Me nga bialé San Juan Chancalaito, mone tisone ya Chiapas, e Mexico. Nda bôte jam é ne mvô’ô Chol ya ayoñe be Maya. Bebiaé bam be nga biaé bone 12, me ne mone tane. Éyoñe me mbe mongô, bia be bobenyañe bam a bekale bame bi nga yé’é Bible a Bengaa be Yéhôva. Ve me me nji toñe melebe ya Bible.

Éyoñe me nga bi mimbu 13, me nga taté na ma nyoñe drogue, me wubu’u fe. Ane me nga kôlô nda bebiaé bam a taté na ma wulu abui, me kôlô tisone nyi, me kele tisone fe. Éyoñe me nga bi mimbu 16, me nga ke saé afup ba bé marijuana. E koone me saéya afup ete tañe mbu wua, môs éziñ bia be bôte bi mbe bi saék bi mbe bi bete miel ô be’e abui marijuana, nde bôte ya ngame bia be be bi mbe bi siñan be nga zu wosane bia. Me nga ku ôsôé, jôm éte nje me nji wu môs ôte. Mvuse ya valé nde me nga tup a ke nyiñ Amelka.

Me nga kee ésaé éte ôsu wôé, a tôban abui minjuk afe. Éyoñe me nga bi mimbu 19, bezimbi be nga bi ma, ane aba mejô é nga tyi’i na ma yiane ke mimbôk amu wup a amu me nga kômbô wôé môt. Nté me mbe nda mimbôk, me nga bo mbia be mam befe. Ane betebe ôsu be nga lôme ma nda mimbôk é ne ngum aval, e Lewisburg, Pennsylvania.

Ve me nji tyendé wôé, me nga ke ôsu a nyoñe nyoñ. Mbôle me mbe me be’e betatouage be nsamba beze mimfaka béziñ, tyi’ibi tyi’ibi me nga ke nyiine nsamba ôte. Me nga ke ôsu a tu’a bo njet a évô, a bo mbia be mam. Môs éziñ, ndum é nga bôlé zañe minsamba beze mimfaka mibaé. Bi nga juan abui bi bela’ane mimbeñ. Asu na ndum é mam beba’ale mimbôk be nga belane gaz lacrymogène. Éyoñe ndum é maneya, beba’ale mimbôk be nga fete ma ngum aval étune nda a mimbôk mi ne ékoo woñ. Me mbe mbia évô, me bela’ane mvite nkobô. Me mbe me bôme’e bôte tyi’ibi. Me mbe me nye’e de. Mone môte ya nleme wom a nji be a bôme’e ma.

Me nga dañe tabe étam étune nda jame ya nda mimbôk, ajô te nde me nga taté na ma lañe Bible. Mvuse ya valé mba’ale mibôk éziñ a nga ve ma kalate Vous pouvez vivre éternellement sur une terre qui deviendra un paradis. * Nté me mbe me lañe’e kalate ate, me nga simesane abui mame me nga yé’é me too mongô éyoñe me mbe me yé’é Bible a Bengaa be Yéhôva. Mvuse ya valé, me nga fas a yen avale môte me ntoo amu mbia mefulu mam. Me nga simesane fe nda bôte jam. Bekale bam bebaé be ntoo Bengaa be Yéhôva, ane me nga fase na, ‘Besom ba ye nyiñe nnôm éto.’ Nde me nga sili mamiene na, ‘Jé ja kamane ma?’ Môs ôte ñwô me nga nyoñe ntyi’ane ya tyendé.

