Az Mayri Magdaleen mi-di luk op pahn di skai, ih waip weh ih tyaaz fan ih aiy dehn. Ih Laad, weh ih mi lov soh moch, mi nayl pahn wahn stayk an ih mi-di sofa. Da-mi bowt twelv aklak da day, “ahn di hoal plays [mi] geh daak daak”! (Look 23:44, 45) Shee rap op ihself eena ih shaal, an ih gaahn kloasa tu di ada uman dehn weh mi dehdeh. Ih mi veri schraynj fi mek daaknis kohn midl day, an ih mi eevn moa schraynj dat ih mi laas fi 3 owaz. Ih pasabl dat Mayri ahn di adaz weh mi deh kloas bai mi staat tu hyaa di naiz weh di animal dehn yoozhwali mek da nait. Di aami aafisa ahn dehn wan weh mi-di gyaad Jeezas “mi fraitn bad ahn dehn seh: ‘Dis man da-mi Gaad Son fi chroo!’” (Machyu 27:54) Jehoava mi-di shoa evribadi how sad ahn beks ih mi feel bowt di kruwil way di peepl mi chreet ih Son.

Ih mi haad fi mek Mayri Magdaleen luk pahn Jeezas ahn si how ih di goh chroo soh moch payn, bot shee mi stil waahn stay kloas tu ahn. (Jan 19:25, 26) Wi kyaahn eevn imajin weh Jeezas mosi mi-di goh chroo. Ahn Jeezas ma mi aalso need komfert ahn sopoat.

Afta aal weh Jeezas mi du fi Mayri Magdaleen, shee mi waahn du wateva shee kuda mi du fi help ahn. Fi shee laif mi yoostu bee soh terabl ahn shaymful, ahn peepl yoostu hayt ahn, bot Jeezas mi chaynj fi shee laif fareva. Now, sayka Jeezas, shee kuda feel beta bowt ihself an ih laif mi ga meenin. Mayri Magdaleen da-mi wahn uman a grayt fayt. Wai wi ku seh dat? Ahn weh wee ku laan tudeh fahn fi shee egzampl a fayt?

Eena di Baibl, di stoari a Mayri Magdaleen staat aaf wid wahn gif; sohnting speshal weh Jeezas mi giv ahn. Jeezas mi giv shee freedom fahn wahn terabl sichuwayshan. Eena dehn dayz, ih mi kaman fi ga kantak wid di deemonz, ahn dehn wikid spirit mi atak lata peepl; dehn yoostu get eena peepl ahn kanchroal dehn. Wee noh noa how di deemonz mi afek poa lee Mayri Magdaleen, bot wi doo noa dat sevn a dehn wikid ahn vailent buli mi get eensaida shee. Bot Jeezas Krais mi chays aala dehn owt fan ahn!—Look 8:2.

Now, widowt dehn eevl spirit, shee mi fainali feel free. Bot how shee kuda shoa Jeezas how tankful ih mi feel? Shee mi get fi bee wahn laayal falowa a Jeezas. Shee mi aalso help Jeezas eena sohn veri impoatant wayz. Fi egzampl, Jeezas an ih disaipl dehn mi need food fi eet, kloaz fi wayr, ahn wahn plays fi sleep da nait. Jeezas an ih apasl dehn neva rich, ahn dehn neva ga wahn jab fi mek dehn ku mek moni. Soh fi mek dehn kuda mi foakos pahn di preechin ahn teechin werk, dehn mi need mateeryal sopoat.

Mayri ahn sohn ada laydi mi help fi provaid di mateeryal sopoat weh Jeezas an ih apasl dehn mi need. Dehn laydi yoostu “tek moni fahn owta dehn oan pakit fi tek kayr a Jeezas ahn ih disaipl dehn.” (Look 8:1, 3) Ih ku bee dat som a dehn laydi mi rich. Di Baibl noh seh if dehn yoostu pripyaa food fi dehn, wash dehn kloaz, er gi dehn wahn plays fi stay da nait. Bot dehn mi wilin fi du fi dehn paat fi sopoat dis groop a bowt 20 disaiplz. Wi ku bee shoar dat weh dehn laydi mi du mi help Jeezas an ih apasl dehn fi foakos pahn di preechin werk. Af koars, Mayri mi noa dat shee kuda neva pay bak Jeezas fi aal weh hihn mi du fi shee, bot shee mosi mi reeli hapi fi du weh ih kud!

