“Ngaʼnze,” nke mbéʼdʼà benntùn tse bo num ntshaʼ ba ntañlaʼ nswe mbèn ngaʼ manze ze tsemoʼ nsi bét là. Yésu naʼ mbʼa taʼ ngaʼnze nummbe bo naʼ tum mi num nsitshaʼ a soñ nkùn mebwô mbèn ngaʼ manze benntùn nyiañtu ndù bo yôge. (Matio 20:28) Sènni, ghaziʼde nu i tshwèt mfiʼdʼé à mba bo tshwèt njab njoñ ngelañ bo kuʼni neyab là, num netswide tsemoʼ benntùn bo tùʼ ghaziʼde nu i. (Matio 28:19, 20) Tsemoʼ be nèn mbwe, ndoʼ faʼ ngaʼnze.

Ngaʼnze bʼa taʼ mèn a tshwèt nsoñ nkùn mebwô njoñ ngelañ fa là. Njoñ Ghakwénta Yaweh Nsi fa num nsoñ nkùn mebwô. Ndaʼndù, tsemoʼ nabte yôg sube nebe ngaʼnze njoñ ngelañ fa, nke ndaʼde mbe boaʼ nke ntôg ngelañ 70 ntùm nàfaʼ num taʼ ñwù. Neghù yennà, bwoñ tshob num nséb ngelañ bo tôg ntùm sub faʼ mbab wut là. Bo num ntshoʼ tsemoʼ ndù bo faʼ mba ngaʼnze tumlam nà ntùm ba ntañlaʼ ze ghasoñ nkùn mebwô bwoñ nà. Bo be ntôg ngelañ 130 nèn mbwe ntùm nàfaʼ njoñ ñwù fa. Ba ngaʼnze num ngù tsiañde bo yôg ke fuʼ, ndèn ke magde mbe Yaweh Nsi nsi fà ju zʼa bwoñ là bo. (Matio 6:31-33; 1 Timôtio 6:6-8) Ben bo keʼ kuʼni neloʼ faʼ ngaʼnze njoñ ngelañ fa là, kuʼni neloʼ faʼ ngaʼnze mañwù a be ze bo kuʼni là, nekwiʼde sub faʼ nesoñ nkùn mebwô num ngelañ 30 ke 50 lo ntùm ñwù.

Nkôni mfà num Nsi bo benntùn bèn nke ntènde taʼ ngaʼnze. Mba Yésu là, bag tshwèt njen mbe mbeʼ yàm benntùn sènni tshwèt nkù ntù nejuʼ nenùn mfà num Nsi. (Marko 6:34) Là, ju ze bag lèn nà kuʼni neywimde yub ndonni bo ghù taʼ neta nywinde num ndùmànyam. Nkôni mfà num benntùn num ntènde taʼ ngaʼnze nenyit bu ntùm mat nefà ze ngelañ bo ze neta, num neywimde tsemoʼ bo lèn nkùn mebwô. (Matio 22:39; 1 Tésalônikà 2:8) Be miagde, ze bamntù ta, a bèn ngebte Nsi, ngù tsiañde yàme.​—Mfaʼ Ghantum 20:35.

• Be o bagde ju ze ngaʼnze be yi lʼà ndùke?

• Ke zʼa num ntènde tsemoʼ neloʼ faʼ ngaʼnze njoñ ngelañ fa à?