Satan num ndiag netèntʼo ndù o ke mfàʼ ka. Mbeʼyàm benntùn num mfiag ndon num fi mbwetà tshobe, ke neke mfà jujù ywèt tshob lo, num ndù kà bo ya ntù mfàʼ kebwô bo. Bo num ngù ndùlala nke mbwôg à mbe kà fet ywèt tshob ket yube. Bo num nso nkwa mi bo loʼ ka na yi là num ntu mbu mube, ke num ndaṅ mbu mub lo. Bo num nu, ke neyoʼ mfu neloʼ nke mbéb wut tshob yi lo; bo num nu ndùlala nke nkwate mbe men mfu là ghù neta ka. Tsemoʼ num mbèn ntswéʼ dùʼ bo ntùm ndà, ke num tàʼ dùʼ tshàʼ lo, ntshoṅ ba tshu ntùm bwe, nummbe bo num nkwate mbe tshen tshu là ghù neta neloʼ nkabte yub yi. Tsemoʼ num mbèn “nsaṅ nkub ka” num bo kà nke nzine, nummbe bo num nkwate mbʼa kuʼni neywimte yub ngù tshunu tshob ke ntôg mebwô, ke netshùa nkuaʼ nkuaʼ ndà ṅwàʼni ke neloṅ ntsha ke kuʼni, ke nekô yub ke kô nkô lo.

Mbwô manze neloʼ ntshuʼ wùl o yi bu Satan bʼa neghù Yaweh mba nshun o là. Yaweh Nsi boa ba angél tse ghù neta ndùb, ndù a tshùa ze Satan boa ywètkebwô tse. (Yakobo 2:19; Apokalipse 12:9) Yaweh tsin nke mbéb làʼte neta neloʼ ntshuʼ shun tse yi bu ngeʼ​—tshen ben nà bʼa kuaʼ koʼ bétni ghabam nu i.​—2 Kronika 16:9.

Ntshob Nsi tshwèt ntshob ndù. “O keʼ ghù neke mfàʼ ka.” Yaweh ke mbàn mesim bo ka à nummbe: benntùn tse bo num mfaʼ tshen tshu là num mbe nèn miagte ntùʼ bʼa kuan Satan Diabolo.​—Levitiko 19:26.