Bob a mbe a dutu’u metua wé kilimeta 100 awolo nkolo da, avep été e tisone ya Alberta e Canada, éyoñ a nga tôbane nju’u zen, nka metua ô nga bôlé nye. Akusa bo nalé, Bob a nga ve ngule ya ke kui nda jé, nje éte é mbe kilimeta étan a vôm a mbe.

Bob a nga tili bobejañe ya akônda e mbe vôm a mbe a too. A nga jô na: “Bongô betan be to metua wop be nga sili biyete ya metua a kate ma na, nka ya metua ô ne ma ntuan. Éyoñe bi siseya bemetua ane be nga jô ma na ba zu ma tyendé nka. Me nji be me yeme’ nge me bili biôme ya té nka. Nté me nga ke aku’u njoñ me too éto minsini jam, nde be ki be nga ke vune metua a koone nka a biôme ya tyendé wô. Mbia avep a mbe amu neige a mbe a kpwa’ak. Be mbe be be’e biyé bi nyanga, ve be nga bo na metua a beta wulu. Me nji be ngule ya bo ésaé éte étam.

“Ma ve bongô betan bete akiba. Be mbe valé amu be mbe be kele’e kañete bôt. Bongô bete be nga bo fo’o avale ba kañete. Me ne jô na be nga nyii ma, mboane wop ô nga nambe ma angôndô ya abui. Za a mbe a yeme’e na bone beéngele ba ye tôbane ma môs ôte?”