Ve me mbe me yeme’e na me vo’o tyendé a ngule jame mamien. Ane me nga ye’elane Yéhôva a de’ele nye mo na a volô ma. Mvuse ya valé, me nga tili wofise ya Béthel Bengaa be Yéhôva ya Amelka kalate, me nga tili be na ma kômbô yé’é Bible. Ane wofise ya Béthel ô nga bo na akônda é mbe bebé a nda mimbôk é zu ye’ele ma Bible. Melu mete, betebe ôsu ya nda mimbôk be mbe teke kañese na môt a nji bo ébu’a ya nda bôte jam é zu jome ma, ane Ngaa Yéhôva éziñ é nga taté na ja tili ma bekalate ba ve ma ngule nyul internet, a lôme fe ma bekalate ya lañ, nalé a nga nene ma nkômbane ya tyendé.

Me nga tyendé fo’o éyoñe me nga kôlô nsamba beze mimfaka me mbe tañe abui mimbu. Ntebe ôsu ya nsamba beze mimfaka a mbe fe étune nda é mbe ngum aval, ane me nga ke yene nye éyoñe ya awo’on a jô nye na, ma kômbô bo Ngaa Yéhôva. Me mbe fe’e ne vema éyoñ a nga jô ma na: “Nge wo bele fo’o, bo’o de. Me vo’o tebe Zambe ngame yat. Ve nge wo jeñe ve na ô kôlô nsamba wongan, womien wo yem jam da yange wo.”

Mvuse mimbu mibaé, betebe ôsu ya nda mimbôk be nga yene na me tyendéya. Ane be nga taté na ba tyendé avale ba yene ma. Éve’an é ne na, beba’ale mimbôk be mbe teke beta futi ma bengôkop éyoñ ba ke liti ma éwoban. Mba’ale mibô’ô wua a nga se’e ma a jô ma na, me bo te tek, me ke ôsu a tyendé. Betebe ôsu ya nda mimbôk be nga va ma étune nda me mbe, a kee ma vôm a ne ôbe zia akekui me nga kôlô nda mimbôk. Mbu 2004, be nga suu ma, nde be nga bulane ma Mexico e metua mimbôk, e zu koone me tabeya nda mimbôk tañe mimbu awôm.

Nné ane me nga kui Mexico, me nga jeñe Aba Éjôé Bengaa be Yéhôva. Me nga tabe ésulan éyoñ ôsu me be’e biyé mimbôk, biyé étam me mbe me bili le. Akusa bo biyé me mbe me be’e, Bengaa be Yéhôva be nga nyoñe ma a ôsesa. Mbamba nleme wop a nga liti ma na, mbe be ne fo’o benya Bekristene. (Jean 13:35) Bemvendé be nga ve ma môt a ye ye’ele ma Bible. Me nga duban a bo Ngaa Yéhôva mvuse mbu wua, Ngone ébulu é too melu 3, mbu 2005.

Ngon ôsu ya mbu 2007, me nga nyoñ ésaé nkpwa’a mefan ya éyoñ ése, me ye’ele’e bôte benya mejôô mewolo tañe 70 ngon ése. Mbu 2011, me nga bo Sikôlô bobejañe be ne minkoé (den ba loone sikôlô ate na Sikôlô bekañete mbamba foé y’Éjôé.) Sikôlô ate a nga volô ma abui, a nga volô ma na me yeme be’e mimbe’e miame ya akônda.

Mbu 2013, me nga lu’u Pilar, mba minga wom. A nga jô a fianga ése na, e nji bo tyi’ibi ya kañese mame mese me nga kañete nye a lat a avale môt me mbe. Me nji bulane mvus môs éziñ. Bia minga wom bia buni na, avale môt me ntoo den da liti fo’o na Bible a ne ngule ya tyendé môt.​—Beromain 12:2.

Ma buni na ma Yésus a nga jôô nye kalate Luc 19:10 éyoñ a nga jô na: “[Me] nga zu jeñe a nyii jôm é nga jañ.” Me nji beta nyiñe zezé. Me ne teke beta ndeñele bôt. Bible a nga volô ma na me bi nsôñan ényiñ, me nyiñe mvo’é a bôte bevok, a jame da dañe mfi e ne na, me ntoo mvôé Yéhôva, Nté wom.