Wahn pa weh naym Alexander seh: “Di fos taim wi mi taak bowt alkohol wid wi lee daata, shee mi onli siks yaaz oal. Wi mi shak fi fain owt dat shee mi noa wahn lat moa dan weh wi mi ekspek.”

•  Weh yu fi noa

•  Weh yu ku du

•  Weh di Baibl seh bowt alkohol

 Ih impoatant fi taak tu yu chiljren bowt alkohol. Noh wayt til yu pikni da wahn teenayja. Wahn pa fahn Russia, weh naym Khamit, seh: “Ah wish wi mi taak tu wi son bowt alkohol fahn wahn yong ayj. Ah mi laan dis impoatant lesn di haad way. Ah fain owt dat mi son mi-di jrink fan ih 13 yaaz oal.”

 Wai dis da sohnting fi mek wi wori bowt?

•   Klaasmayts, advataizment, ahn TV ku ga wahn big ifek pahn di way yu chail feel bowt alkohol.

•   Di U.S. Centers for Disease Control and Prevention seh dat 11 persent a aal di alkohol weh peepl jrink eena di United States da bai anda ayj chiljren.

   Ih noh sopraiz wi, den, dat payrents shuda teech dehn chiljren bowt alkohol fahn wahn yong ayj. Chiljren need fi noa weh ku hapm tu wahn persn wen ih jrink alkohol. How yu ku du dat?

 Chrai fi figa owt heda taim weh yu pikni mait aks yu. Yong chiljren aks wahn lata kweschanz, an oalda chiljren ga eevn moa kweschanz. Soh den, mek shoar yu noa how yu wahn ansa dehn. Fi egzampl:

•   If yu pikni waahn noa how alkohol tays, yu ku tel ahn dat wain tays laik joos weh gaan bad ahn byaa tays bita.

•   If yu pikni waahn tays alkohol, yu ku tel ahn dat alkohol tu schrang fi ih lee badi. Tel ahn how ih ku mek wahn persn feel: Alkohol ku mek wahn persn feel rilaks, bot tu moch ku mek wahn persn dizi, ak schupid, ahn seh tingz weh ih mait feel sari bowt laytaraan.​—Proverbs 23:29-​35.

 Teech yuself. Di Baibl seh: “Di waiz persn ak wid nalij.” (Proverbs 13:16) Mek shoar yu noa di said ifeks a alkohol ahn di laa ahn di leegal limits eena di konchri weh yu liv. Den, yu wahn bee redi fi help yu chiljren.

 Bring op di tapik wid yu pikni dehn. Wahn pa fahn Britain, weh naym Mark, seh: “Yong peepl mait bee kanfyooz wen ih kohn tu alkohol. Ah mi aks mi ayt-yaa-oal son if hihn mi tink ih rait er rang fi jrink alkohol. Ah mi kip di sichuwayshan kaam soh dat di too a wee mi feel rilaks, ahn dis mi help ahn fi oapm op tu mi ahn tel mi how ih feel.”

 Yu wahn ga beta rizolts if yu taak bowt alkohol sevral taimz wid yu chail. Dipendin pahn di ayj a di chail, yu need fi diskos di prapa vyoo a alkohol an ada impoatant lesn eena laif, laik obeedyans tu chrafik laaz ahn di prapa vyoo a seks.

 Set di egzampl. Chiljren da laik sponj—dehn soak op evriting rong dehn—ahn risaach shoa dat chiljren du weh dehn si fi dehn payrents du. Dis meenz dat if yoo jrink alkohol fi kaam yu main er eez yu schres, yu chail wahn tink dat alkohol da di ansa tu prablemz eena laif. Soh set wahn gud egzampl. Mek shoar yoo ga di rait vyoo a alkohol.