Ong-Li a ne Ngaa Yéhôva e Bulgarie. A mbe a yé’é Kalate Zambe a minga éziñ a to jôé na Zlatka, ve nnôm a nji be a yé’é. Ong-Li a jô na: “Éyoñe bi nga yé’é ajô ya ényiñe ya nda bôt, me nga ngôné vôme ba jô na, e ne mfi ya kate môt ô nga luk a bone bôé na wo nye’e be. Me nga yen ane Zlatka a fombô ma a wô’ô émien éngôngol; a nga kate ma na, teke môs éziñ a nga tame kate nnôm ba ngo jé é ne mimbu ébul na a nye’e be!”

Zlatka a jô na, “Me ne nkômesane ya nyume mamiene mam asu dap, ve me se ngule ya tote bifia bite.” A nga beta jô na, “Mema a nji kate ma môs éziñe na a nye’e ma, to’o mema émvam a nji kate mema na a nye’e nye môs éziñ.” Ong-Li a nga liti Zlatka na Yéhôva a nga kobô bôte be wô’ô, a jô’ô na a nye’e Yésus. (Matthieu 3:​17) A nga kate Zlatka na a yiane ye’elane Yéhôva mfa’a ôte, a nyoñe ntyi’ane ya kate nnôme wé a mone wé na a nye’e be.

Ong-Li a jô na: “Mvuse melu mebaé, Zlatka a nga kate ma a meva’a mese na a nga ye’elane Yéhôva. Éyoñe nnôm a nga bulan, a nga kate nye na ayé’é ya Bible da volô nye na a semé nye, a na a nye’e nye. Mvuse ya valé nde a nga kate nye na a nye’e nye! To’o éyoñe ngo jé é nga bulane nda, a nga wubane nye a kate nye na a nye’e nye! Zlatka a nga kate ma na: ‘Éyoñe ji me suuya édudu. Mimbu mise mi, da too ma ayaé ya kat avale ma wô’ôtan nlem été, ve éyoñe ji me ntoo ngule ya kate nda bote jam na ma nye’e be.’

Ong-Li a ke ôsu a jô na, “Me nga yene nnôme Zlatka, a nga kate ma na: ‘Abui bôt e nga kate ma na Zlatka a nji yiane yé’é Bible a wo, ve me lôô na ayé’é ete da volô nda bôte jangan abui. Éyoñe ji nda bôte jangan é nga nyiñe mevak été, a élate jangan é nto ngul.’”