Sohnbadi bring nyooz tu Ilaija dat King Ayhab mi ded. Wi ku imajin how di prafit mosi mi stan op deh di ron ih fingaz chroo ih baydz wail ih tink bak tu aal di yaaz weh hihn mi haftu deel wid da wikid king. Ilaija mi haftu bayr op chroo soh moch chraiyalz! Ayhab an ih waif, Jezibel, mi chretn di prafit, hont ahn dong, ahn chrai kil ahn. Di king neva du notn fi stap Kween Jezibel fahn kil lata Jehoava prafit. Dehn mi eevn plan op tugeda ahn merda wahn inosent, raichos man weh mi naym Naybot, ahn dehn mi du it jos bikaaz dehn mi greedi fi weh hihn mi oan. Bikaaz a dat, Ilaija mi tel dehn Jehoava jojment mesij gens King Ayhab an aala ih son dehn. Now, Gaad werd mi-di kohn chroo. Ayhab mi ded egzakli how Jehoava mi seh ih wahn ded.​—1 Kings 18:4; 21:​1-​26; 22:37, 38; 2 Kings 9:​26.

Stilyet, Ilaija mi noa dat ih mi wahn haftu kantinyu bayr op, ahn noh giv op. Jezibel neva ded yet. Shee da-mi stil di kween, ahn mi stil mi-di rool oava ih famili ahn di hoal nayshan. Ilaija mi wahn haftu fays lat moa chalenj, an ih mi ga lat fi teech Ilaisha, ih fren hoo mi wahn tek fi hihn plays az prafit. Soh mek wi luk pahn di laas chree asainment weh Jehoava mi gi di prafit Ilaija. Az wi si how fi hihn fayt mi schrentn ahn fi bayr op, wee wahn ku si how wee ku schrentn fi wee oan fayt joorin dehnya haad taimz weh wi di liv eena.

Ayhazaiya, weh da-mi Ayhab ahn Jezibel son, da-mi king a Izrel now. Insteda laan fahn di mistayk weh ih payrents mi mek, hihn mi jos az wikid az dehn. (1 Kings 22:52) Hihn mi wership Bayal, jos laik dehn. Bayal-wership da-mi wahn rilijan weh mi disgostin. Ih mi kaaz peepl fi du lata bad tingz; dehn mi prastichoot dehnself rait eena di templ an aafa op chiljren tu faals gaad. Yu tink eniting mi deh weh kuda mi kanvins Ayhazaiya fi chaynj ih wayz ahn help di peepl dehn fi ton bak tu Jehoava?

Di king gaahn chroo wahn sodn kalamiti. Ih jrap chroo wahn hoal eena ih opstayz room, an ih geh bad hert. Eevn doa ih kuda mi ded, ih stil neva ton tu Jehoava. Insted, ih sen mesinjaz tu di Filisteen siti a Ekron fi aks di gaad Bayal-zeebob if ih mi wahn geh beta. Wel dat mi mek Jehoava geh beks beks. Hihn sen wahn aynjel tu Ilaija ahn tel ahn mek ih goh meet di mesinja dehn pahn dehn way. Di prafit kos dehn op ahn sen dehn bak hoam wid wahn jojment mesij. Ayhazaiya sin mi veri seeryos! Hihn mi-di bihayv laik no Gaad neva deh da Izrel. Soh Jehoava disaid dat Ayhazaiya wuda stay kripl eena bed ahn noh get op.​—2 Kings 1:​2-4.

Stilyet, Ayhazaiya wudn ripent. Ih aks di mesinja dehn: “Da weh di man weh mi meet unu ahn tel unu dis mesij luk laik?” Dehn tel ahn dat ih mi jres op laik wahn prafit, wid kloaz weh neva fansi. Soh Ayhazaiya seh: “Da-mi Ilaija den.” (2 Kings 1:​7, 8) Fahn dis paat a di stoari wi laan dat Ilaija mi liv wahn simpl laif, ahn dat ih mi foakos pahn serv Jehoava. Pahn di ada han, Ayhazaiya an ih payrents mi greedi, ahn dehn mi liv onli fi goh afta mateeryal tingz. Ilaija egzampl rimain wi bowt sohnting weh Jeezas seh. Hihn mi seh dat wi fi liv wahn simpl laif ahn foakos pahn serv Jehoava.​—Machyu 6:​22-​24.

