Zi’te 2

Nsi b’a we?

Nsi nenùn b’a we, lén se be ke? (1, 2)

Wul i b’a ndùke? (3)

Mat ts’a b’a nda’tse là b’a tsile? (4)

Be ghù nebe ghamt’é ntshuà’à njam ba neto boa nkeki ké? (5)

Tsit manze bàa tse be ku’ni ne tshùa bwe ndèn Nsi à? (6)

1. Benntùn numm ngamte tshu yàme. La, Bibel nke nda’te mbe Nsi nenùn b’à ntshù’. A lo nabte njoṅ tshu fa mfe kamànyam mba num nsitsha’a. Be ghù ne ghamt’à nda’ yi, nummbe yi bèn mfà yôg be.—1 Korintô 8:5, 6; Apokalipse 4:11.

2. Nsi ghù ndén nku’ni mayàme, là ngù ko’ se lén à nda’ ntshù’. Sen lén nà b’à YEHOVAH. Ntùm tsemo’ Bibel, bo tsho’ lén Yehovah njab à ndén nku’ni mbà TSHÙÀBEN, ke NSI lo. Là, ngelaṅ ze bo na’ nkite Bibel là, bo lo ke ntèt lén Yehovah ntùm bwe yoṅ ntsha’ sammbàa!—Netume 3:15; Yobkwi 83:18.

3. Yehovah ghù ta’ wut, là a ke b’a mbà ze be là. Bibel tshob mbe: “Nsi b’a ywèle.” (Yohané 4:24) Ywet b’a lèn yôg s’a tshùa se be neshu là. Sàm mèn ke’ to’ yen Nsi. Yehovah ke ntswe à mfe kamànyam,  là nku’ni ne ke njèn njoṅ tshu fa. (Yobkwi 11:4, 5; Yohané 1:18) Kà ywet nelàn b’a ke? A ke’ b’a menntùn A b’a neta ze Nsi num ndo’ mfa’ yi là.—Yobkwi 104:30.

4. Bibel num nda’te mèn ze Yehovah be yi là. A num ntswite be mat ts’a b’a nda’ tse là: netsin ndaṅndaṅ, zenu, mba ngù’. (Nebwôgte 32:4; Yob 12:13; Esaya 40:26; 1 Yohané 4:8) Bibel num nda’te be mbe a be nkondén, ngù bwô ntù, ndèn nelagte mfà mèn, ndén nefà ke siaṅ, mbèn nke mfèn ntù. Be a’ tshùà num ju’ntshu, ndo’ mfi’ num i.—Efesô 5:1, 2.

5. A lo nke ndiag mbe be vù nsi mbwe ba neto boa netshaṅ ke ba nkeki lo, nke ngamte yub ntùm ghamte ze be ghù nefà Yehovah là ké? Nga! (Netume 20:4, 5) Yehovah tshob mbe be ke ngamt’à ndà’ ze tu wut. A ke nsi bam mbe mo’mèn, ke mo’ju lo, kwé ghamte z’à be ze là. Neto boa netshaṅ ke’ ku’ni ne ywimte be.—Yobkwi 115:4-8; Esaya 42:8.

6. Be ku’ni ne ben mbe lén Nsi ntôgt’à ndùke? Mbwe i b’a nelôte tshu ts’a nabte là, mbèn nsiaṅte mayàme num ju ze tshen tshu là tshwèt tswite lá. Njoṅ tshu fa tse Nsi nabte là tshwèt nda’te be mbe a ghù mba’ bo zenu ndùb. Be num njen nkôni mi ntùm njoṅ tshu fa ts’a nabte là. (Yobkwi 19:1-6; Roma 1:20) Mo’ mànze netshùà bwe nzi’te [ndèn] tshu mayàm num Nsi b’a ne zi’te Bibel. Ntùm bwe, a num ntswite be mbe’yàm tshu ndù be lèn tshaṅ Nsi a be yi là. A num mbèn nsoṅ be ju z’a nsi fa’ là, mbèn ngù ju z’a diag mbe be ghù là.—Amos 3:7; 2 Timotio 3:16, 17.

[Netshaŋ bag fe ki 5]

Be ke ntshùat’a njam tshu tse Nsi nabte là, mba Bibel kà ndèn Nsi