Nekutkushun bin Yaweh Nsi bʼa tàʼ mbwô ju tà miagte, zʼa lo mbètte mbʼo ghù là. Tshùàben nsi tswitʼo mbʼà bʼo ghù kà ntswe tsiaṅte mba netswe kebwôg sàm ju là. A nsi tshuʼ o bu mbeʼyàm tshukebwô tsʼo nàʼ nke mbam mbèn nke ngù ntùm njam nà. A nsi ke juʼ nkuàʼ mo ntùm yo neke ndeʼtʼé. A nsi ywimtʼo ndù o juʼ fite mum ntù o, mbèn njab njoṅ mo nkwate fa num i. (Yobkwi 71:5; 73:28) Yaweh Nsi ke tomtʼo mum ngelaṅ ngeʼ. (Yobkwi 18:18) Mbèn mbe seʼe, ju ze Nsi bù nezi mfà wù ndù mànjam, mba yu nkàbtshoʼ fàʼ num so kushun bin yi là, bʼa yôg matmat.​—Roma 6:23.

Ndaṅdaṅ mbʼo tshwèt nkùʼte nseʼ mbaṅ Nsi là, bʼa be ndaṅndaṅ mbʼo tshwèt nkhùʼte nseʼ mbaṅ shun tse là. Mba bo yub nsi kaṅ tùʼ à shun tsho. Kuaʼ nenùn, bo nsi be à mbà fèttsho tse bandum boa tse bènnzwi là. Bo nsi loʼ à tsiaṅte kà nke ntswitʼo, nelèn Nsi, mbèn nke mfà neta wù neloʼ ziʼte nèn yi mbwe.

Nsi keʼ bʼa nguan be. A be zʼo tshwèt ndiag ne kutkushun bin Yaweh là, o juʼ yen ju ndùb li kuaʼ mebwô. Nekutkushun bin Nsi, keʼ bʼa lèn kushun se ghuàn ntshùʼ num nkut là. Lèn mbʼa Ywèn ntshùa be mayàme, mbèn ngù zenu mba neta ntshùa be. A kuʼni netô be. Ntshùate num ndùla, a be ze be tshwèt ndiag nebe nshun i là, mbʼa bwô ndù be ke njuʼ à ju zʼa tshobe, mbèn nke mfàʼ à ju zʼa bètte là. Ndàʼ nefàʼ ndùla bèn nsi ghù ndù bag à bin ke njuʼ mebwô.​—Esaya 48:18.