Ñ. Nsi tshwèt nywin num ghafaʼ tse tse bo tshwèt ngon nà. Ñwaʼni Nsi tshob mfà num taʼ ngafaʼ Nsi mbe: “[Yaweh Nsi] be ntomdʼé num kunndà ngeʼ.” (Yobkwi 41:3) A be zʼo ghù taʼ neta ngokèt là, tshen tshu tat li kuʼni neywimdʼo:

1.   Leʼde Nsi a fà neta wù nefènde. “Fide Nsi zʼa tshùa njoñ zenu fa là nsi béb ntù [o],” njwimdʼo nenya ke bèn nywin neshu, mbèn ntomdʼo.​​—Filipi 4:6, 7.

2.   Ghù mbwô nkwade. Ñwaʼni Nsi mbe: “Ntù zʼa num ntsiañde là bʼa taʼ fu ntùn, là ywèt tse nyuʼ vù bwe là be njumde mvôge.” (Tànkùt 17:22) Dùʼ mat ne nke nkom zwi, yennà aʼ ywimdʼo ngelañ kebwô, mbèn njwimdʼo num yu ntswe mebwô.

3.   Ghù taʼ nywinde zʼa ta là mfà num ndùmànyam. Taʼ nywinde ntùn kuʼni neywimdʼo o ghù tsiañde mba tà ndù o ghù taʼ neta ngokèt. (Roma 12:12) Ñwaʼni Nsi tshwèt ntshob mfà num taʼ ngelañ ze “sàm [mèn] ke nsi tshob mbʼa tshwèt ngon” nà. (Esaya 33:24) Nsi nsi yade njoñ ba neta ngokèt fa tsʼa sag ghatshwén neyade là. Mba mfiʼ là, Ñwaʼni Nsi tshwèt nsoñ mba benntùn bo tènde ntùm nguʼnjù là nsi bèn ngù yub neta léʼnshum nà. A mbe: “mbàb wul i bèn mbotte ntshùa ndùsʼa be ménfi là. A bèn ntùʼ ménnshum mbʼa naʼ mbe là.”​​—Yob 33:25.

 Kwimde mbe: Mba tà ndù ghakwénta Yaweh Nsi num mbètte ywimde Nsi ngelañ bo tshwèt ngon nà, bo num mbèn nèn ndàtshwén. (Marko 2:17) Là, bag keʼ be tènde mènntùn a bam taʼ mat netshwén wul i yi, mba we lo bèn ngù neloʼ mfiʼ num ze ntswe mebwô.