1, 2. Ke ze bo khite ndoʼ ndàʼte mànndze neloʼ nkheb ntsha yi netèt ndzéndzé ndà ghemte Nsi à?

BE KHUʼNI ne tshùàtʼà ndùke kà ndèn Nsi à? A be kekônkô nesieṅ ndjoṅ ntswite fa, tse bà ndà ghemte ndzéndzé khite nsa ntùm njù là ké? Be keʼ khuʼni nesieṅ ndjoṅ i fa. Be lo nkhuʼni mbà nesieṅ ndjoṅ i fa, mbà be nsi lèn zit zʼa tshwèt ntswite nunenùn à ndùke?

² Nebe ke fàn mànndze bʼà ndù: mbà be yà màʼ mieg ndjen mbeʼyàm ntshob mi bo khite nsoṅ be lèn mèn ze Nsi be yi là, a mbètte mbe be kagtùn, ndieg mànndze tà mfon zʼa be netèt bwe, nke ntswite nunenùn nà: tàʼ i zʼa be benntùn bem nà. Be loʼ tàʼ mfiʼ li ndù: Mi ntshob mbʼo nèn tèt ntàne, ntèt benntùn bo nke ntà ntshu num mfiʼ nesag tàʼ kem nzwe. Ngaswèn nzwe nke ntshob mbe kem nzwe sag mbe màʼ 3. Là ngajun kem nzwe gha, nke nkwate mbe a keʼ sag nkum ndùlàlà. Bo nsi ghù à ndùke kà kheb ntsha netèt bo à? A bʼa neloʼ màʼ mfiʼ kem nzwe là yi.

3. Bo nàʼ khite Bibèl à num ke?

³ Tàʼ màʼ neloʼ mfagte ntsha yi netèt ndzéndzé ndà ghemte Nsi num bwe ké? Ṅ! a bʼa Bibèl. Nsi nàʼ nghù ndù bo khite Bibèl à neloʼ nghù ndù ndjoṅ benntùn fa ntùm ndjù ziʼte ndèn nunenùn zʼa be ntùm bwe là mfà num i. Bibèl tse bo khite là bʼà mbuʼ ntshuʼ ntshuʼ. Bo lo tote ntshob bibèl fa, ke netote bon tsit mbuʼ mi lo, ntùm ndzéndzé ntshob nguàn 2100 tà ntôgte. Ndùlàlà mbʼa be mbà we lo sieṅ nunenùn num Nsi ntùm mi ntshob là.

4. Mit ntshob bèn mbe ntùm Bibèl à?

⁴ Bibèl bʼà tàʼ ndàʼntum ze tandjoṅ ze Nsi fà be là. A num mbagte bà tshu tsʼa be ke bʼà yi,  mbà be nàʼ ke khuʼni nezi ndèn ntun mi ze be tughwut là. A num nsoṅ be nu mfà num ben tse bo ke ntswe ntùm ndjù nufen ywèt là. A num nsoṅ be nu mfà num nkwatenu Nsi, mfà num lèn mèn zʼa be yi là mba num nkàʼni zʼa yàb là. A num nsoṅ be tshu tsʼa nsi ghù benntùn ntùm leṅ ndjù se Yesu nsi bèn ke tô ndjù fa nguʼ ntshàʼ mbùm nà. A num nsoṅ be nu mfà num tshu tsʼa nsi seʼ be là. A num mbèn ndàʼte mbʼa be beg à bin dieg mànndze yôg matmat tà mfon nà.

5. Zit mfiʼ bèn nke ndàʼte ndù Bibèl bo zenu tunndjù ke ndzin à khu ntshùʼ à?

⁵ Tshu tsʼa be be tshùàte num bwe mbem ndù Bibèl bʼà Ntshob Nsi kuàʼ nenùn nà yàm. Mbwe i bʼà mbe ṅwàʼni nesieṅte zenu mfà num mbà tshu ndjù be yi là, bem ju ze Bibèl nàʼ ndjà tshob ta mbwe là. A lo be ta mbwe, ndjoṅ benntùn fa num nsitshaʼ nke nkwate mbe tshàʼ tswe à num tàʼ ju. A lo be moʼ ngeleṅ ndjù bag mbinyam, ntùm ngô Afrika, benntùn nke mbem ndù nsitshàʼ ghelʼà num tàʼ ju mbà tàʼ nyu zʼa katte tshubte 3 500 teṅ tu, mbèn nkatte be tshubte 3 500 teṅ tun nà. Là, num nebem ju ze ṅwàʼni nelèn tunndjù tshwèt ndàʼte là, a be sènni a nguʼ ndjù 3 500 mbà moʼ tàʼ ngakhite ntshob Nsi nàʼ nkhite là ndù: “Nsi ghet tshàʼ à num dùʼ banban.”​—Yob 26:7.

