HELP FI DI FAMILI | MARIJ
How fi Ga Payshens
“Wahn hozban ahn waif payshens, geh tes evriday. If yu singl, yu noh mait tink dat fi ga payshens da sohnting impoatant. Bot fi ga sokses eena yu marij yu haftu ga payshens.”—Jan.
Wai yu need fi ga payshens?
Wen yu marid yu get fi noa yu marij paadna gud gud ahn dat ku mek yu staat tu foakos pan dehn mistayk.
“Afta yu marid fi sohn taim, ih eezi fi mek yu staat foakos pahn di tingz weh bada yu bowt yu marij paadna. Wen yu staat tu tink negitiv laik dat, ih ku mek yu staat tu looz payshens wid ahn.”—Jessena.
If yu noh ga payshens, sohntaim yu mait taak widowt tink.
“Ai da wahn persn weh noh frayd fi seh how Ah di feel, ahn sohntaim Ah seh tingz weh Ah shudn seh. If Ah mi ga moa payshens, Ah wuda ga moa taim fi tink bowt weh Ah waahn seh ahn disaid dat Ah noh reeli haftu seh notn.”—Carmen.
Di Baibl seh dat “wen yu lov ada peepl, unu wahn bayr payshens wid dehn. Unu wahn kain tu dehn.” (1 Korintyanz 13:4) Ih mek wahn lata sens dat too peepl weh lov eech ada wahn bee payshent wid wan anada. Bot dat noh aalwayz hapm. Jan, weh wi menshan erliya, seh: “Jos laik eni gud kwaliti, ih eeziya fi looz payshens dan fi ga payshens. Ih tek wahn lata werk fi bee moa payshent.”
How yu ku shoa adaz dat yu ga payshens?
Wen sohnting weh yu neva ekspek hapm, ih haad fi mek yu bee payshent.
Egzampl: Yu marij paadna seh sohnting tu yu weh noh kain. Yu nachral dizaiya da fi ansa dehn bak saym way.
Baibl prinsipl: “Noh bee kwik fi geh ofendid, kaa di wan weh kwik fi geh ofendid da di maak a wahn fool.”—Ecclesiastes 7:9, futnoat.
How fi ga payshens: Stap ahn tink. Bifoa yu ansa, tel yuself dat weh yu marij paadna mi tel yu da neva fi hert yu feelinz. Di buk Fighting for Your Marriage seh, “Moas a wi jos ansa weh wee tink wi marij paadna seh insteda weh ih akchwali seh.”
Eevn if yu marij paadna du er seh sohnting fi get yu beks, yu ku mek di sichuwayshan beta if yu ga payshens ahn noh chreet dehn di saym way how dehn chreet yoo. Di Baibl seh, “If no faiya wud deh, di faiya wahn owt.”—Proverbs 26:20.
“If yu staat tu feel laik yu waif da yu enimi, stap ahn tink bowt wai yu lov ahn, an chrai fi du sohnting nais far ahn rait away.”—Ethan.
Tink bowt dis:
Weh yoo du er seh wen yu marij paadna seh er du sohnting weh noh kain?
Di neks taim ih hapm, how yu ku ga moa payshens wid ahn?
Wen yu marij paadna du sohnting weh get pahn yu nervz oava an oava.
Egzampl: Yu marij paadna aalwayz layt, ahn di langa yu haftu wayt far ahn di moa beks yu geh.
Baibl prinsipl: “Aalwayz bayr wid wan anada, ahn if enibadi du unu eniting, fagiv dehn; jos laik how di Laad mi fagiv unu, rait soh unu mos fagiv wan anada.”—Koloashanz 3:13.
How fi shoa payshens: Chrai fi mek yu marij bee moa impoatant dan eniting weh yoo yuself need. Aks yuself, ‘If Ai geh beks bowt dis sichuwayshan er kwaaril wid mai marij paadna bowt it, Ai wahn mek wi rilayshanship geh beta er Ai wahn mek ih geh wers?’ Yu aalso haftu memba dat “wi slip dong eena difrent kaina way evri now ahn agen.” (Jaymz 3:2) Dis meen dat yoo ga sohnting fi werk pan tu.
“Sohntaim Ah ga moa payshens wid wahn fren dan wid mi hozban. Ah tink da bikaaz Ah spen moa taim wid mi hozban an Ah si evri lee mistayk weh ih mek. Bot if Ah payshent, Ah di shoa dat Ah lov ahn rispek mi marij paadna. Ahn dat da sohnting weh wi need eena wi marij.”—Nia.
Tink bowt dis:
Yu shoa dat yu ga payshens wid yu marij paadna wen ih mek mistayk?
How yu ku shoa moa payshens wid yu marij paadna eena di fyoocha?