Bôt ba so mesi mesi na ba zu yene beta asôk a ne fefele Pagsanjan, tisone ya Philippines. Nne Nardo Leron ésa wom a nga yaé wôé azoé été. Mbôl a mbe a yene’e ane ngovina, bezimbi, a bôte bese bevok ba bo mvôl, nde a nga tyendé, a taté na a siñe bôt, a ntoo fe ayôl.

Bebiaé bam be nga saé ane betit na be yale bone mwom bap. Be mbe fe teke dañe tabe nda, be mbe be dañe tabe mefup, be jeñe’e jôme ya di. Éyoñe be mbe be kele’e ésaé, teke môt a mbe a ba’ale bia Rodelio, mojañ, bi mbe bi wuu zaé. Éyoñe bi mbe bongô, bi nji be bi dañe bi éyoñe ya bo bivôé. Éyoñe bi nga bi mimbu zangbwal bia bese bi nga taté na bia saé mefup, bi beke’e adite bikpwaé mimbanga minkôle minkôl. Éyoñe mbe’e ô mbe mbia adit, bi mbe bi za’a bia dutu wô tyia.

Ésa wongan a mbe wôé bia a bibôm, ve jam é mbe é dañe taé bia nlem é mbe éyoñ a mbe a bôme’e nyia wongan. Bi mbe bi kômbô’ô kamane nyia wongan, ve teke ngul. Bia Rodelio bi nga tyi’i na bia ye wôé ésa wongan éyoñ bia ye bo benya bôtô. Me mbe me yii ésa a nye’e bia!

Njet a évô ésa wom bi nga bo na me wô’ô mbia ôlun a tube nda éyoñ me mbe me bili mimbu 14. Me nga nyiñe minjoñ abime éyoñ éziñ, ane me nga taté na ma nyoñe cannabis. Me nga yen ésaé: me nga be me yiane ke liti Betouriste vôm asôk é mbe.

Mvuse bone mimbu, me nga ke bo université ya Manille. Ve mbôle me mbe me yiane bulane ke saé Pagsanjan amane sondô ese, me nji be me bili abui éyoñ asu sikôlô. Ényiñ jam é mbe fo’o teke nya mfii, ane me nga taté na ma nyu beméthamphétamine, cocaïne, a heroine. Drogue a mvite mame ya bisôk be wô’ô wulu nsamba. Me mbe me nyiñe azoé été, ékotekot été, a minju’u été. Me mbe me feme’e bijôé amu asu dam mbie bi mbee mekua. Me nga sili Zambe na: “Amu jé ényiñ é ne ana?” Ve miñyebe mise me nga ke mi nji yalane ma nsili ôte. Ane me nga tu’a tu’a nyoñ drogue asu na me jibi mintaé miam.

Mbu 1972, bongô be sikôlô ya Philipines be nga suse minjoñ na be wosane bijôé. Ma fe me mbe été, ane mendume me nga bôlé. Bezimbi be nga bi abui bôt, mvus abim bengon éziñ, nde ngovina a nga telé loi martiale (nalé a ne na, bezimbi mbe ba wulu mam mese ya nlam).

Ane me nga beta ke nyiñ minjoñ, me mbe me koo ngovina woñ amu me mbe nsamba a bôt be nga bo jo’ojo’o. Asu na me bi moné ya ke ôsu a kuse drogue, me nga taté na ma wup, mvus ya valé me nga taté na ma bo mvite mam a minkukum, a bôte ya mesi mefe. Me nji be me bisi’i na ényiñ éte é ne wôé ma.

Nte ôte ôse, nyia wom ba mone mojañ be nga taté na ba yé’é Bible a Bengaa be Yéhôva. Ésa wom ve zu wô’ô jam ete biko, ane a nga mane di’i bekalate be mbe be yé’é be. Ve be nji bili atek, be nga su’ulan duban a bo Bengaa be Yéhôva.

Môs éziñ, Ngaa Yéhôva é nga kat ésa wom bengaka’a ya Bible a lat a éyoñ nya zôsôô a ye jaé si nyi ése. (Besam 72:12-​14) Ésa wom a nga nye’e ngaka’a éte, ane émien a nga taté na a jeñe benya mejôô. Bible a nji kate nye ve bengaka’a be Zambe étam, a nga kate fe nye avale Zambe a yi na nnôm a nyiñ a minga wé, a aval ésa a yiane nyiñ a bone bé. (Beéphésien 5:​28; 6:4) Ane émien a bone bé bese be nga bo Bengaa be Yéhôva. Mbôle me nji be me nyiñe nda, me nji be me yeme’e de.

