Yaweh kô mbʼo be nshun i. O toʼ kwate ndù à be o be tàʼ nshun mèn zʼa tshùa njoṅ benntùn fa ntùm ndjù là ké? Bo nàʼ nke ntsiaṅ Abraham, zʼa nàʼ ntswe num nsitshàʼ ndù a be sènni à nguʼ ba nguʼ lʼà nshun Nsi. (Yakobo 2:23) Nwaʼni Nsi tùnte ndèn tsemoʼ benntùn tse mba bo nàʼ nkutkushun boa Nsi, a naṅ mbotni mayàm num bo là. Num sènni, ntùm njoṅ bag njù fa num nsitshàʼa, bwoṅ benntùn kutkushun boa Nsi. Mba wù kuʼni ne kutkushun bin Nsi.

Nebe nshun Nsi bwô ntshùa nebe nshun mba ke lèn mènntùn lo. Nsi keʼ be lagte bétni shun tse. (Yobkwi 18:25) Nebe nshun Nsi bwô ntshùa neghù tshu nkàb. Tàʼ ngankàb num nkwù, mba ze nkàb tùʼ à ze ben bo nekeʼ ntùn nà. Mba kuaʼ ndù ke lo, ben tse bo kutkushun boa Nsi là, ghù tàʼ junkàb ze sàm mèn keʼ kùʼni nekwé bo là.​—Matio 6:19.

A be moʼ ndù tsemoʼ benntùn nke nkagtùn netshèttʼo nelèn Nsi. A be à bʼa tàʼ mèn netèt shun tsho, ke ntùm tunndà o lo. (Matio 10:36, 37) A be ze tsemoʼ benntùn tshwèt nke nzwi o, ke neke ngùtni o ngelaṅ zʼo tshwèt nziʼte nelèn Nsi là, o bètte tu wul o ndù: ‘We ze me tshwèt ndiag ndù ntùi tsiaṅte num àm à​—ze benntùn nyiaṅtu ké ke ze Nsi à?ʼ Kuaʼ num yo neloʼ njen yi, tàʼ mèn seʼ ntshob wu mbʼo tsin ke bèn nejù tshaṅ mbʼo nsi bam yi ké? Kuaʼ nenùn mbʼo ke nsi bame: nummbʼo lèn mbʼa ne fù o; O ke ndiag neyôge, o nke njù tshaṅ. Là, Yaweh kuʼni neghù ndù o tswe matmat num nsitshàʼa. Num ndùla, a keʼ kô mbʼo bam mbe tàʼ mèn, ke tàʼ ju lo, tshèttʼo neziʼte ndèn mbʼa bʼo ghù tà mbe yu tàʼ nshun Nsi là.​—Yohané 17:3.