Ba matghamte mba ba matnu ts’a num mbag Nsi là
Zi’te 11
Ba matghamte mba ba matnu ts’a num mbag Nsi là
Tsit matghamte mba matnu kebwô o lén à? (1)
Benkristô ghù nabam ndù Nsi b’a ntu tat ke’? (2)
Ke z’a ghù kà benkristô tse nenùn ke be ze jùa Krisimit, Paska, ke ba tse nekwimte le’ bwe benntùn à? (3, 4)
Feben ku’ni neghù kebwô benntùn ké? (5)
Yesu n’a nkwù à num ta’ fanta’tù ké? (6)
Bin neghù Nsi tsiante num be b’a ke (7)
1. A ke’ b’a njoṅ matghamte mba njoṅ matnu fa bèn mbe tse kebwô. Là, Nsi ke’ bam tse matghamte kebwô bèn nte, ke tse bo ke’ be bam ju ze Bibel tswite là lo.—Matio 15:6.
2. Nsi tu tat: Yehovah b’a ntu tat ke’? mbagte ndù ta’ Nsi z’a b’a ntamte ben tat là? Nga! Yehovah, Tà, be “Nsi nenùn à nda’ tù’ i.” (Yohané 17:3; Marko 12:29) Yesu b’a tuswe i, mbèn nke nju’ni yi. (1 Korintô 11:3) Tà b’a mèn ndùb ntshùa mén. (Yohané 14:28) Ywèt nelàn ke’ b’a mènntùn; a b’a neta Nsi ke mfa’ yi là.—Neto’te 1:2; Mfa’ghantum 2:18.
3. Krisimit mba Paska: Bo na’ kebwe Yesu à lé’ 25 ntùm ṅwù ntshob bàagham. Bo na’ mbwe i à neghebte 1er le’nju ntùm ṅwù gham, ngelaṅ ze ghabéb mbwe na’ nku’ni nefaṅ mbwe tshob ntshundà tèttswe’ là. (Lukas 2:8-12) Yesus ke’ to’ tshob benkristô mbe bo ke nze jùa num lé’ mbwe se. Ju a na’ ntshob ghabam nu i là b’a mbe bo ke nze jùa num le’ vù se, mbagte ndù neke nkwimte. (Lukas 22:19, 20) Krisimit mba ba matnu tse, fe à ba njwèn matghamte kebwô. A b’a be ju ntshù’ num Paska, mba tshobte mbum ngab, ke mbo’ nsindà lo. Benkristô tse bo be mbwe là lo ke be ze jùa Krisimit mba Paska; mba benkristô tse nenùn sènni ke’ be ze.
4. Le’ bwe: A b’a ben tse bo na’ mbe ke be ghamte Yehovah là, na’ mbèn ngù jùa bàa tse Bibel la’te là. (Neto’te 40:20-22; Marko 6:21, 22, 24-27) Mbwe benkristô lo ke be ze jùa le’ bwe. Ba matnu neze jùa lé’ bwe fe à ba njwèn maghamte. Benkristô nenùn num mfà ba nda’, mbèn nke njù jùa netèt bo, num tsemo’ ngelaṅ ntùm ngu’njù.
5. Nebwôg feben: Feben ke’ ku’ni neghù sàm ju: Bo ke’ be ju’ sàm ju. A be be ke ywimte yube, mba bo ke’ ku’ni neghù kebwô be. (Yobkwi 146:4; Nzenu 9:5, 10) Yôg num nkwù; a ke’ be ghô tù ngelaṅ mèn kwù là. (Ezekia 18:4) Là a num mbe mo’ ngelaṅ, ba tshùagkèt angél, ke ba bebun no, nke ngù bo lo’ yub mbà ywèt feben nà. Njoṅ ba matnu fa ts’a taṅ nga num nebwôg ke neghamte feben nà ke’ bwô.—Esaya 8:19.
6. Fanta’tù: Yesu na’ ke kwù à num ta’ fanta’tù. A na’ nkwù à num ta’ saṅ, ta’ kam ntshwèn. Ntshob grekia bo bagte ntun mi ndù “fanta’tù”, ntùm mbe’yam Bibel là, ke nda’t’à t’a’ kam ntshwèn. Keki fanta’tù fe à ba njwèn matghamte. Ba mbwe benkristô lo ke be ghù fanta’tù, ke bèn nke ngamt’é. Ndùlala, o kwate ndù a lo mbwô nebe ghamte Nsi njab fanta’tù mbwe ké?—Nebwôgte 7:26; 1 Korintô 10:14.
7. A be a ta neghua’ tsem’o tshen matghamte mba matnu là. Mo’ ndù tunndà o boa shun tsho nsi ṅag netagt’o ndù o le’ yu matghamte. Là neghù Nsi tsiaṅte num o b’a ju ndùb wù ntshùa mb’a be benntùn nyiaṅtu tsiaṅte num o là.—Tankùt 29:25; Matio 10:36, 37.
[Netshaŋ bag fe ki 22]
Nsi ke’ ba tu tat
[Netshaŋ bag fe ki 23]
Krisimit mba Paska fe à ba njwén matghamte
[Netshaŋ bag fe ki 23]
Sàm nu neghamte feben mba nebwôg yub ke’ be
