BAG I 39
Nkwade Nsi mfà num lem
Lem bʼa ju ndùb neshu. Be nya ke ghù lem, mba be ke yôge. Mbʼa bʼa Yaweh Nsi bèn mbom ben nà, a ghù netshob ben mba be loʼ lem mfaʼ yi là. Ke zʼa tshob mfà num lem à? Bag bin kuʼni nekwé lem ke nenu i ké? Bʼo loʼ mbwô mfiʼ num mat nefaʼ bo lem à ndùke?
1. Nkwade Nsi mfà num lem bʼa zile?
Yaweh Nsi naʼ tshob ghafaʼ tse ngelañ mbwe mbe: “[Yôg] mba zit mèn no bʼa ntùm lem tse tsʼa be num i là.” (Lévitiko 17:14) Mbwe Yaweh Nsi, lem bʼa yôg. Ndañndañ mba yôg tanjoñ miag Yaweh Nsi là, mba lem tanjoñ mbwe i.
2. Ke ze Nsi keʼ be bam bo loʼ lem mfaʼ yi à?
Yaweh Nsi naʼ tshob mbwe ghafaʼ tse mbe kà bo nu lem. (Siañ Netoʼde 9:4 bo Lévitiko 17:10.) A naʼ bèn mbwôgde yen ntshùʼ là ngelañ ze Tu Ntseʼde naʼ ntshob benkristô mbe “Bin tshùb wut tsin num . . . nenu lem.”—Siañ Mfaʼ Ghantum 15:28, 29.
Netshùb wut ben num nenu lem nke mbagdʼà mbe ke? Taʼ ngatshwén tshob wù mbe kʼo bèn nenu nduʼ, mbʼo ke bèn nu, ke yi ké? Ndaʼndù, oaʼ jù tshu bo nabte bo nduʼ là ké, ke oaʼ sob i ntùm wul o mba bo be nsob nto lʼà? Nga. Be ndañndañ, ntshùʼ Nsi tshwèt ntshètte ben neloʼ lem. Yennà nke mbagdʼà mbe be keʼ ghù nenu lem, ke nefèt mbàb ze bo keʼ wat, nsô lem tse là lo. Be keʼ bèn ngù nejù mba ke lo ze bo nabte bo lem nà.
Nseʼ num neloʼ lem, ntshwén benntùn yi ô? Tsemoʼ mat neloʼ lem ntshwén benntùn yi num mfàn ntshùʼ Nsi. Yenni bʼa neloʼ njoñ lem fa, ke neloʼ ba bag tse tse ndùb lo—a bʼa globules blancs, globules rouges, plaquettes bo plasma. A ke njoñ mat fa netshwén bo lem bèn nke mfàn ntshùʼ Nsi. Mba mfiʼ là, bo num ndoʼ ba bag lem tse ndùb, nsô bon ntoʼ bag ntùm bwe num netshwén benntùn yi. Moʼ mat netshwén bo lem bʼa neloʼ à lem mèn zʼa tshwèt ngon nà mfaʼ yi. A bètte mba we lo siañde nu kuaʼ mebwô kà ndoʼ ze mfiʼ. *—Galatia 6:5.
TSWEʼ NTUN MI
Yen mbʼo kuʼni neloʼ mbwô mfiʼ mfà num mat netshwén wul o bo lem nà.
3. Loʼ ba mfiʼ tsʼa tsiañde ntù Yaweh Nsi là
Bʼo loʼ ba mfiʼ num yu ntswe mebwô tsʼa zin ku ntshùʼ bo nkwade Nsi mfà num lem à ndùke? Lôde LAʼDE NETSHAÑ, mbèn mbùnde yen bètte li: numke a mbʼa ju ndùb neghù tshen tshu li kà ndoʼ taʼ mfiʼ num yu ntswe mebwô à?
-
Leʼde Nsi a fà zenu wù.—Yakobo 1:5.
-
Diag tun ntshùʼ Ñwaʼni Nsi mbèn njen mbʼo kuʼni neyab ntùm faʼ là.—Tànkùt 13:16.
-
Diag ba mat netshwén bo lem bo num ngù ntùm yu tañlaʼ là.
-
Lôde ba mat netshwén bo lem tse bʼo ke bam nà.
-
Lôde be ze mfiʼ o loʼ là ke ghùtni nzentù o là.—Mfaʼ Ghantum 24:16. *
-
A bwô o lèn mbe sàm mèn—kʼa be ndu o ke nzwi o lo, taʼ ngakwémbwe, ke yu ngatswide Ñwaʼni Nsi lo—keʼ ghù neloʼ lèn sen mfiʼ là num yu dùʼ.—Roma 14:12.
