Artur, njome mekônda ya Arménie a nga ke jom akônda Bengaa be Yéhôva éziñ. A nga koone wôé na, be ne teke kañete bôt a zene ya ata’a bekalate, avale bekobot be bili minka si. Asu ya na be ve bôte éva’a ya bo fatane nkañete éte, Artur ba minga wé Anna, a mojañe mfe Jirayr be nga telé ata’a bekalate mon étison. Be nga tobe vôme bôt ba lôt abui.

Bôte be mbe be lôte’e valé be nga liti na ba nye’e jam Bengaa ba bo, be taté na ba nyoñe bekalate. Été été, fatane nkañete éte é nga kui melo besiñe bangan. Befata bebaé be nga so a tebe bebé ata’a bekalate, a ne bi nga teme wua ya été, a nkpwéya nje si. Nye ve zu da’aé Artur abaé asu, a wua nye biyete si. Artur, Anna, a Jirayr be nga jeñe na be bôé befata bete minleme si, teke ndoñ. Befata be nga tya’ate ata’a bekalate a wua bekale bese njoñe njôñ. Nné ane be nga mane ta Benga a samele be ane be nga ke.

Artur, Anna, a Jirayr be nga ke boé somane nda bezimbi. Be nga mane kat avale mam mete mese me nga boban, a kañete bone bezimbe a bôte befe be mbe be saék wé mejô me Zambe. Be nga su’ulane kee Bengaa bete belal e wofise mone bezimbi a jôé ba bevok. Atata’a, a mbe a kômbô’ yeme mame mefe a lat a jam é nga kui be. Ve éyoñ a nga wô’ô na Artur, beta éngbweme môt, a nji kômbô bulane abaé be nga da’aé nye, ane a nga telé minsili a lat a jam e nga kui be, ve taté na a jeñe na a yeme mam a lat a mbunane Bengaa. Bengaa bete be nga su’ulane kañete bezimbi tañe mewolo menyin! Njôô bezimbi ate a nga be fe’e ne vema a mam a mbe a wô’ô, ane a nga jô na: “Ngo’o abeñe nyebe! Me nyiine ki été den!”

Môs ô nga tya’a valé, éyoñ Artur a nga beta ke ata’ bakalate, nya môt éziñ a nga yene jam é nga kui be môs ya mvus a nga subu nye bebé. Môt ate a nga se’e nye amu a nga yeme jôé émien, a fe na a nji bulane abé ba abé. A nga jô fe na a nji fe beta semé befata bete.

Ngô’é éte ébien, njôô bezimbi a nga loone Artur nda bezimbi. Saa na be ke kobô ajô be nga kee de wôé, ve asu ya na a bôé nye minsili a lat a Bible. Bezimbi befe bebaé be nga zu fe tabe minlañe mite.

Môs ô nga tôé valé, Artur a nga beta ke jôme njôô bezimbi, môs ôte a nge ke liti nye bevidéo bangan béziñ. A nga loone bezimbi bevo’o na be zu yene bevidéo bete.

Amu mbia mboone befata, abui bezimbi e nga wô’ô benya mejôô éyoñ ôsu. Nalé a nga ve be mbamba ôsimesan a lat a Bengaa be Yéhôva.