Wahn lata hozban ahn waif fain dat dehn noh taak tu eech ada moch eevn wen dehn deh tugeda. Wai?

•  Wai lata marid koplz feel laik dehn noh reeli di spen taim wid eech ada eevn wen dehn deh tugeda?

•  Weh yoo ku du?

•  Tingz weh marid peepl seh

•  Tingz unu ku taak bowt

•   Wi tu taiyad

   “Wen wi need fi spen taim tugeda, eeda Ai taiyad er hihn taiyad. Wen Ai taiyad, eni lee ting bada mi. Soh ih beta fi mek wi wach TV.”—Anna.

•   Wi ilekchranik divais dischrak wi

   “Soashal meedya an onlain entataynment tek op wahn lata taim. Ih eezi fi spen owaz pahn yu divais ahn noh taak tu yu hozban er waif. Da laik yu nat eevn deh eena di saym room.”—Katherine.

•   Wi injai difrent tingz

   “Afta mai hozban kohn hoam fahn werk, hihn spen wahn lata taim di du ih oan ting. Ah noa hihn werk haad, soh Ah tink hihn dizerv fi geh sohn taim tu ihself. Bot Ai wish wi kuda spen moa taim tugeda.”—Jane.

•   Wi werk tu moch

   “Bikaaz wi ku werk pahn wi divais, ih eezi fi mek wi kantinyu werk eevn wen wi deh wid wi famili. Lata taimz Ah fain miself di ansa teks mesij an eemayl fi werk wen Ah ku di spen taim wid mi waif.”—Mark.

•   Ih impoatant fi mek yu spen taim wid yu hozban er waif, ahn noh see’t az sohnting weh yu onli ku du wen yu ga taim.

   Baibl prinsipl: “Mek shoar a di moa impoatant tingz.”—Filipiyanz 1:10.

   Aks yuself: Di tingz weh Ai du proov dat mai marij moa impoatant dan werk er eniting els? Ai spen taim wid mi hozban er waif onli wen Ah noh ga notn els fi du?

   Sohnting weh yoo ku du: Mek taim fi bee tugeda wid yu marij mayt ahn noh mek notn dischrak unu.

   “Ai lov wen mi hozban mek planz fi mek di too a wi du tingz tugeda. Dat mek Ah feel speshal an ih shoa dat hihn waahn spen taim wid mi. Dat mek Ah lov ahn eevn moa.”—Anna.

•   Laan fi ignoar yu ilekchranik divais dehn.

   Baibl prinsipl: “Fi evriting dehn ga wahn apointid taim.”—Ecclesiastes 3:1.

   Aks yuself: Ai alow eemayl er teks mesij fi dischrak mi wen Ah di spen taim wid mi marij mayt?

   Sohnting weh yoo ku du: Chrai eet tugeda at lees wan taim fi di day, ahn lef unu foan eena wahn nada room. Wen unu eet tugeda, dat gi unu wahn chaans fi taak bowt how unu day mi gaahn.

•   Chrai mek it unu goal fi du hows werk an ada tingz tugeda.

   Baibl prinsipl: “Too beta dan wan kaaz dehn ku ga wahn gud riwaad fi dehn haad werk.”—Ecclesiastes 4:9.

   Aks Yuself: Mee er mi marij mayt aalwayz goh du tingz bai wiself?

   Sohnting weh yoo ku du: Werk tugeda ahn help eech ada eevn wen ih noh need too peepl fi du it.

   “Wen unu need fi du tingz laik wash op, yaad werk, laanjri, ahn shapin, chrai see’t az wahn apachooniti fi spen taim tugeda insteda jos see’t az werk.”—Nina.

•    Set goalz weh unu ku reech

   Baibl prinsipl: “Evribadi fi si dat unu noh aalwayz waahn unu oan way.”—Filipiyanz 4:5.

   Aks Yuself: How Ai ku bee reeznabl ahn noh ekspek tu moch fahn mi marij mayt?

   Sohnting weh yoo ku du: Taak tu eech ada soh dat unu ku andastan weh eech ada need. Chrai mek wahn disizhan weh too a unu hapi wid ahn sopoat eech ada.

   “Mai hozban ga lata enerji, an Ai aalwayz taiyad bikaaz Ah sik. Ah wuda inkorij mi hozban fi goh owtsaid ahn ga fon, an Ah tel ahn dat Ah wahn si ahn wen ih kohn bak. Ah wuda stay hoam fi res op wail hihn geh di eksasaiz weh ih need. Dis mek too a wi feel beta bikaaz wi geh fi du weh wi need fi du.”—Daniela.

 Unu ku aks unuself dehnya kweschan wen unu deh bai unuself. Den unu ku kohn tugeda fi taak bowt unu ansaz.

•    Ai di spen inof taim wid mi marij mayt rait now?

•   Ai komen mi marij mayt wen ih mek planz fi spen taim wid mi?

•   Weh Ai wuda waahn mi marij mayt fi werk pan?

•   Ai aalwayz deh pahn mi foan wen mi marij mayt di taak tu mi?

•   How too a wee ku ga wahn balans vyoo pahn weh wi ekspek fahn eech ada?

•   Weh wee ku du dis week fi spen moa taim wid wan anada?