HELP FI DI FAMILI
Weh fi Du Wen Yu Noh Gree Wid Wan Anada?
Peepl inchrestid eena difrent tingz, dehn ga difrent habits ahn wayz. Dis ku bee wahn reel chalenj fi wahn marid kopl. Bot ada tingz ku bee wahn eevn biga chalenj, tingz laik:
Humoch taim yu spen wid yu relitiv dehn
How fi manij moni
Weda er nat fi ga chiljren
Weh yu ku du if yoo ahn yu hozban er waif noh gree pahn tingz laik dehnya?
Weh yu shuda noa
Noh bikaaz too peepl laik di saym tingz, dat meenz dat dehn da di saym. Eevn wahn marid kopl weh ga lata tingz in kaman noh wahn aalwayz si tingz di sayhn way, eevn impoatant tingz.
“Ai mi groa op eena wahn famili weh mi reeli kloas tu eech ada. Pahn di weeken dehn, wee wuda spen taim wid wi gran-payrents, wi onkl dehn, wi aanti dehn, ahn wi kozn dehn. Mi hozban famili neva du wahn lat tugeda. Soh wen ih kohn tu humoch taim fi spen wid faamli er humoch taim fi spen di kamyoonikayt wid wi relitiv dehn weh liv faar, wi ten fi si tingz difrent.”—Tamara.
“Bikaaz a di way wi mi groa op, mee ahn mi waif mi ga difrent aidyaaz bowt how wi shuda spen wi moni. Joorin di fos kopl monts, wee mi ga sohn aagyument bowt it. Wi mi haftu taak bowt it moa dan wan taim fi kohn tu wahn agreement.”—Tyler.
Too peepl ku luk pahn di saym seen ahn stilyet ga wahn difrent vyoo a weh dehn si. Sayhn way soh wid wahn ishu weh wahn kopl noh gree pan
Sohntaim, ih noh inof fi jos giv een, kaa dat noh wahn solv sertn prablemz. Fi egzampl, wat if wan a unu relitiv geh sik? Er wat if wan a unu waahn ga chiljren bot di neks wan noh waahn? a
“Mee ahn mi waif mi ga sohn lang taak bowt weda er nat fi ga chiljren. Shee di tink bowt it moa ahn moa, ahn wi noh di si tingz di saym way agen. Ai noh si wahn way fi giv een.”—Alex.
Jos bikaaz yoo ahn yu marij mayt si tingz difrent noh meenz dat yu marij kyaahn ga sokses. Sohn ekspert seh dat if yoo ahn yu marij mayt deh da wahn point weh unu kyaahn gree pahn wahn seeryos ishu, yu fi du wateva ih tek fi mek shoar yu geh weh yu waahn, eevn if yu need fi en yu marij fi get it. Bot da solooshan di seh dat yu feelinz moa impoatant dan yu pramis weh yu mek tu eech ada fronta Gaad fi stik tugeda noh mata weh hapm.
Weh yu ku du
Mek op yu main fi aana yu marij vow. If yu mek op yu main fi kip yu marij vow, ih wahn help unu werk az wahn teem fi solv unu prablemz.
Baibl prinsipl: “Noh mek nobadi separayt weh Gaad don jain tugeda.”—Machyu 19:6.
Konk di kaas. Fi egzampl, sopoaz wan a di marij mayt waahn ga chiljren ahn di ada wan noh waahn ga. Dehn ga wahn lata tingz fi tink bowt, inkloodin:
Di schrent a yu marij.
Yu marij ku deel wid di ekschra schres weh kohn wen yu ga wahn chail?
Di rispansabiliti a wahn payrent.
Ih tek moa dan fi jos provaid food, kloaz, ahn shelta.
Yu fainanshal sichuwayshan.
Yoo ku balans werk, famili, ahn ada rispansabiliti?
Baibl prinsipl: “Sopoaz eni wan a unu waahn put op wahn bildin. Yu noh wahn sidong fos ahn figa owt humoch ih wahn kaas?”—Look 14:28.
Tink bowt di mata chroo ahn chroo. Yu mait aybl fi fain wahn solooshan fi som a di ishu dehn weh unu noh gree pan. Fi egzampl, if di ishu da weda er nat fi ga chiljren, di hozban er waif weh noh waahn ga kidz ku aks ihself:
‘Wen Ai seh dat Ah noh waahn ga chiljren, Ai meen neva eva er Ai meen jos noh rait now?’
‘Wai Ai di hoal bak fahn ga chiljren? Da kaaz Ai noh tink dat Ai ku bee wahn gud payrent?’
‘Ai frayd dat mai marij mayt wahn niglek mi?’
Pahn di ada han, di hozban er waif weh waahn ga chiljren ku aks ihself:
‘Wee reeli redi fi di rispansabiliti fi bee payrents?’
‘Wee ku afoad fi rayz wahn pikni?’
Baibl prinsipl: “Di wizdom fahn Gaad . . . kansidarayt.”—Jaymz 3:17.
Rekonaiz di advantij a how yu marij mayt si tingz. Too peepl ku luk pahn di saym seen ahn stilyet ga wahn difrent vyoo a weh dehn si. Jos laik dat, wahn kopl ku luk pahn wahn ishu ahn eech wan a dehn ku ga wahn difrent vyoo—fi egzampl, how dehn shuda spen moni. Wen da taim fi diskos eni sichuwayshan wehpaat unu si tingz difrent, staat wid weh unu gat in kaman.
Weh goalz unu gree pan?
Weh da di advantij a di way eech wan see’t?
Fi kip di marij schrang, yu tink di too a unu ku ajos di way unu si tingz fi shoa kansidarayshan fi di ada persn?
Baibl prinsipl “Noh oanli tink bowt unu oanself, bot tink bowt weh gud fi ada peepl tu.”—1 Korintyanz 10:24.
a Wahn kopl shuda diskos seeryos mataz bifoa dehn geh marid. Stil, tingz weh dehn neva ekspek ku kom op, er di feelinz a wan a di marij mayt ku chaynj oava taim.—Ecclesiastes 9:11.