Mba vù se nke ngepte là, Yésu swade ntshob boa ghaziʼde nu i tse kuà ntùm tsham​—Pétro, Yakobo, Yohané, mba Andréa. Mba Yésu naʼ nke ntshob num nkeki miagde léʼnjù là, a bùʼ taʼ bètte ndùb mbe: “A zit ngafaʼ ze nenùne, mbèn mbe ngazede, ze be tàfaʼ fañ ba ndà i yi ndù a ke mfà jujù bo ngelañ i à?” (Matio 24:3, 45; Marko 13:3, 4) Yésu naʼ nke nso ntù ghaziʼde nu i mbe mba yub tàfaʼ là, a nsi tshoʼ ben tse bo nke mfà jujù ywèt Benkristô ntùm miagde léʼnjù là. Ngafaʼ là bʼa we?

A bʼa taʼ kum nkamwut ghaziʼde nu Yésu. Yen ngafaʼ li bʼa Tu Ntseʼde Ghakwénta Yaweh Nsi. A num mfà jujù ywèt ghafaʼ Yaweh Nsi num ngelañ ntùn. Be nke njéʼdʼà num i kà ngù jujù ywèle “njoñ ze [be] kô là ngelañ i.”​—Lukas 12:42.

A be ntshagde ghafaʼ Nsi. (1 Timôtio 3:15) Yésu naʼ fà lèt ndùb yen ngafaʼ là netshagde bag Ntseʼde Yaweh Nsi num nsitshaʼa​—nelôde tse tshu nkàb, ntshagde faʼ nesoñ nkùn mebwô, ntswide ben ntshùade njam ndà ntseʼde. Ndùlala, nefà ju a bwoñ ben nà ngelañ ntùn, “ngafaʼ ze nenùne mbèn mbe ngazede” be mfà jujù ywèle ntshùade njam ba nkide be nke mfaʼ yi nàfaʼ là, mba ba ntseʼde boa mbumde ndùb.

Yen ngafaʼ là lat num nenùn Ñwaʼni Nsi, mba num se faʼ nesoñ nkùn mebwô; a bèn nzede num mat zʼa tshwèt ndoʼ ndôde fuʼ Kristô yi num nsitshaʼ là. (Mfaʼ Ghantum 10:42) Yaweh Nsi tshwèt nañ mbotni num faʼ se bo jujù ywèt yàme mbèn ngù ghafaʼ nke nkwiʼde.​—Esaya 60:22; 65:13.

• We ze Yésu naʼ ntshoʼ mbe a nke mfà jujù ywèt ghazide nu i à?

• Ngafaʼ be ze nenùne mbèn mbe ngazede à ndùke?