Lata peepl mait luk dong pahn peepl weh du werk fi serv adaz. Bot dat da noh now Gaad feel. Jos imajin how hapi hihn mosi mi feel fi si Mayri du ih bes fi sopoat Jeezas an ih apasl dehn! Eevn tudeh, lata faytful Kristyanz hapi fi du werk weh mek adaz feel gud. Sohntaim da jos wahn lee fayva er sohn kain werdz weh ku mek sombadi els feel hapi. Jehoava apreeshiayt it wen wi du dehndeh tingz.—Proverbs 19:17; Heebrooz 13:16.

Mayri Magdaleen da-mi wan a di laydi dehn weh mi gaahn wid Jeezas da Jeroosalem fi di Paasoava eena di yaa 33 C.E. (Machyu 27:55, 56) Wen shee mi hyaa dat dehn mi ares Jeezas ahn put ahn pahn chraiyal joorin di nait, shee mosi mi feel terabl. Ahn di nyooz jos geh wers. Govna Ponchos Pailat mi alow di krowd ahn di Jooish rilijos leedaz fi presha hihn fi sentens Jeezas tu wahn kruwil det pahn wahn stayk. Mayri mi praabli si ih Maasta, kova wid blod ahn taiyad, di waak dong di schreet di pul di lang ahn hevi pees a wud weh dehn mi wahn nayl ahn pan.—Jan 19:6, 12, 15-17.

Afta ih mi geh daak rong 12 aklak, Mayri Magdaleen ahn sohn ada laydi mi-di “stan op kloas” tu di taacha stayk weh Jeezas mi deh pan. (Jan 19:25) Mayri mi dehdeh til di en, an ih mi si aal weh mi hapm. Shee mi si ahn hyaa wen Jeezas mi tel ih apasl Jan, weh ih mi lov soh moch, fi tek kayr a fi hihn ma, Mayri. Shee mi eevn hyaa wen Jeezas mi krai owt tu ih Pa eena payn. Ahn shee mi hyaa di laas werdz weh Jeezas mi seh jos bifoa ih mi ded, “Evriting don now.” Wi kyaahn eevn imajin how dat mosi mi feel! Bot stil, eevn afta Jeezas ded, shee mi stay deh. Layta, shee mi stay bai di toom wehpaat di rich man, Joazef fahn Arimateeya, mi put Jeezas badi fi res.—Jan 19:30; Machyu 27:45, 46, 57-61.

Mayri egzampl teech wi weh wee ku du wen fi wee bradaz ahn sistaz goh chroo tof chraiyalz. Wee noa wi kyaahn stap bad tingz fahn hapm er tek weh di payn weh dehn feel. Bot wee ku shoa kompashan ahn korij. Wen sombadi di goh chroo wahn tof sichuwayshan, di sopoat a wahn fren ku reeli help. Wen wi laayal tu wi fren dehn ahn wi sopoat dehn noh mata wat, ih shoa dat wi ga lata fayt, ahn dat ku komfert dehn tu.—Proverbs 17:17.

Afta di disaipl dehn mi put Jeezas badi eena di toom, Mayri mi deh monks di ada laydi dehn weh mi mek sohn moa sweet aintment fi put pahn Jeezas badi aftawodz. (Maak 16:1, 2; Look 23:54-56) Den shee mi get op erli di maanin afta di Sabat mi oava. Jos imajin di seen: Mayri di waak dong pahn di schreet wail ih stil daak wid di ada laydi dehn. Wail dehn di hed tu di toom, dehn di wanda how dehn wahn roal weh di big hevi stoan weh mi-di kova di doa a di toom. (Machyu 28:1; Maak 16:1-3) Bot stil, dehn neva ton bak. Fi dehn fayt da weh mi moov dehn fi du fi dehn paat ahn chros dat Jehoava mi wahn du di res.

