Fainali, di man dehn mi stap taak. Bai now, praabli di onli song weh dehn mi-di hyaa da-mi di song a di waam breez di bloa kraas di dezert. Joab neva ga notn moa fi seh; hihn mosi mi taiyad afta da lang kanvasayshan. Jos imajin Joab di luk pan Elifaz, Bildad, ahn Zoafar wid wahn beks luk pan ih fays. Dehn mi dyaa seh eniting els? No. Dehn jos put dong dehn hed. Dehn mi foschraytid bikaaz non a di kruwil tingz weh dehn mi seh mi get Joab fi brok ih laayalti tu Gaad. (Job 16:3, futnoat) Ahn Joab mi ga eevn moa reezn fi difen ih fayt ahn fi stay laayal.

Hihn mi looz evriting: ih richiz, ih ten pikni, di rispek a ih frenz ahn naybaz, an eevn ih helt. Ih skin mi luk blak bikaaz a di dizeez, ih mi ful op a skyab, an ih mi ga werm di kraal op ih skin. Eevn ih bret mi smel terabl. (Job 7:5; 19:17; 30:30) Di moas impoatant ting tu Joab joorin da taim da-mi fi stay laayal tu Gaad, noh mata wat els mi-di hapm eena ih laif. Di tingz weh Joab chree soa-kaal fren mi tel ahn mi mek hihn feel reeli opset. Hihn mi waahn proov dat hihn da neva di korop sina weh dehn mi-di akyooz ahn a bee. Afta Joab mi mek ih laas speech, di man dehn neva noa how fi ansa ahn. Dehn mi fainali ron owt a kruwil tingz fi seh tu Joab. Bot Joab stil mi-di goh chroo fizikal an imoashanal payn. Hihn mi stil need lata help!

Wi ku andastan wai Joab neva ga di karek vyoo a ih sichuwayshan. Hihn mi need gaidans ahn karekshan. Hihn mi aalso reeli need sohn sopoat an inkorijment., Dat da weh ih chree soa-kaal frenz shuda mi du far ahn, bot dehn neva du it. Yoo eva feel dat yu reeli need gaidans ahn sopoat? Yoo eva feel laik yu fren dehn abandan yu? Wen yu si how Jehoava Gaad mi help ih servant Joab ahn how Joab mi rispan tu dis help, dis ku giv yu hoap ahn help yu fi kantinyu bayr op.

Eena di stoari bowt Joab, wi fain owt bowt sohnting els. Wahn neks persn mi dehdeh di hoal wail, wahn yong man weh mi naym Ilaihyu. Hihn mi-di lisn az di oalda man dehn mi-di taak. Ahn hihn neva hapi ataal bowt weh dehn mi-di seh.

Ilaihyu mi opset wid Joab. Ih mi hert ahn fi si wahn raichos man laik Joab di alow dehndeh man fi provoak ahn tu di point dat hihn mi feel dat ih haftu difen ih oan raichosnis moa Gaad raichosnis. Bot stilyet, Ilaihyu mi feel kompashan fi Joab. Hihn kuda mi andastan Joab payn, dat hihn da-mi wahn sinsyaa man, ahn dat hihn mi reeli need sohn gaidans ahn komfert. Dat da wai Ilaihyu mi ron owta payshens di lisn tu di terabl tingz weh dehndeh chree man mi-di seh! Hihn mi hyaa how dehn mi-di atak Joab wid werdz fi bring ahn dong ahn fi chrai get ahn fi looz ih fayt ahn brok ih laayalti tu Gaad. Wers dan dat, dehn mi-di seh tingz weh mi mek ih seem laik Gaad wikid ahn kruwil. Afta Ilaihyu mi hyaa aal weh dehn mi-di seh, hihn mi haftu taak op!—Job 32:2-4, 18.

