O yen num netshañ ntùm yen kam buʼ ñwaʼni li mba ba Ghakwénta Yaweh Nsi be maʼ nzwe mebwô nenèn tshob ntseʼde ké? Ke zʼa ghù bag nke njen nenapte wut yag mebwô mba ju ndùb à?

Num nekuʼni yag Nsi. A nenùn mbe Nsi keʼ be lôdʼà ntshù mènntùn. (1 Samuél 16:7) Ndùla, ngelañ bag à bin num ntamde neghamdʼé là, ze ben nzi bʼa nefà nkuʼni yi mbèn mfà fèt ben. Be nke ndiag nenèn mbwe taʼ ngasaʼkame, mba bag bin aʼ napte wut ben nummbe a bʼa taʼ mèn ndùb. Be ndañdañ, zebe mat nemaʼ nzwe ngelañ ntseʼde, nke ndaʼdʼà nkuʼni be ghù mfà num Yaweh Nsi, Ngasaʼkame ze ndùb njoñ nsitshaʼ fa là, bèn ngù num dùʼ ze be num ngamdʼé bwe là.​—Netoʼde 18:25.

A num ndaʼde yag mat netswe yi. Ñwaʼni Nsi tshwèt nso kù num Benkristô ndù bo maʼ nzwe “bo mbétni, ke fà nu tuswe.” (1 Timôtio 2:9, 10). Nemaʼ nzwe “bo mbétni” nke ndaʼdʼà mbe be be nguaʼ ba nzwe tsʼa kuʼni neghù bo nke ndôde ben taʼ là, mba tse neyende, nefile, ke nediag ntsha lo. Nebe “ke fà nu tuswe” be njwimde ben netshoʼ ba nzwe tsʼa bwô là. Tshen tun ntshùʼ li tshwèt mfà manze yàm netshoʼ tse ben nzwe. Zebe mat nenapte wut mbèn ndàne, mba nemaʼ nzwe mebwô num “mbùʼde nkaʼ ntswide Ngayôg be, Nsi” mbèn mfà nkuʼni yi. (Titô 2:10; 1 Pétro 2:12) Là nemaʼ nzwe mebwô kà nèn tshag ntseʼde, num ngù bo yen yag neghamde Yaweh Nsi mebwô.

Kà nu nzwe tshèttʼo nebe ke seʼ ndà ntseʼde Nufen. Nzwe netsin keʼ bʼa netanjoñ ke nebwô taʼ lo, a bwô ndù a làn mbèn nkuʼni.

• Zebe mat nemaʼ nzwe bʼa ju ndùb ngelañ be tshwèt ngamde Nsi à numke?

• Tsit tun ntshùʼ bèn nke ntshagde yag ntùm mat netshoʼ tshag nzwe bo nenapte wut yag à?