Nsi tshwèt ntsiañ njoñ benntùn fa mbe bo gheptʼé ntùm leʼde. (Yobkwi 65:2) Là, a keʼ be juʼ, ke ne mbam njoñ leʼde fa. Taʼ mfiʼ li, Nsi keʼ be juʼ ndeʼde taʼ mandum zʼa num mfétte nzwi i njoñ ngelañ fa là. (1 Pétro 3:7) Mba ngelañ bon Israél naʼ nke nèn mbwe neghô ntùm nukebwô là, Nsi lo nke nga nejuʼ tshob ndeʼde. Magde ke bwe, leʼde Nsi bʼa taʼ fuʼ ndùb. Ndaʼndù, Nsi nsi juʼ mba ba ndeʼde ben bo ghù nukebwô taʼ là, a be ze bo bèttʼé lagde ntù ntshùʼ mbèn mbade là.​—Siañ Esaya 1:15; 55:7.

Lôde la’de netshañ Nsi num njuʼ njoñ ndeʼde fa ké?

Leʼde bʼa taʼ bag ze be ghamde, ndùlala a bètte mbe be nke ndeʼde à ndaʼ Yaweh Nsi, ngabom ben. (Matio 4:10; 6:9) Mba be keʼ làn miagde là, be ghù neleʼde Nsi num lén Yésu nummbe a kwù à num mi ben mfànnu. (Yohané 14:6) Yaweh Nsi keʼ be kô mbe bag bin be ghù leʼde nke nsiañ à nesiañe, kà ne nke ntshob à be ju ntshùʼ lo. A kô mbe tse ben ndeʼde nke ntum à ntù ben.​—Siañ Matio 6:7; Filipi 4:6, 7.

Be ngabom ben juʼ mba ndeʼde tse be num ngù ntùm ntù ben nà. (1 Samuél 1:12, 13) A num nkô mbe be nke ndeʼdʼé mba zit ngelañ no, mba nkebnjù bo mvetnjù là, ngù ngelañ be tshwèt njù tshañ nà, mba ba ngelañ ngùtni.​—Siañ Yobkwi 55:22; Matio 15:36.

Neghepte Nsi keʼ fiag nummbe be bʼa netèt benntùn tse bo keʼ ghù bamntù mfà num i, mbèn nke ntshabte nkaʼni  mi mfà num fide num nsitshaʼ là. (2 Timôtio 3:1, 4; 2 Pétro 3:3, 13) Ndùlala, a bwô bag bin nke nkùmde boa fèt ben, num neso kù num ben, be be.​—Siañ Héber 10:24, 25.

Nekùmde bo benntùn tse bo num nkô Nsi là num njwimde ben negheptʼé. Ntseʼde Ghakwénta Yaweh Nsi num njwimde ben nejù bin bamntù tsemoʼo.​—Siañ Roma 1:11, 12.

Be o ghepte Nsi à ngelañ o tshwèt nsiañde nu mfà num ju zʼo ziʼde ntùm Ntshob mi là. Be o ziʼde mbu mfaʼ mi, ntag mi, mbèn ngù nkaʼni mi. Nesiañde nu num bwe ntùm leʼde, num ngù zeben nenyamde nkôni bo zenu Nsi nèn à be mbwe.​—Siañ Yoshua 1:8; Yobkwi 1:1-3.

O kuʼni neghepte Nsi à ngelañ o yab ntù o num i, mbèn ghù bamntù mfà num i là. Ndaʼndù bamntù bʼa taʼ ju zʼa bwô nekém nà. O nke ntswe mbèn njam ndôde ntun ntshùʼ tsʼo ziʼ mbèn mbam nà, mba o ke nekém yu bamntù.​—Siañ Matio 4:4; Héber 11:1, 6.

Yaweh Nsi num nywin num ben tse bo kô yi là. A kuʼni netshètte yub num tshu tse be a ghù yub bamntù, mba yub nywinde bi là. (Yobkwi 91:1, 2, 7-10) A num nte bu num ben num tshu tse be a ghùtni zebe ntswe mebwô bo zebe tsiañde là. Yaweh Nsi num ntswide ben mbwô manze yôg.​—Siañ Yobkwi 73:27, 28; Yakobo 4:4, 8.