WAHN EKSPLANAYSHAN A WAHN BAIBL VERS

Genesis 1:1—“Eena di Biginin Gaad Mi Mek di Hevn ahn di Ert”

PLAY

“Eena di biginin Gaad mi mek di hevn ahn di ert.”—Genesis 1:1, Di Hoali Baibl—Nyoo Werl Chranslayshan.

“Eena di biginin Gaad mi kriyayt di hevn ahn di ert.”—Genesis 1:1, King James Version.

Weh Genesis 1:1 Meen

Dis fos akonk eena di Baibl tel wi too impoatant tingz. Fers, wi laan di “hevn ahn di ert,” er di fizikal yoonivers, mi ga wahn biginin. Sekant, wi laan dat da Gaad kriyayt dehn.—Revilayshan 4:11.

Di Baibl noh tel wi how lang agoa Gaad mi kriyayt di yoonivers, an ih noh eksplayn how Gaad mi kriyayt it. Bot ih tel wi dat hihn mi kriyayt di yoonivers wid fi hihn “enerji an ih grayt powa.”—Isaiah 40:26.

Di werd “kriyayt” geh chranslayt fahn wahn Heebroo verb weh onli yooz fi diskraib sohnting weh Gaad du. * Di Baibl onli rifaa tu Jehoava * Gaad az di Kriyayta.—Isaiah 42:5; 45:18.

Sohn Bakgrong Infamayshan Bowt Genesis 1:1

Di Baibl staat tu taak bowt kriyayshan eena Genesis chapta 1 ahn 2. Fahn Genesis 1:1 tu 2:4, di Baibl diskraib di tingz weh Gaad mi du wen ih mi kriyayt di ert an evriting weh liv pan it, ahn dat inklood di fers man ahn uman. Afta dat, di Baibl giv moa deetaylz bowt di kriyayshan a man ahn uman.—Genesis 2:7-25.

Genesis seh dat Gaad mi kriyayt evriting eena siks “dayz.” Wi noh noa egzakli how lang dehnya dayz mi laas, bot da neva 24 owaz, kaaz sohntaim wi yooz di werd “day” fi meen wahn lent a taim weh da noh 24 owaz. Fi egzampl, da Genesis 2:4 ih yooz di werd “day” ahn di werd “taim” fi meen di sayhn ting. Ahn dis vers rifaa tu dehndeh siks dayz az wan “day” a kriyayshan.

Sohn Rang Aidyaaz Bowt Genesis 1:1

Rang Aidyaa: Gaad mi kriyayt di yoonivers jos wahn fyoo towzn yaaz agoa.

Fak: Di Baibl noh tel wi wen Gaad mi kriyayt di yoonivers. Genesis 1:1 agree wid weh saiyentis bileev tudeh, dat di yoonivers bilyanz a yaaz oal. *

Rang Aidyaa: Som peepl tink dat Genesis 1:1 di seh dat Gaad da wahn Chriniti bikaaz di plooral faam a di Heebroo werd fi “Gaad” geh yooz eena dis vers.

Fak: Di plooral faam a di taitl “Gaad” eena Heebroo da ’Elo·himʹ, weh shoa Gaad hai pozishan, noh dat Gaad da moa dan wan persn. Di New Catholic Encyclopedia seh dat di way how di plooral faam a ’Elo·himʹ geh yooz da Genesis 1:1 da di sayhn way how wahn king bak den wuda mi rifaa tu ihself az “wee.” Soh eena dis kays, di plooral faam a ’Elo·himʹ noh di shoa dat Gaad da moa dan wan persn, ih di shoa how grayt Gaad grayt.—Second Edition, Valyum 6, payj 272.

Reed Genesis chapta 1 lang wid di futnoat dehn, di kraas refrens dehn, ahn di picha dehn.

^ par. 5 Di HCSB Study Bible seh: “Di aktiv faam a di Heebroo werd bara’, weh meenz ‘fi kriyayt,’ neva geh yooz fi diskraib sohnting weh wahn hyooman ku du. Soh bara’ di rifaa tu werk weh onli Gaad ku du.”—Payj 7.

^ par. 5 Jehoava da Gaad persnal naym.—Psalm 83:18.

^ par. 9 The Expositor’s Bible Commentary seh dat di Heebroo term weh meen “eena di biginin,” noh help wi fi noa how lang da lent a taim mi laas.—Revised Edition, Valyum I, payj 51.