Mayri mosi mi waak heda evribadi els. Soh wen shee reech di toom, shee mi shak fi si dat di big hevi stoan weh mi-di kova di doa a di toom mi don moov, ahn di toom mi emti! Mayri tek akshan widowt tink twais. Shee ron bak fi tel Peeta ahn Jan weh ih mi si. Imajin shee reech deh, taiyad an owta bret, di hala: “Dehn moov di Laad badi fahn owta di toom, ahn wee noh noa wichpaa dehn put ahn”! Peeta ahn Jan mi rosh tu di toom fi si if da chroo dat ih mi emti, ahn den dehn gaahn bak hoam. *—Jan 20:1-10.

Wen Mayri gaahn bak da di toom, shee mi deh aal bai ihself. Shee mosi mi feel soh sad wen ih mi si di emti toom, ahn fi mek mataz wers, ih mi soh sailent da maanin dat aal shee kuda mi du da krai ahn krai. Shee mi neel dong ahn peep eena di toom, an ih kudn bileev dat di Laad neva dehdeh. Bot shee mi shak fi si hoo mi deh eensaid! Too aynjel jres eena wait mi-di sidong een deh! Dehn aks ahn: “Weh yu di krai fa?” Wel, aldoa ih mosi mi wel ahn kanfyooz, shee tel dehn di saym ting weh ih mi tel di apasl dehn: “Dehn kehr weh mi Laad badi an Ah noh noa wichpaa dehn put ahn.”—Jan 20:11-13.

Den shee ton rong ahn si dat wahn man mi-di stan op bihain ahn. Shee neva rekonaiz ahn, soh shee mi tink dat hihn da-mi di gyaadna. Dis man mi kain tu ahn, an ih mi aks ahn: “Mis, weh yu di krai fa? Da hoo yu di luk fa?” Mayri ansa ahn seh: “Mista, if da yoo kehr ahn, pleez tel mi soh dat Ai ku goh get ahn.” (Jan 20:14, 15) Jos tink bowt weh shee mi-di seh. Yu tink dat shee kuda mi reeli pik op Jeezas badi ahn kehr it bai ihself? Yoo tink ih kuda mi bak di badi a wahn schrang man? Mayri neva stap ahn tink bowt dehndeh tingz. Shee jos mi waahn du aal weh ih kud.

Wen wee di goh chroo prablemz er sad taimz weh luk laik da moa dan weh wi ku handl, ih pasabl fi kapi Mayri Magdaleen egzampl? If wi onli foakos pahn wi oan weeknis dehn ahn weh wi kyaahn du, wi mait bee soh fraitn ahn week dat wi noh mait en op di du notn. Bot if wi du weh wi kud ahn lef di res tu wi Gaad, wi ku du moa dan weh wi kuda eva imajin. (2 Korintyanz 12:10; Filipiyanz 4:13) Moa impoatant, wi wahn mek Jehoava, wi Gaad, hapi. Mayri mi did mek Jehoava hapi, ahn hihn mi bles ahn eena wahn way weh shee neva ekspek.

Di man weh mi-di stan op bihain Mayri da neva di gyaadna. In fak, da-mi wan man weh peepl mi noa az wahn kyaapenta, den wahn teecha, ahn den, di Laad Jeezas hoo Mayri mi reeli lov. Bot shee neva kanshos dat da-mi hihn, soh shee mi staat tu ton weh. Mayri kudn eevn imajin dat Jeezas mi rayz op bak fahn di ded az wahn maiti spirit persn. Jeezas mi apyaa tu Mayri di luk laik wahn hyooman, bot ih neva ga di saym badi weh ih mi ga bifoa. Joorin dehndeh eksaitin dayz afta ih rezorekshan, eevn dehn wan weh mi noa ahn gud kudn rekonaiz ahn.—Look 24:13-16; Jan 21:4.

Soh how Jeezas mi mek Mayri noa da hoo hihn? Da mi jos di way how hihn mi seh fi shee naym,“Mayri!” Shee mi ton rong kwik-wan an ansa ahn seh—“Raboani!” Dis da wahn Heebroo werd weh shee wuda mi praabli yooz wahn lata taimz fi rifaa tu Jeezas. Hihn da-mi fi shee Teecha weh ih mi onli lov! Shee mosi mi feel soh hapi. Wi ku imajin how shee mi hoal aan pan ahn soh tait ahn neva waahn let ahn goh.—Jan 20:16.

