Imajin yu pikni tel yu dat wahn buli di chaans ahn da skool. Weh yu ku du fi help yu pikni? Goh da skool ahn tel di prinsipal fi lash husoeva di chaans yu pikni? Teech ahn how fi fait di buli? Bifoa yu du eniting, ih wuda gud fi luk oava sohn faks.

•  Weh Ah need fi noa bowt wahn buli?

•  Weh Ah ku du fi help mi pikni?

 Weh ih meen fi bee wahn buli? Wahn buli da sombadi weh chaans adaz eena wahn fizikal er imoashanal way. Ih du it fi spait, an ih du it oava ahn oava. Soh noh evri singl taim sombadi insolt yu pikni er chreet dehn bad dat meen di persn da wahn buli.

 Ih impoatant fi noa weh ih meen fi bee wahn buli. Sohn peepl kwik fi kaal adaz wahn buli fi eni lee ting weh get dehn opset, noh mata how smaal di prablem. Bot if yu mek smaal tingz ton intu wahn big prablem, widowt yu noa it, yu di teech yu pikni dat dehn kyaahn werk owt dehn oan prablemz. Bot dis da wahn skil weh dehn need now ahn wen dehn geh oalda.

 Baibl prinsipl: “Noh kwik fi tek ofens.”​—Ecclesiastes 7:9.

 Di batam lain: Eena sohn sichuwayshan, yu wahn need fi tek akshan fi yu pikni. Ahn eena ada sichuwayshan, ih mait bee wahn apachooniti fi help yu pikni noh fi bee tin skin ahn fi laan di skilz weh dehn need fi deel wid ada peepl.—Koloashanz 3:​13.

 Bot wat if yu pikni tel yu dat sohnbadi di chaans ahn er haraas ahn eena wahn fizikal er imoashanal way? Wat if ih tel yu di persn du it fi spait ahn dat ih di hapm oava ahn oava?

•   Bee payshent ahn lisn tu yu pikni. Chrai figa owt (1) da wat di hapm ahn (2) wai dehn di chaans yu pikni. Tek taim fi egzamin aala di faks ahn den yu wahn ku mek wahn beta disizhan. Fi egzampl, yu ku aks yuself, ‘Dehn ga wahn neks said tu dis stoari?’ Fi help yu get di kompleet picha, yu mait need fi taak tu yu pikni skool teecha er di payrents a di pikni weh yu tink di chaans fi yoo pikni.

   Baibl prinsipl: “Da wahn foolish ting wen sohnbadi ansa bak tu wahn mata bifoa ih hyaa di faks.”​—Proverbs 18:13.

•   If sombadi di chaans yu pikni, help yu chail fi andastan dat di way ih rispan ku eeda mek tingz geh beta er wers. Fi egzampl, di Baibl seh: “Wahn jentl ansa ku ton weh anga, bot wahn rof ansa ster op anga.” (Proverbs 15:1) Soh wen yu tink bowt it, if yu pikni fait bak, di buli mait chaans ahn eevn moa.

   Baibl prinsipl: “If sohnbadi du unu sohnting bad, unu noh fi du sohnting bad bak tu dehn. Ahn if sohnbadi insolt unu, yu noh fi insolt dehn bak agen.”​—1 Peeta 3:9.

•   Eksplayn tu yu pikni dat if ih noh fait bak, dat noh meen dat ih week. Insteda dat, ih meen dat ih schranga dan di buli, bikaaz ih noh mek di buli kanchroal ahn. Eena dis way, da jos laik ih di beet di buli, bot widowt bee wahn buli tu.

   Ih veri impoatant dat yu pikni memba dis, espeshali if di buli chretn ahn chroo teks mesij er soashal meedya. If yu pikni chrai fait bak di saym way, den da jos laik ih di giv di buli permishan fi kantinyu. In fak, yu pikni ku een op di bee wahn buli tu! Sayka dat, sohntaim ih beta fi chrai stay kaam ahn noh rispan du di buli​—dis ku help yu pikni fi ga moa kanchroal oava di sichuwayshan.

   Baibl prinsipl: “If no wud deh, di faiya wahn owt.”​—Proverbs 26:20.

•   Eena sohn sichuwayshan, yu pikni ku chrai kip weh fahn peepl weh ku chaans ahn. Fi egzampl, if yu pikni noa weh di buli ahn ih frenz heng owt, den ih ku chrai kip weh fahn chrobl ahn waak chroo wahn difrent ayrya.

   Baibl prinsipl: “Di waiz persn wahn si di daynja ahn haid ihself, bot di persn weh noh ga ekspeeryens noh stap, an soh ih sofa fi ih mistayk.”​—Proverbs 22:3.

 CHRAI DIS: Help yu pikni fi tek di taim fi tink bowt di rizolts a ih disizhan, wateva ih chooz fi du. Fi egzampl:

•  Weh mait hapm if ih noh pay no main tu di buli?

•  Weh wuda hapm if ih stan op tu di buli ahn tel ahn fi stap?

•  Weh wuda hapm if ih tel di prinsipal bowt di buli?

•  Weh wuda hapm if ih jos chrai bee moa frenli wid di buli er laaf it aaf wid wahn lee joak?

 Weda wahn buli di chaans yu pikni fays tu fays er chretn ahn bai teks mesij er soashal meedya, memba eech sichuwayshan difrent. Soh werk wid yu pikni fi fain wahn solooshan weh mek sens. Mek yu pikni noa dat yu wahn dehdeh fi help dehn get chroo di sichuwayshan.

 Baibl prinsipl: “Wahn chroo chroo fren shoa lov aala di taim, ih da wahn brada weh baan fi wen taimz haad.”​—Proverbs 17:17.