Nebe nshun Nsi tshwèt mbètte mbʼo ziʼte nelèn i mebwô. Shun tsho keʼ lèn lèn so mbèn nke ntsiaṅ o à yi ké? Ṅ, bo ke nghù à ndùla. Mba Nsi kô mbʼo ziʼte, ndèn lèn se, mbèn nke ntsiaṅ i à yi. Lèn Nsi bʼa Yaweh. (Yobkwi 83:18; Matio 6:9) A bwô ndù o ziʼte ndèn ju zʼa num nkô, mba zʼa keʼ be kô là. A bwô mbʼo ziʼte ndèn ben tse bo be shun tse, mba tse bo be ghakeban tse là. Nelèn mba tàʼ mènntùn loʼ mbe yi ntùm mal i là num ndoʼ nguelaṅ yàme. Nwaʼni Nsi tshob mbʼa bwô netshuʼ ngelaṅ, neloʼ nziʼte nelèn Nsi yi.​—Efesô 5:15, 16.

Shun Nsi ke ngù à ju zʼa bwô i là. Loʼ mfiʼ num shun tsho. A be zʼo ghù shun tsho, ke ke ndoʼ yub mebwô, mbèn nke ngù à tshu tse bo keʼ kô là, mba bo àʼ bam nebèn nke ntamte nzin bin à bo ké? kuàʼ nenùn, nga: bin à bo nsi facte e! Ndaṅndaṅ be mba tshen shun tsho là, à be zʼo kô nezin shun bin Nsi là, mbʼa bwô ndù o ghù à mat zʼa be mebwô mbwe i là.​—Yohané 4:24.

A keʼ bʼa njoṅ ndàghamte fa bèn nke ntshagte mèn num manze nekutkushun bo Nsi. Yésu Kristô, zʼa be mbwe nshun Nsi là, lo tshob nu mfà num nze bàa. Tshù ju zʼa nàʼ ntshob li: “tàʼ manze ndùb num bwe, ndù bwoṅ benntùn bèn nke ntèn ntshùa num bwe; yen manze ndùb là num ntshagtʼo, o nèn mbi à nebi. Moʼ manze bèn mbe bwe, ndù a fét: njoṅ bon ndô benntùn tse bo ke nzin num bwe là kag; yen mefètnze là num ntshagtʼo, o nèn nkwé yôg matmat.” Yen ni ke mbagte nsoṅ o à mbe: A be zʼo tshwèt nkô netam kushun bin Nsi là, mbʼa bwô mbʼo ziʼte ndèn kuàʼ koʼ manze netsin ze bo num ndoʼ nghamtʼé yi là.​—Matio 7:13, 14.