Jeezas mi noa egzakli weh shee mi-di tink. Hihn mi tel ahn: “Yu mosn hoal aan tu mi.” Wi ku imajin dat hihn mi ansa ahn eena wahn kain way, maybi wid wahn nais lee smail, az hihn mi chrai mek Mayri stan op ahn let ahn goh; ih tel ahn: “Ah noh gaan op da mi Faada yet.” Da neva taim yet fi mek hihn goh op da hevn. Hihn mi stil ga werk fi du pahn ert, ahn hihn mi waahn Mayri help ahn. Af koars, Mayri mi-di lisn tu evriting weh Jeezas mi seh. “Goh da mi breda dehn ahn tel dehn seh, ‘Ah gwehn op da mai Faada, weh da fi unu Faada tu, an Ah gwehn da mai Gaad, weh da fi unu Gaad tu.’”—Jan 20:17.

Dat da-mi wahn impoatant asainment fahn ih Maasta! Mayri da-mi di fers disaipl fi ga di privilij fi si Jeezas afta ih mi rezorek, ahn now shee mi ga di privilij fi tel adaz bowt di gud nyooz. Imajin fi shee jai an eeganis az ih gaahn luk fi di disaipl dehn. Jos imajin how shee mosi mi-di seh di werdz oava ahn oava eena ih main: “Ai si di Laad!” Shee tel di res a disaipl dehn evriting weh Jeezas mi seh, an ih mi soh eksaitid dat ih mi kuda mi haadli taak. (Jan 20:18) Weh Mayri mi seh mi ad moa deetaylz tu weh di disaipl dehn mi don hyaa fahn di ada laydi dehn weh mi gaahn da Jeezas emti toom.—Look 24:1-3, 10.

How di apasl dehn mi rispan? Noh soh gud. Di Baibl seh: “Di disaipl dehn neva bileev wan ting weh di laydi dehn mi tel dehn, kaa ih mi song laik mek-op stoari.” (Look 24:11) Dehndeh man mi groa op eena wahn kolcha weh neva yoostu chros uman. Akaadn tu di chradishan a di Jooz, wahn uman kudn eevn bee wahn witnis da koat. Maybi di apasl dehn neva riyalaiz how fi dehn kolcha mi afek di way dehn tink. Bot Jeezas an ih Pa noh prejudis. Dehn mi giv soch a wandaful privilij tu da faytful uman.

Wi noa fi shoar dat Mayri neva mek fi dehn ansa bada ahn. Shee mi noa dat ih Maasta chros mi ahn, an dat mi inof. Evribadi weh fala Jeezas ga di privilij fi diliva wahn mesij. Di Baibl kaal da mesij “di gud nyooz a a Gaad Kingdom.” (Look 8:1, NW) Jeezas neva pramis ih falowaz dat evribadi mi wahn bileev dehn ahn dat dehn mi wahn apreeshiayt di werk weh dehn du. Insted, hihn mi tel dehn di opozit. (Jan 15:20, 21) Ih impoatant fi mek Kristyanz laan fahn Mayri Magdaleen egzampl. Kaaz eevn doa som a di ada disaiplz neva bileev shee rait away, shee neva looz ih jai ahn notn neva stap ahn fahn shayr di gud nyooz dat Jeezas mi rayz op bak tu laif!

In taim, Jeezas mi apyaa tu ih apasl dehn, ahn den tu moa ahn moa a ih falowaz. Pahn wan okayzhan, hihn mi apyaa tu moa dan 500 peepl! (1 Korintyanz 15:3-8) Fi shoar, Mayri fayt mi groa evritaim Jeezas mi apyaa, noh kay if shee mi see’t er nat. Praabli Mayri Magdaleen da-mi wan a di uman dehn weh mi deh da di meetin da Jeroosalem pahn di day a Pentikaas wen di hoali spirit mi poar owt pahn Jeezas falowaz.—Aks 1:14, 15; 2:1-4.

Wee ga gud reezn fi bee shoar dat Mayri mi kip ih fayt schrang aal ih laif til ih mi ded. Eech wan a wi shuda mek op wi main fi du di saym ting! Wi wahn di kapi Mayri Magdaleen fayt if wi shoa dat wi tankful fi aal weh Jeezas du fi wi, an if wi serv adaz ahn chros eena Gaad fi help.