Ayhazaiya mi plan fi tek venjans, soh ih sen 50 soaljaz ahn dehn cheef fi goh ares Ilaija. Wen dehn fain ahn, ih “mi-di sidong tap a di mongtin,” * ahn soh di cheef a di aami aada ahn fi “kohn dong fahn op deh”​—di plan da-mi praabli fi kehr ahn fi goh kil ahn. Imajin dat! Eevn doa dehn mi noa dat Ilaija da-mi di “prafit a di chroo Gaad,” dehnya soaljaz mi tink dat dehn ga di rait fi buli ahn an chretn ih laif. Bot dehn mi sadli mistaykn! Ilaija tel di cheef: “Wel, if Ai da Gaad prafit, geh redi fi dis den; faiya wahn kohn dong fahn hevn ahn bon op yoo ahn yu 50 soalja dehn.” Den Gaad tek akshan! “Faiya kohn dong fahn hevn fi chroo ahn bon op hihn ahn di 50 soalja dehn.” (2 Kings 1:​9, 10) Jehoava noh tek it laitli wen peepl disrispek fi hihn servant dehn, ahn dis stoari teech wi da lesn deh playn ahn schrayt.​—1 Chronicles 16:21, 22.

Ayhazaiya sen wahn neks cheef wid 50 moa soaljaz. Di sekant cheef mi eevn moa foolish dan di fos wan. Hihn neva did laan wahn lesn fahn weh mi hapm tu di fos set, eevn doa hihn mosi mi si dehn ashiz pahn di said a di mongtin. Pahn tap a dat, hihn koman Ilaija fi “kong dong” fahn aafa di mongtin, jos laik di fos cheef, bot dis wan ad aan di werd “kwik”! Hihn mi foolish bad! Soh hihn an ih soalja dehn ded sayhn way laik di fos set. Di king mi eevn moa stobant dan dehn! Hihn sen wahn neks set a soalja, jos laik if hihn neva kay bowt weh mi hapm tu aal di wan dehn weh ih sen bifoa. Gud ting dis terd cheef da-mi wahn smaata man. Hihn gaan op tu Ilaija, hombl ihself, ahn bayg ahn fi noh mek Gaad kil dehn. Ilaija da-mi Gaad prafit, soh hihn praabli mi shoa di saym kaina mersi weh Jehoava shoa. Soh ih neva du di man dehn notn. Jehoava aynjel tel Ilaija mek ih goh lang wid di soalja dehn dis taim. Ilaija obay ahn, an ih gaahn gi di wikid king Jehoava jojment mesij. Ayhazaiya ded, jos laik how Gaad mi seh. Ih roolaship mi onli laas fi bowt too yaaz.​—2 Kings 1:​11-​17.

Soh da how Ilaija kuda mi bayr op ahn stay schrang wen evribadi rong ahn mi-di ribel ahn shoa dat dehn mi stobant? Di ansa tu da kweschan impoatant fi wee tudeh tu, noh chroo? Yoo eva feel foschraytid fi si sombadi weh yu lov gih dong wahn rang road bikaa dehn rifyooz fi lisn tu advais ahn kongsl? How wi ku bayr op ahn stay schrang, noh mata weh peepl rong wi di du? Wel tink bowt dis: Da wehpaa di soalja dehn mi fain Ilaija? “Pahn tap a di mongtin,” noh chroo? Wel, wi kyaahn seh fi shoar wai Ilaija mi deh op deh, bot wi doo noa dat hihn da-mi wahn man weh pray wahn lat. Soh hihn mosi mi laik plays laik dehndeh, sohnweh praivit wehpaa ih kuda mi geh kloasa tu Gaad. (Jaymz 5:​16-​18) Soh wat da di lesn fi wee? Wi need fi tek taim fi spen taim wid Gaad; wi need fi kaal ahn bai ih naym, taak tu ahn, an tel ahn wi chroblz ahn wi woriz. Den, wi wahn bee schranga, ahn bayr op wen adaz rong wi bihayv laik dehn noh kay if dehn kaaz chrobl fi dehnself an adaz.

