Soona er layta, yu chiljren wahn fays sohn taip a faylya er disapointment eena dehn laif. How yu ku help dehn fi get oava di disapointment?

•  Weh yu shuda noa

•  Weh yu ku du

 Faylya da paat a laif. Di Baibl seh dat “aala wi slip dong eena difrent kaina way evri now ahn agen.” (Jaymz 3:2) Chiljren slip dong tu. Bot, faylya ku bee wahn gud ting tu, bikaaz ih help chiljren fi laan how fi get chroo tof sichuwayshanz. Chiljren noh baan wid dis abiliti, bot da sohnting weh dehn ku divelop. Wahn ma weh naym Laura seh: “Mee ahn mi hozban mi noatis dat ih beta wen chiljren laan fi deel wid faylya insteda ak laik ih neva hapm. Dehn ku laan how fi bayr op wen tingz noh goh di way dehn mi ekspek.”

 Wahn lata chiljren noh noa how fi deel wid faylya. Sohn chiljren noh laan fi deel wid dehn faylya bikaaz dehn payrents mek dehn feel laik if dehn neva du notn rang. Fi egzampl, rait away sohn payrents blaym di teecha if dehn chail fayl wahn tes da skool. If dehn chail get eena wahn kwaaril wid wan a ih fren, rait away di payrents blaym di fren.

 Bot how chiljren kuda eva laan fi oan op tu dehn mistayks ahn den du sohnting fi fiks di prablem if dehn payrents protek dehn fahn di bad rizolts a dehn akshanz?

•   Teech yu chiljren dat evriting dehn du ga rizolts.

   Di Baibl seh: “Eniting weh yu soa, yu wahn reep.”—Galayshanz 6:7.

   Evriting weh wi du ga rizolts. Wen wi damij sohnting, it kaas sohnting fi fiks it. Wen wi mek wahn mistayk ih ku ga bad rizolts. Chiljren need fi laan dis prinsipl; evriting wi du kaaz sohnting els fi hapm. Dehn need fi andastan dat dehn play wahn paat eena eniting weh hapm; dehn rispansabl. Soh, noh blaym adaz fi di mistayk dehn weh yu chiljren mek er chrai fi mek ekskyoos fi yu chiljren. Insted, mek dehn reep di rizolts a dehn akshanz. Af koars, di chail fi aalso aybl fi si klyaa-wan dat fi dehn rang akshanz kaaz di rizolts.

•   Help yu chiljren fi fain solooshanz.

   Baibl prinsipl: “Di raichos wan mait faal dong sevn taimz, bot fi shoar ih wahn get op agen.”—Proverbs 24:16.

   Wi mait feel reeli sad wen wi fayl, bot da noh di en a di werl. Help yu chiljren fi tink bowt weh dehn ku du fi noh fayl neks taim insteda komplayn bowt wai weh mi hapm neva fyaa. Fi egzampl, if yu son fayl wahn tes da skool, help ahn fi andastan how ih ku chaynj di sichuwayshan if ih stodi haada ahn mek op in main fi du beta neks taim. (Proverbs 20:4) If yu daata get eena wahn aagyument wid wan a ih fren, help yu daata fi andastan how shee ku seh sari ahn mek di sichuwayshan beta, eevn if da neva shee kaaz di aagyument.—Roamanz 12:18; 2 Timoti 2:24.

•   Teech yu chiljren fi bee hombl.

   Baibl prinsipl: “Ah di tel evri wan a unu dat unu mosn geh swel-hed ahn tink seh unu da sohnting wen unu da noh notn.”—Roamanz 12:3.

   If yu tel yu chail dat hihn er shee ku du sohnting beta dan enibadi els, yu noh di help ahn fi bee hombl. Aftaraal, eevn chiljren weh du reeli gud da skool noh wahn geh wahn perfek grayd aal di taim. Ahn chiljren weh reeli gud at spoats noh wahn win aal di taim. Chiljren weh hombl ku akchwali deel wid faylya ahn disapointment beta.

   Di Baibl seh dat woriz ku mek wi schranga ahn ku help wi fi bayr op wen tingz noh goh gud. (Jaymz 1:2-4) Soh aldoa faylya ku mek yu chail feel dong, help ahn noh fi geh tu disapointid bikaaz a weh hapm.

   If yu waahn teech yu chiljren how fi get bak op wen dehn fayl, ih wahn tek taim an efoat, jos laik eni ada skil enna laif. Bot ih wahn help dehn fi bihayv beta wen dehn groa op ahn fays prablemz. Di buk Letting Go With Love and Confidence seh: “Yoots weh noa how fi deel wid dehn prablemz les laikli fi du sohnting foolish. Dehn moa laikli fi du reeli gud wen dehn fays sohnting nyoo er sohnting weh dehn neva di ekspek fi hapm.” Af koars, if dehn ku get oava tof sichuwayshanz now, ih wahn aalso help dehn wen dehn groa op.

 Tip: Set di egzampl. Memba dat di way yoo deel wid disapointment eena yu laif wahn chrayn yu chiljren how fi deel wid fi dehn disapointment.