A be zʼo ghù tàʼ nshun o zʼo num nyamtʼé mbèn nke mbwôg i là, mbʼo àʼ kagtùn nebe yu mbà yi là. Bo num nsiaṅ ntùm Nwaʼni Nsi mbe: “Yaweh bʼa mèn mebwô mbèn mbe mèn netsine. (Yobkwi 25:8) Nebe nshun Nsi tshwèt mbèttʼo nebe mèn mebwô, mbèn mbe mèn netsine. Nwaʼni Nsi tshob yen ni ndù: “Num ndùlala, bin kaṅ ntùʼ ghafiʼte Nsi, mba ben tse Nsi kô yub là, mbèn ndoʼ neke nzin ntùm nkôni nèn yi mbwe.” (Efésô 5:1, 2) Tshù bon manze netshùa bwe kà nke mfàʼ ndùlala li:

Neywimte tsemoʼ benntùn. “A bwô bag à bin ke ngù numebwô mbwe njoṅ benntùn fa.”​—Galatia 6:10.

Nefà wùt be num fàʼ kuaʼ mebwô. “Kà mèn zʼa be njé là bèn neyi i, là, a bwô ndù à so neta num i, ndoʼ mfàʼ fàʼ yi, ndoʼ mbu mi mfàʼ mbwô fàʼ yi.”​—Efésô 4:28.

Netswe nelàn num wut mba ntùm ywèle. A bwô ndù bag à bin lànte njoṅ ṅuʼ num mbàb wut be fa, mba njoṅ ṅuʼ ywèt ntùm ntù be fa, miagte zebe nelànte ntùm neke mbwôg Nsi.”​—2 Korintô 7:1.

 Neloʼ nkôni bo nkuʼni kà nke ntshagte tunndà be yi. “A bwô ndù mba we lo netèt be . . . ke nkô nzwi i mba tu wul i là; num ze bag i, mènnzwi bèn nke mbwôg ndu i à ntùm nkuʼni ndùb. Bônkeʼ, bin ke njuʼ ntshu tà tsin mba mà tsine.”​—Efésô 5:33–6:1.

Netswite nkôni mbwe tsemoʼ benntùn. “Bag à bin loʼ neke nkôni netèt be be, nèn yi mbwe, nummbe nkôni fe à Nsi.”​—1 Yohané 4:7.

Neke nze nkàn ngô. “A bwô ndù mba we lo fà wul i nsi mbwe [ghatô ngô] . . . Bin fà jù ze njoṅ yub fa kuʼni nekwé bin nà bo; mfà ntshub ngakwé ntshub.”​—Roma 13:1, 7.