Paradisi àʼ zi ke bʼa mbà yen njù li ze bag à bin be ntùm bwe là. Nsi lo ke toʼ kô à nsitshaʼ ze nghùtni mba zwentù, ngokèt mba ngeʼ dun num bwe là. Ntùm ngelaṅ zʼa tshwèt nseʼ là, Yaweh Nsi kaṅ nsitshàʼ a zi tàʼ paradisi. Paradisi àʼ zi nke nfutʼà ke lèn dùʼ à. Bag à bin juʼ ju ze Nwaʼni Nsi tshwèt ntshob mfà num bwe là:

Ben mebwô. Paradisi nsi bʼa dùʼ ntswe shun Nsi. Bo nsi ke ghù à tshumebwô mbwe tsemoʼ benntùn; bo àʼ zi nke nzin à ntùm nkàn netsin mi Nsi yàb bo là.​—Tankùt 2:21.

Jujù mayàme. Nzikuʼ ke nsi yà ntùm paradisi. Nwaʼni Nsi tshwèt ntshob ndù: “jujù nsi ghàʼ mbu num nsitshàʼa.”​—Yobkwi 72:16.

Mbwômbwô mbàʼ mba miag mfaʼ mi ntùn. Ntùm paradisi mba zit tunndà lo nsi kut ze bàʼ mbèn nke ntswe ntùm bwe. Mba zit mèn lo nsi tsiaṅte num nejù bin mbu mfàʼ mi.​—Esaya 65:21-23.

 Fite nsi be num nsitshàʼ fa miagte. Mba léʼ ntshùʼ benntùn ke nsi bèn ke zwe e, ke nebèn nke nkhwùte tshwèt ntsho lo. Ntshob Nsi tshwèt ntshob ndù: “[Yaweh] Nsi ghù ntsho tsin tà nèn nkum num ntôgnjù.”​—Yobkwi 46:8, 9.

Ntswe mebwô. Nwaʼni Nsi yàb men nkàʼni li ndù: “Sàm mèn ntùm paradisi ke nsi tshob mbe: ‘me tshwèt ngone.ʼ” (Esaya 33:24) Mba sàm nkeʼkèt, mfùmiag, ketshob, ke mbuʼntoṅ lo ke nsi bèn be.​—Esaya 35:5, 6.

Neyen ngeʼ, nejuʼ kebwô, ke nsi bèn be: mbà vùkob nsi mii. Ntshob Nsi tshwèt ntshob ndù “vù ke nsi bèn be; ke ntsenyà, ke nekuàʼa, ke yà lo ke nsi bèn be; nummbe, bà mbwe tshu yà tôge.”​—Apokalips 21:4.

Bo nsi biagte nzwit tshùagkèt benntùn. Yaweh bù yenni benntùn: “Nseʼ num ba tshùagkèt benntùn . . . bo nsi sô yub num nsitshàʼa; mbèn mbe seʼ mba ghasàʼndam nà, bo nsi tshoʼ yub num bwʼà netshoʼ ghuàʼa.”​—Tankùt 2:22.

Nzwit mènnyiaṅtu nsi ke kôni mbèn nke ngù nkuʼni netèt bo bo. Nuketsin, ngeʼ neloʼ ntèt mèn yi, gheʼte, ke nkemban lo, ke nsi bèn be. Benntùn nsi tamte ntswe ntshu ntshùʼ, mbèn nke nzin à mum nkàn netsin mi Yaweh yàb bo là.​—Esaya 26:9.