MVOLANE ASU MENDA ME BÔT
Volô’ô mone wôé na a bo atyeñe sikôlô
Mone wôé a ne ve ane a nji nye’e sikôlo, a ne teke yé’é, teke bo bedevoir bé. Nalé a bo na a ku meve’ele, a bi fe abé ntaban. Nde aval avé ô ne volô mone wôé na a bo atyeñe sikôlô?
Jé wo yiane yem?
Ô vo’o kôm ajô nge wo nyoñe nye ane mone mimbôk. Amu mongô a ne simesan na a nto mimbô’o sikôlô a nda jé! Asu ya na a sa’ale jam ete a ne taté na a laa minsos, a solé meve’ele mé, a ne taté taté na a sane bulletin wé señe jôé, nge ke tube sikôlô. Ajô ve nenenen.
Das ba ve mongô amu a kape meve’ele é ne fe soo minjuk. Ésa éziñ a ne jôé na Andrew a jô na, “Asu na bi ve mone wongane ngule nyu, bi wô’ô dasé nye éyoñ a ke saé mvo’é sikôlô, ve mboon ôte wo bo na a su’ulane bem ôsimesane wé ve das aye bi. Éyoñ a nji saé mvo’é sikôlô, a dañe wô’ô nleme mintaé amu aye ke bi das, sake amu a te saé abé.”
E ke komekane beye’ele a vo’o volô mongô. Nyo mon a ne simesane na a ne kabe meve’ele to’o a nji saé a ngul ése. A ne fe taté na a ve bôte bevo’ mekua ya bikobe bié, a jeñe na bôte befe mbe be kôme bie. Bi ne jô tyi’ibi tyi’ibi na, a ne bo teke yene mfi ya meme bikobe bié, a be’e ayeme ya mam a bo.
Jé wo yiane bo?
Yeme’e bi nlem. Nge wo wôk ôlun, jô’ô nyo mon na mia ye kobô ajô sikôlô dé éyoñ éfe. Ésa éziñ a ne jôé na Brett a jô na: “Bia minga wom bi wô’ô kui na bi bo mam aval da yian a mone wongan éyoñe nlem ô ne bia évôvoé.”
Ñye’elane ya Bible: “Môt ase a bo’ avôle ya wôk, ôtete’e ya kobô, ôtete’e ya yaa.”—Jacques 1:19.
Jeñe’e na ô kôme yeme vôm ajô e né. Beamu béziñ be ne bo na mongô a bo teke kabe meve’ele, a ne bo na bongô bevok ba tibili nye, na a ndôme tyendé sikôlô, na a ko meve’ele woñ, a ne bo na mejô me ne nda bôte jé, na a nji ke ôyo aval da yian, a nji bi mbamba nta’ane mam, nge ke na, e ne nye ayaé ya mane jam a te taté. Te jô ve na nyo mon a ne élés.
Ñye’elane ya Bible: “Nyô a ve nlem mfa’a ya njôan a ye yen mvaé.”—Minkana 16:20.
Volô’ô nye na a bi éyoñe ya yé’é. Bo’o na a bi mbamba biyoñ a ne yé’é. Vôm a ne évovoé teke biôm bi ne deñele nye (ane télé a téléfôn). Asu na ô tu’a volô nye, bo’o na a yé’é tañe bone biyoñ asu na a bo teke ji’a tek. Ésa éziñe ya si Jaman a ne jôé na Hector a jô na: “Bia taté na bia yé’é môs ôse ôte’ete’ ôte’etek éyoñe meve’ele me nto bebé, a lôte na bi ke mbil éyoñ éyoñ é li’iya étun.”
Ñye’elane ya Bible: “Jam ese é bili éyoñ.”—Écclésiaste 3:1, Mfefé Nkôñelan.
Va’a nye ngule nyu na a yé’é. Jam e ne bo nya mfii asu nyo mon e ne na a yeme mfi ya sikôlô éyoñe ji, nalé aye ve nye nkômbane ya yé’é. Ô ne nye liti na metañ a yé’é sikôlô me ne volô nye na a yeme’ belane moné ba ve nye.
Ñye’elane ya Bible: “Nyoñe’ ñyemane mam, nyoñe’ fek. . . . Wumulu’ wô.”—Minkana 4:5, 8.
Melep: Volô’ô mone wôé éyoñ a kômesane bisaé ba ve nye sikôlô, ve te bo bie señe jé. Andrew a jô na: “Éyoñ ése be mbe be va’a nye bisaé a yiane bo nda, ngone jangan é mbe é buni’i na bia nyia bia ye bo bie señe jé.” Ye’ele nyo mon aval a yiane bo bisaé bite.