Me nga ke nyiñe Australie mbu 1978. To’o me mbe me nyiñe nlam ô mbe évovoé, me nji yene mvo’é. Me nga ke ôsu a nyu meyok a drogue. Mvuse ngumba mbu, Bengaa be Yéhôva be nga zu yene ma. Me nga nye’e mame be nga lañe ma Bible été a lat a si é ne njalan a mvo’é, ve me nji be me kômbô’ô nyiine nsamba wop.

Mvuse ya valé me nga bulane ke bo abime besondô éziñe Philipines. Bibu’a ya nda bôte jam bi nga kate ma na pepa a ve ngul abui na a tyendé. Ve me mbe me ngenan me wô’ô nye nya nya abé, jôme te me nga bene ke yene nye.

A zene ya Bible, kale jam é nga liti ma amu jé si é ne njalan a minjuk a ékotekot. Me nga kame na ésoé nje ja yalane minsili miam. Ôsusua na ma bulan, ésa wom a nga ve ma kalate Vous pouvez vivre éternellement sur une terre qui deviendra un paradis. * A nga jô ma na: “Te ke ôsu a jeñ éjeñejeñe. Kalate nyi a zu volô yene wo jôme wo jeñ.” Ane a nga jô ma na me ke jeñ Bengaa be Yéhôva nné ane ma kui Australie.

Me nga tôñe melebe me ésa wom, nde me nga jeñe Aba Éjôé Bengaa be Yéhôva é mbe bebé a nda me mbe me too Brisbane. Me nga kañese ayé’é ya Bible. Minkulane mejô ya Bible ma dañe nye’e mi ne mi ya Daniel kabetôlô 7 a Ésaïe kabetôlô 9, mmie mi nga liti ma na Éjôé Zambe, éjôé é nji bi ve atañe mvôl, nnje ja ye jôé bia melu m’azu. Me nga yé’é na bia ye bi mefo’o ényiñe Paradis si va. Me mbe me yii na Zambe a wô’ô ma mvaé, ve me mbe me yiane taté yé’é na ma jôé mamien, me mbe me yiane telé nyuane drogue, nso’an meyok, a fatan ényiñ jam. Me nga kandan a minga bia nye bi mbe bi nyiñi’i, me jôé fe mbia mefulu mam. Nté ndi me too je Yéhôva é mbe yaék, me nga ye’elane nye na a volô ma na me tyendé mefulu mevok.

Ôte’ete’e ôte’etek, me nga yene na mame ma yé’é me ne volô ma na me tyendé. Bible a jô na, nge bia ve ngul bi ne jaé “mfefé môt.” (Becolossien 3:​9, 10) Ane me mbe me va’a ngule ya bo de, me nga yeme na ésa wom a nga yiane fo’o tyendé avale be nga kate ma. Ôlune me mbe me wô’ô nye ô nga man, me nga jeñ ve na me beta ke late ngbwa a nye. Ane me nga su’ulane jamé pepa a vuan ôlune me mbe me wô’ô nye aso mongô.

Éyoñ me mbe ndôman me nga tôñe bongô bevok mbia zen. Jame Kalate Zambe a jô a lat a mbia mewoso é nga yené mfa’a wom, me nga yale ma fé. (1 Becorinthien 15:33) Ve me nga su’ulane bi benya bemvôé, Bengaa be Yéhôva, mbe be nga volô ma na me tyendé a bo mbamba môt. Me nga yen édima minga jam Loretta zañe Bengaa be Yéhôva. Bia nye bi nga ye’ele abui bôt avale Bible a ne volô be.

A ngule Kalate Zambe, me nga yen ane ésa wom a tyendé, a bo môt me nji be buni’i na a ne bo môs éziñ, mbamba nnôm asu nyia wom a étôtôlô Kristen. Me nga dubane mbu 1987 a bo Ngaa Yéhôva, mvuse ya valé bia pepa bi nga beta yenan ésa wom a nga wubane ma éyoñ ôsu nté ane me nga bialé!

Ésa wom ba nyia wom be nga ke ôsu a kañete tañe mimbu 35, be volô’ô bôt bevok na be yem Mejô me Zambe. Ésa wom a mbe a ntoo môt a mbe a nye’e bôt bevok a volô’ô fe be. Mimbu mite, me nga yé’é na ma nye’e a semé nye. Me mbe meva’a ya kate bôte na a ne ésa wom! A nga wu mbu 2016, ve ma simesane nye éyoñ ése, ma yeme na bia nye bi nga ve ngule ya tyendé a toñe miñye’elane ya Bible. Me nji ve’ele beta siñe nye. Ma ve Ésa wom ya yôp, Yéhôva Zambe abui akéva, nnye a nga bo bia ngaka’a na a ye mane vaa jo’ojo’o ase a ne menda me bôt.