“Noh wori bowt di neks day, kaaz di neks day wahn gat ih oan woriz. Di chroblz weh yu gat fi tudeh, inof fi tudeh.”—Machyu 6:34, Di Hoali Baibl—Nyoo Werl Chranslayshan.

“Soh noh wori bowt tumaaro; mek tumaaro wori bowt ihself. Di chrobl weh yu ga tudeh, nof fi tudeh.”—Machyu 6:34.

Jeezas da di wan weh mi seh dehnya werdz. Hihn mi komfert dehn wan weh mi lisn tu ahn an mek dehn noa dat dehn noh need fi wori tu moch bowt prablemz weh dehn mait fays eena di fyoocha. Insted, dehn wuda benifit if dehn deel wid dehn prablemz wan day at a taim.

Jeezas neva meen dat wi shudn tink bowt tumaaro er dat wi shudn plan fi di fyoocha. (Proverbs 21:5) Rada, hihn mi-di help wi noh fi wori tu moch bowt wat kud hapm tumaaro. If wi wori tu moch bowt dehndeh tingz, wi ku looz wi jai an ih ku kaaz wi fi looz foakos pahn di tingz weh wi akchwali need fi geh don. If wi wori bowt sohnting weh noh eevn hapm yet, dat noh du notn fi fiks di prablem. Ahn wahn lata taim, di tingz weh wi wori bowt noh eevn hapm eniway, an if dehn doo hapm, dehn noh az bad az weh wi mi tink.

Dehnya da som a di tingz weh Jeezas mi taak bowt pan ih faymos Sermon pahn di Mongtinsaid, weh wi ku reed bowt eena Machyu chapta 5-7. Eena ih Sermon pahn di Mongtinsaid, Jeezas mi eksplayn dat woriz noh wahn mek wi liv wahn langa ahn hapiya laif. (Machyu 6:27) Hihn mi aalso seh dat wen wi put Gaad fers eena wi laif, wi noh ga no reezn fi wori tu moch bowt tumaaro. Gaad tek kayr a di plaants ahn di animal dehn, ahn fi shoar ih wahn tek kayr a dehn wan weh serv hihn.—Machyu 6:25, 26, 28-33.