BAG 9
Yu tunndà kuʼni nebe ntùm tsiañde à ndùke?
1. Numke nandà mbe ju ndùb num tsiañde taʼ tunndà à?
Nkùn mebwô fe à Yaweh Nsi, Nsi tsiañde, zʼa kô mbe njoñ tunndà fa be ntùm tsiañde là. (1 Timôtio 1:11) A yi bèn mbe tà tunndà. Nenandà mbwe ngomnaʼ be mfà tsiañde ntùm tunndà nummbe a bʼa taʼ mbwô dùʼ nekwiagde bônkeʼ. Benkristô ghù nezin num ntshùʼ ngô mfà num neghù ñwaʼni nandà.—Siañ Lukas 2:1, 4, 5.
Nkwade Nsi mfà num nandà bʼa ke? A bʼa mbe taʼ mandum bo taʼ mènnzwi tamde ke zi mbèn fagde. Yaweh Nsi kô mbe kà mandum fù nzwi i, mènnzwi ke ne mfù ndu i. (Héber 13:4) A be mban nefagde nandà. (Malashi 2:16) Ndaʼndù, Nsi bam mbe mènkristô fagde mbèn nandà mèn ghua à ngelañ ze taʼ mèn netèt bo ghù màndà là.—Siañ Matio 19:3-6, 9.
2. A bètte mbe mandum bo mènnzwi nke ntswe à ndùke?
Yaweh Nsi naʼ bom bandum bo bènnzwi à mbe bo ke njwimde wut tshob ntùm nandà. (Netoʼde 2:18) Mba mandum bʼa ngatshagde ze tunndà là, a ghù neloʼ mbwe num nedunde yub nzi num bag mbàb wut, mbèn ntswide yub ntshob Nsi. Nkôni ghù netèndʼé a te nzi nzwi i mbwe tse. Bandum bo bènnzwi ghù nelaʼde nkôni bo nkuʼni netèt bo. Mba bandum bo bènnzwi keʼ làn miagde là, neziʼde nelagde wut tshob bʼa manze kekônkô num tsiañde ntùm nandà.—Siañ Efésô 4:31, 32; 5:22-25, 33; 1 Pétro 3:7.
3. O ghù nefagde ngelañ ngùtni be ntùm nandà ké?
Ngelañ ze ngùtni be ntùm zin nandà là, o ghù nekagtùn ndù kà nkôni o ghù mfà num ndu o, ke nzwi o lo là fi. (1 Korintô 13:4, 5) Ñwaʼni Nsi keʼ tshob mbe nefagde bʼa manze nenabte ngùtni nzenze tsʼa num tum ntùm nandà là.—Siañ 1 Korintô 7:10-13.
4. Bônkeʼ, ke ze Nsi tshwèt nkô bin ghù à?
Yaweh Nsi kô yu ntswe mebwô. A fà mbwô ntag wù ndù o tshùade bwe njù bin ngelañ o keʼ nguanmèn nà. A kô mbʼo jù bin zenu bo mbwô mfiʼ tàan bo màan. (Kolosé 3:20) Yaweh Nsi bèn kô mbʼo ghù tsiañde nefaʼ tshu tse ngabom o bo mén i tshwèt mbèttʼo yi là.—Siañ Nzenu 11:9–12:1; Matio 19:13-15; 21:15, 16.
5. Tà boa mà, bon tsin kuʼni neghù tsiañde à ndùke?
Bin ghù nefaʼ faʼ num nefà jujù, nzwe, bo dùʼ ntswe bon tsine. (1 Timôtio 5:8) Ndaʼndù neghù mbe bon tsin ghù tsiañde, a bèn mbètte mbe bin nke ntswide yub nekô Yaweh Nsi, mbèn mfañ a tshagde yube. (Efésô 6:4) Yu mfiʼ nelaʼde nkôni mfà num Nsi, kuʼni nekwag ntù mèn o. Ngelañ zʼa fe à ntùm Ñwaʼni Nsi là, ntag mu kuʼni nebade nkwade kebwô zʼa be ntùm ntù i là.—Siañ Nebwôgde 6:4-7; Tànkùt 22:6.
Bônkeʼ num njù bin ngelañ ze bo so kù num bo mbèn nyamde yub là. A bèn mbwô ne nke ntsiagde yube. Yen mat netshagde yub yi là, aʼ tshètte yub num neghù mat kebwô zʼa kuʼni nebiagde yub tsiañde là. (Tànkùt 22:15) Là, a keʼ bwô netsiagde mén à bo tshab ntshu mba tshùagntù.—Siañ Kolosé 3:21.
Ghakwénta Yaweh Nsi num nkide ba ñwaʼni nzenze, tsʼa num ntshob nu mfà num tà boa mà, mba bônkeʼ là. Tshen ñwaʼni là nke njéʼde à num Ñwaʼni Nsi.—Siañ Yobkwi 19:7, 11.
