Nkide ba Grikia Benkristô num ntshob nu mbeʼ yàm ngelañ mfà num Barnaba bo ngantum Paulo. Bo naʼ bʼa ba ntshaʼfaʼ tse bo nke ntshaʼ ba ndà ntseʼde num mbwe ngelañ nà. Numke? Nummbe bo naʼ nke nywin ntù ntshùʼ num ntswe mebwô fèt tshobe benkristô. Paulo naʼ tshob ndù: “Be bèn njam ndôde fètfèt” num neyen mba bo be yi là. A naʼ bam nezin màyàm num neso kù num ba fètfèle. (Mfaʼ Ghantum 15:36) Ba ntshaʼfaʼ sènni ntùm ba ndà ntseʼde ghù à be yen nzi là.

Bo nke nseʼ à neso kù num ben. Mba zit ntshaʼfaʼ lo ghù ndà ntseʼde ghuan 20 nelôde, nke ntôg taʼ ngabnjù ntùm taʼ ndà ntseʼde, yoñ bàa ntùm ngùʼ njù. Be kuʼni nejù bin yàm njam yub zenu, mba ze nzwi yub a be ze bo na ndà là. Bo num nkagtùn nelèn njoñ benntùn fa, bônkeʼ mba ndùb ke tôde, mbèn nke nkù ntù netshag yag ntùm nàfaʼ, mba ju ghaziʼde Ñwaʼni Nsi. Bo num njwimde mba we lo ntùm ndà ntseʼde, nke njôg tsemoʼ boa Ghakwé mbwe. Bo num mfà ba ntu ntshob neso kù ndà ntseʼde, mba dùʼ mbumde ndùb.​—Mfaʼ Ghantum 15:35.

Bo num nywin num njoñ ben fa. Ba ntshaʼfaʼ be nywin num mat ze ntseʼde loʼ mbe yi num bag ywèt là. Bo num kùmde boa Ghakwé mbwe mba ba nkwébu tshobe num neyen mbefaʼ mbèn mfà ba ntag bo num mat neloʼ faʼ sub nèn yi mbwe mebwô. Bo num njwimde ba ngaʼnze neghù ntshoʼfaʼ mebwô ntùm nàfaʼ, mbèn nke ntsiañde nelèn ben nswe ntùm nenùn bo yub neloʼ nkuʼ yi num bag ywèle. Mba ba we lo netèt bo be mfà wut faʼ bo fiag wut, mbèn nke njen wul i mba taʼ “nshunfaʼ” là num zebe bin. (2 Korintô 8:23) A bwô bag bin fiʼde yub bamntù, mba yub nefà wut Nsi.​—Héber 13:7.

• Numke ba ntshaʼfaʼ nke nèn ntùm ba ndà ntseʼdʼà?

• A be o jù bin yub neseʼ à ndùke?