•  Weh yu shuda noa

•  Weh yu ku du

•  Weh payrents ga fi seh

 Eena sohn kolcha tudeh, pikni kloas tu dehn payrents ahn dehn luk tu dehn payrents fi gaidans. Eena sohn ada kolcha, pikni laik goh tu dehn frenz fi gaidans.

 Wen chiljren luk tu dehn frenz fi gaidans, ih mek dehn noh rispek dehn payrents gaidans az moch. Az a mata a fak, bai di taim chiljren laik dat ton teenayja, dehn payrents mait feel laik dehn chiljren noh pay no main tu weh dehn tink er seh. Bot dat da noh no sopraiz! Wen chiljren spen soh moch taim wid ada chiljren, da laik dehn di rayz wan anada insteda dehn payrents di rayz dehn.

 Wai chiljren fain it eeziya fi bee kloas fren wid ada chiljren rong dehn oan ayj, insteda bee kloas wid dehn payrents? Kansida dehnya reezn:

•   Skool. Wen chiljren spen moas a dehn taim wid ada chiljren, dehn geh kloas wid dehn ahn kay moa bowt weh dehn fren dehn tink er seh dan weh dehn payrents tink. Da atichood ku geh eevn schranga wen dehn ton teenayja.

•   Les taim tugeda. Eena lata famili, chiljren kohn hoam fahn skool ahn dehn payrents noh dehdeh, maybi bikaaz dehn stil deh da werk.

•   Teenayj kolcha. Bai di taim pikni ton teenayja, dehn don di tink bowt how dehn ku fit een wid di res a yong peepl. Da way a tinkin inkorij dehn fi jres, taak, an ak laik how moas teenayja bihayv. Weh ada teenayja tink bowt dehn yoozhwali moa impoatant tu dehn dan weh dehn payrents tink bowt dehn.

•   Advataizment. Lata bizniz mek entataynment an ada tingz jos fi yong peepl ahn noh fi adolts. Dat jos mek it haada fi payrents ahn dehn teenayj chiljren andastan eech ada. Dr. Robert Epstein, wahn dakta a psychology rait, “If teenayj kolcha wuda disapyaa, wahn lata big bizniz wuda kloaz dong.” a

•   Kip yu rilayshanship wid yu chiljren schrang.

   Di Baibl seh: “Dehnya werdz weh Ah di koman yu tudeh need fi deh eena yu haat, ahn yu need fi teech dehn tu yu chiljren oava ahn oava, ahn taak bowt dehn wen yu di sidong eena yu hows ahn wen yu di waak pahn di road ahn wen yu di lidong ahn wen yu get op.”—Deuteronomy 6:6, 7.

   Ih gud dat yu chiljren ga frenz, bot dehn frenz shuda neva tek oava fi yoo roal az dehn payrents. Dis da di gud nyooz: Sohn ekspert seh dat moas pikni ahn teenayja rispek dehn payrents ahn waahn pleez dehn. If yu kip wahn kloas rilayshanship wid yu chiljren, weh yoo tink wahn bee moa impoatant tu dehn dan weh dehn frenz tink.

   “Yu haftu spen taim wid chiljren di du tingz tugeda, laik kuk, kleen, an eevn hoamwerk. Du fon tingz tugeda—play gaym, wach moovi er TV. Noh tink dat aal yu need da wahn lee bit a ‘kwaliti taim’ now an agen. Yu haftu spen lata taim wid yu chiljren fi mek unu ga wahn kloas rilayshanship!”—Lorraine.

•   Mek shoar yu chiljren noh mek frenz onli wid adaz rong dehn oan ayj.

   Di Baibl seh: “Foolishnis deh deep dong eena wahn pikni haat.”—Proverbs 22:15, futnoat.

   Som payrents hapi fi si dehn pikni ga lata frenz. Bot eevn doa ih luk laik wahn pikni ga lata frenz, ih need fi ga frenz fahn aal difrent ayj fi help ahn machoar. Frenz weh da di saym ayj kyaahn gi dehn di gaidans ahn dairekshan weh dehn need eena dehn laif. Wahn yong persn need gaidans ahn dairekshan fahn payrents weh lov dehn.

   “If yu chiljren ga frenz rong dehn oan ayj, dehn ku shayr weh dehn noa. Bot dehn noh ga di skilz, ekspeeryens, ahn wizdom fi help ada yong peepl mek gud disizhanz. Wen yong peepl luk tu dehn payrents, dehn groa ahn machoar akaadn tu dehn ayj.”—Nadia.

•   Gi dehn waiz gaidans.

   Di Baibl seh: “Di persn weh di waak wid waiz peepl wahn geh waiz.”—Proverbs 13:20.

   Eevn az yu chiljren kantinyu fi groa op, dehn ku benifit wahn lat wen dehn spen taim wid yu. Bee wahn gud egzampl fi dehn.

   “Di moas impoatant egzampl fi chiljren da dehn payrents. Wen chiljren laan fi lov ahn rispek dehn payrents, dehn wahn waahn groa op fi bee laik dehn.”—Katherine.