BAG 7
We ke nghemte Nsi num mat mebwô à?
1. Be ghu ne fàʼà ke kà ntù Nsi tsieṅte à?
TBE KE ndieg ne latte be à Nsi ntùm dumte nkôni, mbʼa tshwèt mbètte ndù be fagte be à ghemte kebwô. Mbà be àʼ ke ndzin à ntùm ghemte nenùne. Ntùm sènni, benntùn ntu ntshuʼ ntshuʼ num ndjoṅ nsitshàʼ fa tshwèt nke ndzin à ndùlàlà.
2. Be be yen bà bàʼnkhwà Yehôva à yà, sob fàʼ bʼà ke?
2 Mbà Bibèl nàʼ ndjà bwôgmbwe ntshob là, gha ghemte tse nenùn bʼà “bwoṅ benntùn” ndù bo tum à “ntùm ndjoṅ ngô fa, ntùm ndjoṅ ntunndà fa ntùm ndjoṅ ndzwit fa, mba netèt ndjoṅ ntshob fa”. (Apokalipse 7:9) Ntùm ntunngô 235 num nsitshàʼa, ntshuʼ ntshuʼ ba bàʼnkhwà Yehôva tshwèt ndjwimte tsemoʼ benntùn be khùàʼ ndende ndù bo ziʼte ndèn bà mànndze nkôni Yehôva mba tshu tsʼa tshwèt mbètte be yi là.
Mba be khuʼni ne lèn bà ghemte Nsi tse nenùn yi là
3. Bà bàʼnkhwà ke ghemtʼà we, kelèn mat neghemte ze bo num nkhù à?
3 Bà bàʼnkhwà lèn ndù, ghemte bʼa ze Yehôva ndàʼ tùʼ i. Bo gha ne ke nghwù nsi mbwe bà netô, ke netsheṅ no. (1 Johané 5:21) Bo keʼ be fà nkhuʼni feben, ntùm bà nsindà vù, ke ntùm tsemoʼ mat tse bo num ndze num ne ke ndoʼ ntomte bemntù ze kebwô mba ntswite ba bebune nà lo. (1 Timotio 4:1) Là, bo num mfite ntù benntùn tse mèn khwù bo là ntùm ne bagte nkàʼni Nsi, nsoṅ yub mbe feben nsi bem num vù, tswe num nsitshàʼ zʼa nsi keṅ zi paradisi là.—Johané 5:28, 29; Mfàʼ ghantum 24:15.
4. Tse ben Nsi tsin à zit bag mbwe ka à?
4 Bà bàʼnkhwà keʼ ghù moʼ ju ne fàʼ bo nsà, ka, ke tôg lo; nummbe bo lèn ndù tshen tshu là ke mfe à Diabolo. Bo keʼ be yab ntù yub num ka ndù à khuʼni ne ke mbéb yube. Bo yab ntù yub à num Yehôva.—Tankùt 18:10.
5. Bà bàʼnkhwà Yehôva “ke mbe ke loʼ bag ntùm nu ndju à ndùke”?
5 Yesu lo tshob ndù, “ghaziʼte nu i keʼ be ntùm tshu ndjù” (Johané 17:16) Yesu ze tughwùt lo gha ne tsho ntùm nkhùnkhù ngeleṅ a nàʼ mbe num nsitshàʼ là. (Johané 6:15) Be ndeṅndeṅ, bà be tsho ntùm tshunu nkhùnkhù. Bo keʼ be loʼ tumngô yub mbà mbwe ju là; bo keʼ be tôte, ke be zwe netswe num dieṅ ndùb ntùm yen ndjù li. Là, bo num ndjàb ntù yub num ne bé ntshub mbèn nke ndzin ntùm nkàn ngô ze bo be ntùm bwe là.—Johané 15:19; Roma 13:1, 7.
6. Ghafàʼ Nsi ke nzin à ndùke ngelen nàndàa? Num ne fagte nàndà be boà ndù ké?
6 Bo ke ndzin à num mànndze ze ghatô ngô tswite bo là. Num ndùlà, bo num ṅuʼ tun ṅwàʼni num yub nandà mbà kàn tshwèt mbètte là. (Tito 3:1) Bo num ndzin num mànndze ze Nsi yab mbwe bo là. Tshù ju zʼa ghù kà bo nke nkhù ne so bénndzwi yàm nà. (1 Timotio 3:2) Mbèn mbe mbà bo num ndzin à ntùm nkàn Bibèl ntùm sob yôg là, bo keʼ be yà yen ghafàʼ Nsi tse yub nandà, miegtʼà ntùm fagte là.
