Yésu Kristô bʼa mén Yaweh, mbèn mbe nshun i ze tanjoṅ. Yésu Kristô lo be sweʼ seʼ ndù bo bwe i num tshàʼ mba tàʼ mènntùn nyiaṅtu là, ndù a nàʼ mbʼa tàʼ neta ywèt mfe kamànyam. (Yohané 17:5) A nà nsweʼ nseʼ num tshàʼa, num nesoṅ benntùn nyiaṅtu nunenùn mfà num Nsi. (Yohané 18:37) A lo bèn mfà mba yôg se, se mènntùn, num neloʼ ntshuʼ bétni benntùn nyiaṅtu yi bu nukebwô mba vùkob. (Roma 6:23) Yésu be ndonni à Mfen zʼa tswe num Diaṅ Fen Nsi, sʼa ba tàʼ netô mfe kamànyam, ndù a yi zi bèn kaṅ nsitshàʼ loʼ ghù paradisi yi là.​—Apokalipse 19:16.

Mba ba angél bʼa shun Nsi. Ba angél lo ke yoṅ ntoʼ tswe num tshàʼ mbà benntùn nyiaṅtu là. Yaweh nàʼ bwôgmbwe nabte yub mfe kamànyam, kà nzi nabte tshàʼa. (Yob 38:4-7) Ba angél bʼa ntu ntshuʼ ntshuʼ. (Daniel 7:10) Tshen shun Nsi là mfe kamànyam, tshwèt ndiag mbe benntùn ziʼte ndèn nunenùn mfà num Yaweh.​—Apokalipse 14:6, 7.

Nsi ghù shun tse mba num nsitshàʼa; a ke ntsiaṅ yub à ghakwinta mi. A num mbe ndùse tàʼ ngakwinta tsin mbwe ngatshoʼte ntsha là, mbʼàʼ tshob à ju zʼa lèn mfà num tàʼ mèn, ke num tàʼ ju là. Ghakwinta Yaweh num nke nsoṅ njoṅ benntùn fa, ju ze bo lèn mfà num Yaweh Nsi, mba num nkàʼni mi là. (Esaya 43:10) Ndaṅndaṅ mbà ba angél là, ghakwinta ke neywimtʼo, ndù mba wù yu, lèn nunenùn mfà num Yaweh Nsi. Bo ke ndiag à mbe mba we lo, be ze taʼ nshun Nsi.