Éyoñ Zarina a nga dubane a bo Ngaa Yéhôva, a nga kôlô Russie a bulane vôm a nga bialé Asie Central, a nga ke wôé a bili nsôñane ya yale bone bé benya mejôô été. Ve mbôle a nji be a bili abui moné, a nga ke tabe mon étune nda wua a bebiaé bé a mone monyañe wé ba ngal. Bebiaé bé be nga jô nye na a bo teke ye’ele bone bé Bible. Be kate fe bone bé na be bo teke kobô ajô Bible a nyia wop.

Zarina a nga fas a nleme wé ôse aval a ne volô bone bé na be yeme Yéhôva. (Minkana 1:8) A nga ye’elane Yéhôva a nleme ôse na a liti nye zen a na a ve nye fek. Zarina a nga tôñe meye’elane mé, a taté na a ke a wulu a bengo bé. Nté a mbe a bo’o de a kele’ fe a kobô be ajô ya bitua bi biôm Zambe a nga té. Mulu mete me nga volô bengo bé na be nye’e Nté biôm.

Mvuse ya valé a nga belane kalate Jé Kalate Zambe a tu’a ye’ele? * asu ya na a beta ye’ele be abui mam. A mbe a mane tili mebeñ a minsili ya kalate ate e zezé bone mefebe. A mbe fe a kô’ôlane bone minnoñ bifia asu ya na bongô be kôme wôk. A mbe a kele’e solé bone mefebe mete a nkôs e minsini ba sôbe nye biyé si, éwoban. Éyoñe bone bé be mbe be kele’ éwoban, be mbe be nyoñe’ éyoñ éte na be lañ mebeñ a yalane minsili.

Zarina a nga kui na a yé’é bekabetôlô bebaé ya kalate Jé Kalate Zambe a tu’a ye’ele? a bone bé, ôsusu’a na a ke nyiñe vôma mfe a bone bé. Nalé a nga ve nye fili ya ye’ele bone bé benya mejôô teke éndeñela’a. Ngon awômô ya mbu 2016, bengo bé bese bebaane be nga duban, be mbe fe meva’a ya yen ane nyia wop a nga belan a fek a atyeñ na a ye’ele be mejô me Zambe.