Az taim paas bai, Ilaija mi need fi giv op ih asainment ahn paas it aan tu sombadi els. Soh noatis weh ih mi du. Az hihn an Ilaisha mi-di lef di tong a Gilgal, Ilaija tel Ilaisha fi stay deh wail hihn chravl bai ihself, bowt 7 mailz, tu Betel. Bot Ilaisha tel ahn: “Az shoar az Jehoava alaiv ahn yoo alaiv, Ah noh wahn lef yu.” Afta di too a dehn reech Betel, Ilaija tel Ilaisha dat hihn mi wahn chravl bai ihself, bowt 14 mailz, tu Jeriko. Ilaisha tel ahn di saym ting az bifoa. Ih hapm agen, fi di terd taim, da Jeriko. Ilaija seh ih mi wahn chravl bai ihself, bowt 5 mailz, tu di Jaadn Riva. An agen, Ilaisha seh di saym ting. Ih rifyooz fi lef Ilaija!​—2 Kings 2:​1-6.

Da weh kwaliti Ilaisha mi-di shoa? Laayal lov; di kaina lov weh mek wan persn stik tu di ada persn widowt eva let goh. Dis da di saym kaina lov weh Root mi shoa fi Nayomi. (Ruth 1:​15, 16) Aala Gaad servant dehn need da kwaliti​—now moa dan eva. Wi need fi aks wiself if wi si dat az klyaa az Ilaisha mi see’t?

Ih mosi mi toch Ilaija haat fi si how ih yong fren mi shoa ahn laayal lov. Ahn bikaaz a dehn frenship, Ilaisha geh fi si Ilaija laas mirakl. Bai di bank a di Jaadn Riva, Ilaija lash di waata tap wid ih jakit, di jakit weh aal prafit mi wayr, ahn di waata split eena too! Dat mi amayzin, espeshali kaa dis riva mi deep eena sertn spat ahn di korant mi schrang. Ahn fifti a di “son dehn a di prafits” mi-di wach tu. Da-mi aalmoas laik wahn skool ful a styoodents weh mi-di geh chraynin fi tek di leed eena chroo wership da Izrel. (2 Kings 2:​7, 8) Soh da Ilaija mosi mi-di tek di leed eena dis chraynin proagram. Wen Ilaija mi yonga, hihn mi feel laik hihn da-mi di onli persn di wership Jehoava. Bot bikaaz Ilaija mi bayr op ahn noh giv op, Jehoava mek ih serv lang inof fi si proagres eena chroo wership.​—1 Kings 19:10.

Afta dehn kraas di Jaadn Riva, Ilaija tel Ilaisha: “Aks mi wateva yu waahn mek Ah du fi yu bifoa Gaad kehr mi weh fahn yu.” Ilaija mi noa dat da-mi taim fi mek ih goh. Hihn neva jelos ih yong fren fi di privilij an asainment weh Jehoava mi wahn gi hihn. Insteda dat, Ilaija mi eega fi help ahn eena eni way weh ih kud. Dis da-mi di onli ting weh Ilaisha aks ahn fa: “Ah ku pleez get wahn dobl amonk a di spirit weh yoo gat?” (2 Kings 2:9) Hihn neva meen dat ih mi waahn dobl di amonk a hoali spirit wen Gad mi gi Ilaija. Raada, hihn mi-di aks fi wahn inheritans. Yu si, akaadn tu di laa bak den, di fosbaan son yoostu geh di bigis inheritans, dobl di amonk, kaaz da hihn mi wahn bee di nyoo hed a di famili. (Deuteronomy 21:17) Sins hihn mi-di tek oava fahn Ilaija, hihn mi noa dat hihn mi wahn need di saym korij weh Ilaija mi shoa fi mek ih ku du di asainment.

Ilaija mi hombl, soh ih lef it op tu Jehoava fi gi Ilaisha weh ih aks fa. Ih seh dat if Ilaisha si wen Gaad kehr ahn weh fahn deh, den di ansa wuda bee yes. Noh tu lang afta dat, az di too fren mi-di waak lang di road di ga wahn kanvasayshan, sohnting amayzin hapm!​—2 Kings 2:​10, 11.

Wahn schraynj lait shain brait eena di skai ahn kohn kloasa ahn kloasa. Wahn winstaam staat op, ahn wi ku onli imajin di song weh dat mi mek. Den di too man si sohnting di kohn tuwaadz dehn faas faas. Ih mi brait, ahn wen ih reech, ih mosi mi sopraiz dehn ahn mek dehn jrap bakway anaal. Da weh dehn mi si? Wahn brait chariyat weh luk laik ih mi mek owta faiya. Ilaija mi noa dat da-mi taim fi mek ih goh. Soh yu tink ih jomp op pahn di chariyat? Di Baibl noh reeli seh. Bot di Baibl doo tel wi dat ih gaan op eena di ayaa, ahn dat di winstaam kehr ahn!