7. Bà bàʼnkhwà ke ndàʼte yub nkôni à ndùke netèt bo à?
7 Bà bàʼnkhwà ghù nkôni netèt bo. Yen nkôni li ze bo yab num Nsi là, num ntemte yub bo tùʼ à bà fetfèle, ke mbà mba bo tùmtʼà ntùm bà ntunndà mba ngô ngô yàm nà. A num mbe ngeleṅ ze ngeʼ bo kekhuà seʼ tàʼ dùʼ là, mbà bà bàʼnkhwà àʼ khù nde ne seʼ ywimte fèt tshobe. Ba bàʼnkhwà num ntswite nkôni ntùm ndjoṅ mànndze yôg sob fa.—Johané 13:35.
Ndjoṅ ghakwénta Yéhôva fa ntùm ndjù temte mbe fètfèle
8. A bʼà kelèn mfàʼ kebwô ze ben Nsi num nkhù à?
8 Ben Yehôva num nkagtùn num ne tswe nelàn ntùm sob yôg, ke be fàʼ lemte nu. Bo num nkhù tshô, tatte, nkembèn, bum ndù, bo ṅute ntùm ntàne. Tse bo na ndà là keʼ be leb zwi tshobe. Tsemoʼ nàʼ be keṅ tùʼ bà bàʼnkhwà ndù bo nàʼ ke mfàʼ tshen tshu là; là ntshùàte ndjem ywimte zʼa fe Yehôva là, bo lo ghwàʼ tshen mat kebwô là. Bo nàʼ sôg yub bo làn num mieg Nsi.—1 Korintô 6:9-11.
Bà ghù ze nekô Nsi
9. Ke ze tàʼ buʼ ṅwaʼniʼ tshob mfà num bà ndà ghemte bà Africa à?
9 Be lèn yen ni ndù mbeʼyàm ndà ghemte
num nke nsoṅ ntshob mbe nenùn be netèt bo là. Bo num mbe tshob ndùlàlà nke ndàʼtʼà neta mfàʼ mi bo fàʼ ntùm ngô là. Tshù tàʼ mfiʼ li: num ju zʼa tshwèt ndôte ndà ghemte ben kristèn ze bo loʼ nghù à ze bà Afrika yi là; tàʼ buʼ ṅwàʼni ntshob nu mfà num bwe ndù: “tsemoʼ ntséʼte ben kristèn tse nswe, seʼ ntàʼ ghaka num dieṅ. Bo num mbuʼ ngoṅ mbe bo num nsoṅ nu ndem ndjù mbèn nke nghù bà mesin. Gha soṅ nu ndem ndjù netèt bo num ndjente mbèn nke mbagte ntun bà ndjem. Bo num ndoʼ ntse nelàn ndjoʼ mvèt nelàn, bwembwôge, tshandré mba labinda njate mbèn ntshètte ngokèt yi.”10, 11. Ke zʼa ghù kà tshen tshu tse bo num ntsieṅ sènni mesin nà, ke bèn nke ndàʼte mbe yen mat ne ghemte là fe à Nsi à?
10 Ben tshen ndà ghemte là num mbuʼ ngoṅ mbe mesim ze bo num nghù là ke ndaʼtʼà mbe Nsi neṅ mbotni num bo. Là, tshen tshu tse bo num nke ntsieṅ mesim nà keʼ be lʼàʼte ndù Yéhôva neṅ mbotni num bo. Satan num mfà neta tsemoʼ bà ghemte tse tatte ndù bo ghù neta mfàʼ. (2 Tésalonikà 2:9) Mbèn mbe, Bibèl lo yà ke tshob fe mbwe ndù: mesin mi à fe Nsi mba ne tshob nu ndemndjù, ne tshob ntshob mèn ghuà mba ne ghù nelèn ntshùate nsi mi i”.—1 Korintô 13:8.
