Yaweh ke nsi bam mbe tshùagkèt benntùn bagte paradisi. Ndàʼ shun Nsi bèn tswe ntùm paradisi. Là, ke zʼa nsi ghù tshùagkèt benntùn à? Num nebùnte yen bètte li, à bwô be siaṅ kuaʼ koʼ tshô Noah. A be sénni à nguʼ njù ntshàʼntshàʼ mba Noah nàʼ mbe num nsitshàʼ là. A nàʼ mbʼa tàʼ ngabwôntù mènntùn, ndù à lo ke nkagtùn num neke ngù à ju ze Nsi kô là. Là, tsemoʼ benntùn tse boa bo nàʼ mbe num tshàʼ là, nàʼ nke mfàʼ à tshukebwô. Yaweh lo yen ndùla, ntshob Noah mbʼa nsi ghù dibambaṅ lo, mbiagte nzwit njoṅ tshen tshùagkèt benntùn nà fa. A lo bèn mbe zwiagte, a tshob Noah ndù à kom tàʼ lamntàʼ sitima, sʼa nsi ywimtʼé, kà bo tunndà i kwù ntùm ntse dibambaṅ nà.​—Netoʼte 6:9-18.

Noah bo tunndà i lo kom sitima. Noah lo soṅ benntùn mbe dibambaṅ nsi lo; là, bo lo ke kùʼ ntoṅ num nejuʼu; nke nèn be nbwe ntùm neke ngù tshukebwô. Ngelaṅ ze Noah nàʼ miagte nekom sitima là, a lo tènte bà nyàm ntshag ntùm bwe, mbèn ntsho ze ntùm bwe boa tunndà i. Yen ngelaṅ nà, Yaweh lo ghù fetmbaṅ ndùb shùm; mbaṅ lo num tshàʼ ketsin, léʼ njù ṅamnkuà, mbwôgthù bo tèttsweʼ. Ntse lo dun mbiagte njoṅ dùʼ fa num nsitshàʼa.​—Netoʼte 7:7-12.

 Tshùagkèt benntùn lo bi yôg sobe, là, Noah bo tunndà i yôg. Yaweh lo kabte yub ngelaṅ ze dibambaṅ nàʼ ndo mbiagte nsitshàʼ fa là. Bo lo tum ntùm sitima ngelaṅ ze mbaṅ nàʼ ntshette, dùʼ jum nàʼ ke bèn ntèt ndô nzwit tshùagkèt benntùn. (Netoʼte 7:22, 23) Ntshob Nsi tshob mbe: Yaweh Nsi bèn seʼ moʼ yoṅ i, ntùm zebe ngelaṅ, num nebiagte nzwit tshùagkèt benntùn tse bo ke tshwèt njuʼ ntshu i là. A ke nsi biagte ben netsine. A nsi faṅ yub ndù bo tswe matmat num nsitshàʼa, ntùm paradisi.​—2 Pétro 2:5, 6, 9.

Mbeʼyàm benntùn num mfàʼ tshukebwô num sènni. Ngùtni dun num nsitshaʼa. Yaweh num ntum ghakwénta mi njoṅ ngelaṅ fa, ndù bo ke ntagte benntùn; là, mbeʼyam tshen benntùn nà keʼ kô nekùʼ ntoṅ mub njuʼ ntshob Yaweh. Bo keʼ kô nebate kuzin sobe. Bo keʼ kô nebam ju ze Yaweh tshwèt ntswite bo mfà num numebwô mba ze kebwô là. Ke zʼa tshwèt mbéb yub à? Bo nsi bate mat yub tàʼ léʼ njù ké? Mbeʼyàm netèt bo ke nsi bate mba léʼ ntshùʼ. Là ngelaṅ ze Yaweh Nsi seʼ biagte nzwit tshùagkèt benntùn, ngù ndù bo kwù matmat là tshwèt ngebte.​—Yobkwi 92:7.

Yaweh ke nsi bagte nsitshàʼa. A nsi kaṅ a tùʼ à tàʼ paradisi. Benntùn tse bo tshwèt nkaṅ sènni ntùʼ shun Nsi là, nsi tswʼà matmat num nsitshàʼa ntùm paradisi.​—Yobkwi 37:29.