Yésu Kristô naʼ tshob ghaziʼde nu i ndù: “Nkaʼ zin kéʼ mbwe benntùn ndù bo yen mfaʼ min mi mebwô, ngamde Tà zin zʼa be mve kamànyam nà.” (Matio 5:16) Ndùlala, bag num mfaʼ mebwô bo tshu zenu njù mba koñnkùn nà. Yag dùʼ num koñnkùn, jw.org, bʼa dùʼ nelèn nu num ntswide bo mfaʼ Ghakwénta Yaweh Nsi. Ke ze be yen bwe à?

Mbùnde Ñwaʼni Nsi num mbètte tse benntùn num mfà là. O kuʼni nefon mbùnde tsemoʼ mbètte ndùb tse benntùn num mfà là. Mfiʼ li, ba feki Be ngeʼ zi mi ké? bo Fe ben aʼ bèn mbam ké? be num koñnkùn nà ntùm ntshob 800 ntshùade. O kuʼni nebèn mfon Traduction du monde nouveau ntùm ntshob 160 ntshùade, mba ñwaʼni neziʼde Ntshob Nsi yi, Quʼenseigne réellement la Bible ? mba ba Ndiañ Ntom bo Réveillez-vous ! O kuʼni nesiañe, njuʼu num koñnkùn ke neloʼ tsemoʼ tshu num MP3, PDF, ke EPUB lo. O kuʼni neféle tsemoʼ bag i neghabte bo mènntùn a kô Ntshob Nsi là ntùm ntshob mi. Ba netshañ be là tsʼo kuʼni neloʼ ntùm mbeʼ yàm ntshob mbu (num ba kejuʼ) là. O kuʼni neloʼ Ñwaʼni Nsi, nejuʼ tshô i, njuʼ mba bo siañ i là, mba ba mbwô nkwi nejuʼ ngelañ o kô là.

Tshô ntùn num Ghakwénta Yaweh Nsi. A num mbèn nsoñ ba nkùn nswe bo ba netshañ num sag faʼ ntùm njù sagkuà, num tshu tsʼa tshwèt ndôde Ghakwénta Yaweh Nsi bo mfaʼ mub num neywimde benntùn ntùm ngeʼ là. Bin nsi tshuàde bwe kà njen ba dùʼ mbumde ndùb, mba keki tôkàb netsiañ tshag Tèdlaʼ yi.

A tshùade ndùlala, bag nke ngù ndù nkaʼ nenùn nkéʼ tà nèn nkum num miagde nsitshaʼa. Benntùn njoñ ngô fa kà nkum Antarctique num njù bin yag koñnkùn. Bag tshwèt ndeʼde mbe “ntshob Yaweh Nsi nèn mbwe” num nsitshaʼ fa num neghamdʼé.​—2 Tésalônikà 3:1.

• jw.org nke njwimde benntùn à ndùke nelèn nenùn Ñwaʼni Nsi à?

• O kô nelôde à ke num yag dùʼ num koñnkùn à?