11 Yesu lo te bu num bwônkeʼ tse ntshob bo mbe: “A ke be bʼa mbà zit mèn no zʼa ke ntshob me ndù: ‘tshùàben, tshùàbenʼ nà bèn nsi tsho ntùn nufen mfe kamàyem, là a nsi bʼa mèn zʼa num mbe tsieṅ nke mfàʼ ze nekô tàà zʼa be mfe kamànyem nà. Ben yàm nsi tshob me ntùm sen léʼndjù là ndù: Tshùaben, beg lo ke ke ntshob nu, ndemndjù num lén so ké, ke ke ntàʼ bà bebun num lèn so ké, ke ke nghù bà neta mfàʼ num lèn so ké? Ke mbà ndùlàlà me nsi tshob bo ndù: me keʼ toʼ lèn zin! Bin lo mbeṅ àm nèn nghuànesa, bin ghà fàn ntshùʼ.”—Matio 7:21-23.
12. We zʼa nsi tsho ntùm nufen mfe kamànyem à?
12 A bʼa bà we bèn nsi tsho ntùm nufen mfe kamàyam à? Bʼà ben tshen nà tse bo num nghù ze nekô Yéhôva là.
Bà buʼ kekàʼ num nufen Nsi
13. A bʼa sit fàʼ ze Nsi tshwèt ntshagte ben tse ndù bo ke mfàʼ num sènni, bà we bèn nke mfàʼ à?
13 Ke ze Nsi tshwèt mbètte ben tse yi ntùm sénni à? Yesu lo tshob ndù: “Bo nsi soṅte yen nkhùn mebwô li num nufen Nsi num nsitshàʼ fa dùʼ ze benntùn be là, ndù a be ju bʼàʼnkhwà ntùm ndjoṅ ngô fa.” (Matio 24:14) Tshù fàʼ se bà bàʼnkhwà, Yehôva tshwèt mfùeg ghwùt num ne loʼ nèn yi mbwe sénni là.
14. Nufen Nsi bʼà ke, we zʼa nsi be nga tô ntùm bwe à?
14 Num “nsitshàʼ fa dùʼ ze benntùn be là,” bà bàʼnkhwà Yehôva tshwèt nsoṅte nkhùn mebwô nufen Nsi mba tàʼ netô zʼa be mfe kamànyem, ndù àʼ zi mbèn nke ntshagte ndjoṅ nsitshàʼ fa ntùm nunetsin nà. Bo num ntswite benntùn ndù Yehôva yà yoʼ Yesu Kristo mbà mfen yen nufen nà, boa tse nkhwébo ntu 144,000 tse bo tshoʼte yub à netèt ndzwit benntùnnyieṅtu là.—Daniel 7:14, 18; Apokalipse 14:1, 4.
15. Nufen Nsi nsi biegtʼà ke?
15 Bà bàʼnkhwà be ndàʼte benntùn ntùm Bibèl mbe nufen Nsi nsi biegte ze netô Satan. Yen ngeleṅ nà, ghemte kebwô nsi bi boa ntswite mi a num neṅ nkembèn num Nsi, là, nke nso nkhuʼni num Diabolo là. (Apokalipse 18:8) Mbà zit ze netô benntùnnyieṅtu zʼa tshwèt nta tu mbwe Nsi là, nsi bi!—Daniel 2:44.
16. Ba we bèn mbe ben Yesu Kristô à? Bo àʼ zi nke ntswʼà yà?
16 Mben mbe, bà bàʼnkhwà Yehôva num nghù mbà we lo lèn mbe Yesu Kristô nsi loʼ mbwô mbwô tshu fuʼ seʼ yi num ndjoṅ benntùm tshen nà fa tse bo tshwèt mfàʼ ju ze Nsi tshwèt mbètte yub yi là. Bo bʼa ben tse num nsitshàʼà, Bibèl tshwèt mfà yen nkàʼni li: “A nsi tshuʼ mbwoṅ zʼa tshwèt nkhwàʼ là, ntshuʼ ngayenngeʼ mba mèn zʼa keʼ ghù ngaywimtʼé là. A nsi ko ndèn metsit mèn mba mbwoṅ, a nsi yôg bà bwoṅbwoṅ.”—Yobkwi 72:12, 13.
17. A bʼa ndàʼ bà we bèn nke mbuʼ kekàʼ num nufen Nsi à?
17 Sàm ntseʼte benntùn tse bo num nghù ze nekô Nsi mbèn nke nsoṅte nkhùn mebwô nufen Nsi ntùm tsieṅte là keʼ be bwe. Ndàʼ bà bʼànkhwà Yehôva bèn nke nghù ndù benntùm lèn nufen Nsi num ndjoṅ nsitshàʼ fà.