-
Kide mfiʼ zʼo loʼ là nedù tsemoʼ lène.
4. Ghakwénta Yaweh Nsi num ndiag mbwô mat netshwén wut yub yi
Be taʼ mènntùn ze ntshùʼ Nsi mfà num lem, mbèn ntshwén wul i kuaʼ mebwô ke loʼ lem. Lôde LAʼDE NETSHAÑ.
Siañ Titô 3:2, mbèn mbùnde yen bètte li:
-
Numke a mbètte be laʼde nkuʼni bo mbétni ngelañ be tshobte bo ghatshwén à?
|
Tse be keʼ kuʼni nebam nà |
Tse mba zit mènkristô lo ghù netshoʼ là |
|---|---|
|
A. Plasma |
Bon bag ntùm Plasma |
|
B. Globules blancs |
Bon bag ntùm Globules blancs |
|
C. Plaquettes |
Bon bag ntùm Plaquettes |
|
D. Globules rouges |
Bon bag ntùm Globules rouges |
5. Ngelañ bo loʼ bon bag tsʼa be ntùm bag lem tse ndùb là ntshwén yi là
Lem ghù bag tse tse ndùb kuà—Globules rouges, Globules blancs, Plaquettes bo Plasma. Tshen bag lem tse ndùb là bèn ngù bon ntoʼ bag tse bo nke ntsiañ mbe ‘Fractions mineures du sangʼ là. * Bo num ndoʼ tshen bon ntoʼ bag tse là netshwén ba ngokèt yi, ke neghù mbe lem kut wul i ndende lo.
Nseʼ num bon ntoʼ bag tsʼa be ntùm bag lem tse ndùb là, mba zit mènkristô lo aʼ be loʼ mfiʼ, njéʼdʼà num nzentù i zʼa tswide bo Ñwaʼni Nsi là. Be tsemoʼ benkristô gha netshwén wut yub bo bon ntoʼ bag tsʼa be ntùm bag lem tse ndùb là. Là, be tsemoʼ bam neloʼo, nzentù yub ke tshoʼde yub num bwe.
Kà ndoʼ mfiʼ bètte wul o mbe:
-
Be me bagde ngatshwén ju zʼa ghù me bam ke negha neloʼ bon ntoʼ bag tsʼa be ntùm bag lem tse ndùb lʼà ndùke?
BE MÈNNTÙN BÈTTE MBE: “Ke zʼa bag num neloʼ lem à?”
-
Ke zʼo kwade yu à?
JU NETSHÙBE
Yaweh Nsi kô mbe be yen lem à mba ju tanjoñ nà.
Mbètte nekwimde
-
Yaweh Nsi nke njen lem à mba ju tanjoñ à numke?
-
Be lèn à ndùke mbe ntshùʼ Nsi num nenya ke nu lem tshwèt ndôde mba neloʼ lem à?
-
Bʼo loʼ mbwô mfiʼ num mat netshwén wul o bo lem à ndùke?
DIAGE
Ke zʼa bètte o siañde nu num bwe kà ndoʼ mfiʼ netshwén wul o bo lem tsho à?
“Questions des lecteurs” (La Tour de garde, 15 octobre 2000)
Ke zʼa bètte o siañde nu num mbwe kà ndoʼ mfiʼ netshwén wul o bo bon ntoʼ bag tsʼa be ntùm bag lem tse ndùb à?
Ke zʼa naʼ njwimde taʼ ngatshwén nebam mbe nkwade Yaweh Nsi mfà num lem bwô à?
“Jʼai accepté le point de vue de Dieu sur le sang” (Réveillez-vous!, 8 décembre 2003)
Yen mba kum ghakwémbwe ghaghebte docta num njwimde ba fètfèt tse bandum mba tse bènnzwi là.
^ Lôde bag i 5 “Ngelañ bo loʼ bon tsit bag tsʼa be ntùm bag lem tse ndùb là ntshwén yi là” mba Kide tun fe 3, “Ba mat netshwén bo lem.”
^ Tsemoʼ ghatshwén num ntshob mbe bag lem tse ndùb tse kuà bʼa ju ntshùʼ bo bon ntoʼ bag tsʼa be ntùm bag lem tse ndùb là. Ndùlala, moʼndù aʼ bètte o bagde yu ngatshwén mbʼo ke loʼ lem ke plasma, globules rouges, globules blancs, mba plaquettes lo.
