane Bekalate Zambe béziñ, mi nji bo betotyii, aval ane minnôme mintilane mi né. Bekôñelane Kalate Zambe béziñ be nga kôñelane Matthieu 27:40 avale di: “Nge ô ne mona Zambe, sisik si kroix.” Éko éziñ, bekôñelane Kalate Zambe be nga belan éfia kroix, amu be mbe be buni na, Yésus a nga wu kroix yôp. Ve Kalate Zambe a nji ye’ele nalé. Ve e Traduction du monde nouveau, ja lañeban avale di: “Nge ô ne mona Zambe, sisik élé mintaé!”

• Tyi’ibi ya wôk. Mbamba nkôñelane Kalate Zambe a yiane fo’o bo betotyii, ve a yiane fe bo tyi’ibi ya wôk. Bi tame beta nyoñ éve’an. E kalate Beromain 12:11, bifia biziñ nlômane Paul a belane bie, bia tinane na, “nsisim wo kundi été.” Ja’a éfuse te é ne wô’é mone jôm a Inglis ba kobô den, Traduction du monde nouveau nye a kôñelane je aval é ne tyi’ibi ya wôk. Bia lañ été na, Bekristen ba yiane bo “ayôñ mfa’a ya nsisim.”

Ane ô vaa na, a belan éyôlé Yéhôva, a kobô betotyii, a na, a ne tyi’ibi ya wôk, nsela’ane ôfe ô ne na, Traduction du monde nouveau a veeban e zezé. Nalé a bo na, bemillion be bôt be kui na ba lañe Kalate Zambe nkobô wop, ja’a ba be nji bi moné ya kuse Kalate Zambe.