A be be ndù bag aʼ zin ntùm fèn ke tèt mbañ lo, bag keʼ be gha nenèn tshag ntseʼde Benkristô. Mba tà ndù bag num ngù ngùtni nzenze, mba nebot ngelañ bag fe faʼ là, numke Ghakwénta Yaweh Nsi nke nkagtùn yàme nebe ke gha tshob mbumde bo tsemoʼ fètfèl à?

A bwô num zeben ntswe mebwô. Mba a nke ntshob mfà num benntùn bag bo nke ntamde ntùm ntseʼde là, Paulo naʼ kide ndù: “Bag bin nke nywin num be, be be.” (Héber 10:24) Yennà nke mbagdʼà mbe be nke ndoʼ ngelañ “nekwade yube” mbèn nziʼde nelèn yub mebwô. Ndùlala ntshob Paulo tshwèt nso kù num ben ne nke nywin num tsemoʼo. Nelèn tsemoʼ tunndà Benkristô mebwô, nsi ghù bag bin yen mbe bo maʼ tsemoʼ ngùtni tsʼa fude tse ben nà ntshùa; ndùlala bo kuʼni neywimde ben nemaʼ ntshùa.

A num nkut koʼ shune. Benntùn bag à bo nke mbumde ntùm tshag ndà ntseʼde là, keʼ mi bʼa mba tsemoʼ là, bo bʼa koʼ shun tshage. A num mbe moʼ ngelañ bag bumde num netsiañde mbèn njù me ju. Zit bin tshen ntamde là num ndoʼ nseʼ yi à? A num ntshùade ndùlala bag nke nyàmde wut tshage, yag nkôni mbèn nta nèn mbwe. Ngelañ ngùtni tèt fèt tshag là, bag num njwimde yub bo fiag wut, nummbe bag ghù taʼ mbwô kushune. (Tànkùt 17:17) Netamde bo njoñ benntùn fa ntùm ndà ntseʼde nke ndaʼdʼà mbe fagde keʼ be netèt bag.​—1 Korintô 12:25, 26.

Bag tshwèt nso kù num o mbe o diag shun tsho netèt ben bo tshwèt ngamde Nsi là. O nsi yen lèn shun nà netèt Ghakwénta Yaweh Nsi. Netshoʼo kà bam mbe ju tshèttʼo ne nke ntamde bo bag.

• Numkʼa mbe ju mebwô ben ne nke mbumde ntùm tshag ndà ntseʼdʼà?

• O kô netoʼde neseʼ tshag ntseʼdʼà se?