Ilaisha mosi mi shak az ih si dis di hapm. Bikaaz ih si di hoal ting, hihn mi noa fi shoar dat Jehoava mi wahn gi ahn weh ih mi aks fa—wahn dobl amonk a di korij weh Ilaija mi shoa. Bot Ilaisha mi tu sad fi tink bowt aala dat. Hihn neva noa wehpaa ih fren mi-di goh, bot ih mosi mi figa dat ih noh wahn eva si Ilaija agen. Ih hala owt: “Mi pa, mi pa! Di chariyat a Izrel, di haas, an aala di raida dehn!” Ih wach az ih teecha gaan ferda ahn ferda away fan ahn, til ih disapyaa kompleetli. Den Ilaisha tayr ih kloaz; ih mi soh sad!​—2 Kings 2:​12.

Az Ilaija gaan op eena di skai, yu tink ih hyaa weh ih yong fren mi-di hala tu ahn? Yu tink ih krai wahn lee bit tu? Noh mata wat, wi ku bee shoar dat wahn gud fren laik Ilaisha mi help ahn fi bayr op chroo haad taimz. Wi ku laan fahn Ilaija egzampl tu. Wi ku bil op gud frenship wid peepl hoo lov Gaad ahn du weh hihn waahn dehn du!

Soh da wehpaa Ilaija gaan? Som rilijan teech dat ih gaan op da hevn fi deh wid Gaad. Bot dat noh pasabl. Honjridz a yaaz layta, Jeezas Krais seh dat nobadi eva mi gaan op da hevn bifoa hihn kohn dong pahn di ert. (Jan 3:​13) Soh wen di Baibl seh dat “Ilaija gaan op eena di hevnz eena di winstaam,” wi haftu aks wiself, Wich hevnz? (2 Kings 2:​11) Di Baibl yooz di werd “hevnz” fi too ting. Ih ku bee di plays wehpaa Jehoava liv, er ih ku bee di skai, wehpaa berdz ahn di klowdz deh. (Psalm 147:8) Soh da mosi tu da hevnz deh, er op eena di skai, dat Ilaija gaan. Ahn den wehpaa ih gaan?

Jehoava kehr ahn da wahn nyoo asainment. Dis taim, ih mi wahn serv az prafit eena di kingdom a Jooda. Di Baibl shoa dat Ilaija stil mi-di serv deh bowt sevn yaaz layta. Wikid King Jehoaram mi-di rool oava Jooda. Hihn mi marid tu di daata a King Ayhab ahn Kween Jezibel, soh fi dehn eevl wayz mi-di liv aan eena di kingdom. Jehoava tel Ilaija fi rait wahn leta wid wahn jojment mesij fi King Jehoaram. Jehoaram en op fi ded eena wahn terabl way, jos laik how Jehoava mi prafesai. Fi mek it wers, di Baibl seh: “Nobadi mi sari wen ih ded.”​—2 Chronicles 21:12-​20.

Jehoaram da neva notn laik di faytful man, Ilaija! Wi noh noa how er wen Ilaija mi ded. Bot wi doo noa dat ih neva ded eena di terabl way Jehoaram mi ded. Ahn peepl mi mis Ilaija. Ilaisha mi mis ahn. Di ada faytful prafit dehn mosi mi mis ahn tu. An Ilaija stay eena Jehoava memri tu, lang afta di prafit mi ded. Bikaaz Jehoava mi mek Ilaija apyaa eena wahn vizhan weh ih mi shoa tu Jeezas apasl dehn bowt 1,000 yaaz layta. (Machyu 17:​1-9) Yoo wuda waahn laan fahn Ilaija ahn ga di kaina fayt weh bayr op ahn stay schrang eevn weh yu di fays haad taim? Wel den, neva faget fi mek frenz wid peepl hoo lov Gaad, kip yu laif simpl ahn foakos pahn spirichwal tingz, ahn pray aal di taim fahn yu haat. Ahn jos laik Ilaija, yu wahn ga wahn speshal plays eena Jehoava haat, ahn hihn wahn memba yu fareva!