6. Zit ju ndùb bèn nke ndàʼte ndù Bibèl fe à Nsi à?

⁶ Taʼ ju ndùb zʼa tshwèt ndàʼte ndù Bibèl fe à Nsi kuàʼ nenùn nà, bʼà tshu tsʼa nàʼ ntshob tà mbwe, ndù a nsi seʼ bumte ndù màndjem nà. Nkàʼni Nsi keʼ bʼà mbà mi ghatàm ngàm nà, nummbe, Nsi lèn ju zʼa nsi seʼ kuàʼ nenùn nà; mbà zit juʼ lo zʼa num ntshob là, num mbe miegte mbumte.

7. Mit nkem Ntshob Nsi bèn nàʼ ndjà bumte tà mbwe à?

⁷ Ntshob Nsi mi tà mbwe yà bumte yoṅ yàme nguàn yoṅ nkhù. Tshù tàʼ mfiʼ li: Bibèl lo tshob ndeṅndeṅ ndù bo nsi bwe Yésu à mà tùsô Béthéléhem; a lo tswe nguʼ ndjù 700, ntshob mi bumte ndeṅndeṅ. (Mika 5:2; Matio 2:3-9) Nebèn ndʼàʼte moʼ mfiʼ: mbeʼyàm tshu tse Bibèl tshob mfà num Yesu là bʼà mbe: a nàʼ yà toʼ tshob ndù a bʼa tàʼ mènngon bo keʼ tàbtʼé là bèn zi bwe i, mba ndù bo àʼ zi nswèn i ghakebàn tse mbà mbùm 30. Mbà men ntshob là lo ne mbumte. Be lèn nenùn ndù sàm mènntùnnyieṅtu mba ntshùʼ nàʼ ke khuʼni nebwôgmbwe nsoṅ mbà tshen tshu li nsi seʼ be là, kʼa ne nzi mbumte!​—Isaya 7:14; Sakaria 11:12, 13; Matio 1:22, 23; 27:3-5.

8. Mit nkem ntshob Nsi bèn nke mbumte num zebe ngeleṅ ndjù à? Men nkem ntshob là ke ntswitʼà ke?

 ⁸ Mbeʼyàm ntshob Bibèl tshwèt ndjôg nke mbumtʼà num zebe ngeleṅ ndjù. Tshù tsemoʼ li:

• “Moʼ ngô nsi loo, màʼ moʼ ngô ntsho; moʼ nufen nsi loo, màʼ moʼ nufen ntsho; tshàʼ nsi nyiʼte kuàʼ màyàme, tshobom mba kekhuà be ntùm dùʼ ndzéndzé.”​—Lukas 21:10, 11.

• Nukebwô “nsi ke yàm nèn mbwe”​—Matio 24:12.

• “Ntùm bà miegte léʼndjù . . . benntùn nsi be ghaheʼe, ghakô nkàb . . . ghakejùʼntshu tà tshobe . . . ghakeghom ghwut tshobe, tshùegkèt benntùn, ghakekô numebwô . . . ben tse koʼteghwut màʼ fù mieg bo là, ghakô ngùa ntshùa Nsi.”​—2 Timôtio 3:1-5.

O keʼ bem ndù ndjoṅ tshen tshu là fa tshwèt ntum mbwe be sènni ké? “Ntshob Nsi” tshwèt nke mbumte, ju ke tsi num bwe mbà bo nàʼ khite là; ndùlàlà nke ndàʼte ndù Bibèl keʼ bʼà tàʼ buʼ ṅwàʼni mba mbà zit lo là. A fe à ywèt Nsi!​—2 Timôtio 3:16.

9, 10. Ke zʼa tshwèt ndàʼte ndù Nsi lo ke bem ndù sàm mèn bate Bibèl à?

⁹ Be loʼ mfiʼ ndù o ghù tàʼ dùʼ fàʼ ngùanesa, ntswe khite mfiʼ mbʼo tshwèt nkô ndù ghafàʼ tsho ke mfàʼ là ntum bo. A be ze ngakeban o bate ju zʼo khite là, mbʼo nsi ghù à ndùke? O ke nsi tsiègte jù zʼa bate num zʼo khite là ké? Be ndeṅndeṅ mbà ghwù là, Nsi lo ke bem ndù benntùn bate ntshob nenùn mi, Bibèl.

¹⁰ Ben tse bo nàʼ ndeṅte nebate ze netswite Ntshob Nsi là lo ke bate tà nèn nkume. Be num ngàʼ Bibèl bo khite num zebe ngeleṅ ndjù là, mbèn ngàʼ mfe ndjwèn tse, nsieṅ ndjuʼ à be ntshob ntshùʼ ntùm bwe. Yenni nke ndàʼte ndù mba mbʼa Bibèl tswe màyàm nà, ju ke, bate ntùm bwe.