Hihn seh, “Ai yong, an unu oalda dan mee. Soh Ai mi kip kwaiyet owta rispek, an Ah neva tel unu weh Ah noa.” Bot hihn kudn kip kwaiyet nohmoh. Hihn seh: “Da noh ayj mek sombadi waiz, ahn da noh onli di oalda man dehn noa weh rait fahn weh rang.” (Job 32:6, 9) Ilaihyu mi taak fi wahn lang taim afta dat, ahn weh hihn mi seh mi shoa dat hihn mi waiz fi chroo. Hihn mi taak tu Joab eena wahn difrent way dan Elifaz, Bildad, ahn Zoafar. Ilaihyu mi mek Joab noa dat hihn neva mi wahn chrai bring ahn dong eevn moa er mek ih feel wers. Hihn mi shoa rispek fi Joab, an ih mi kaal ahn bai ih naym, espeshali sins ih mi noa dat di ada man dehn neva du dat. * Eena wahn rispekful way, hihn mi tel Joab: “Now, Joab, pleez lisn tu weh Ah ga fi seh.”—Job 33:1, 7; 34:7.

Ilaihyu mi aanis wen ih mi-di taak tu Joab. Hihn mi kongsl ahn an tel ahn: “Bot wen Ai mi-di lisn, yoo mi seh, . . . ‘Ai pyoar an Ah noh sin, Ai kleen an Ah noh du notn rang. Bot Gaad fain reezn fi ponish mi.’” Ilaihyu mi bring owt wat da-mi di reel ishu wid Joab wen ih mi aks ahn: “Yoo soh shoar dat yu rait dat yu wuda eevn seh, ‘Ai moa raichos dan Gaad’?” Hihn kudn alow Joab fi kantinyu tink da way. Di yong man mi tel ahn: “Weh yoo seh neva rait.” (Job 33:8-12; 35:2) Ilaihyu mi noa dat Joab mi opset bikaaz ih mi looz evriting, ahn pan tap a dat, di peepl weh shuda mi chrai giv ahn komfert mi chreet ahn reeli bad. Bot Ilaihyu mi waan Joab: “Bee kyaaful dat yu anga noh mek yu du tingz fi spait peepl.”—Job 36:18.

Moa impoatant dan eniting, Ilaihyu mi eksplayn dat weh Jehoava du aalwayz rait. Ih yooz dehnya simpl bot powaful werdz fi eksplayn wahn impoatant fak: “Ih noh pasabl fi mek di chroo Gaad du weh wikid, fi mek di Almaiti du weh rang! . . . Di Almaiti aalwayz du weh rait.” (Job 34:10, 12) Ilaihyu mi shoa Joab dat Jehoava ful a mersi ahn dat hihn aalwayz du weh rait. Bikaaz Joab onli mi-di tink bowt ihself, ih mi seh sohn tingz weh neva shoa rispek fi Gaad. Jehoava kuda mi ponish ahn fi it, bot ih mi chooz noh fi du dat. (Job 35:13-15) Ilaihyu neva priten dat hihn mi andastan evriting bowt Gaad. Insted, hihn mi hombl, an ih mi seh: “Gaad faar grayta dan weh wee ku andastan.”—Job 36:26.

Eevn doa Ilaihyu mi oapm an aanis wen ih mi kongsl Joab, ih mi stil du it eena wahn kain way. Hihn mi menshan di wandaful hoap dat wan day Jehoava wuda mek Joab geh helti agen. Wen da taim kohn, Gaad mi wahn seh dis bowt ih laayal servant: “Mek ih badi geh heltiya dan wen ih mi yong; mek ih get bak di schrent weh ih mi ga wen ih mi yong.” Insteda jos tel Joab weh ih fi du ahn giv ahn wahn big sermon, Ilaihyu mi du sohnting els weh mi kain. Ih mi aks Joab fi tel ahn how hihn mi feel. Ih mi tel ahn: “Taak tu mi, bikaaz Ah waahn proov dat yu inosent.” (Job 33:25, 32) Bot Joab neva ansa. Bikaaz Ilaihyu mi soh kain an inkorijin, Joab neva feel di need fi difen ihself. Maybi Joab mi eevn krai wen ih mi riyalaiz humoch Ilaihyu mi reeli kay bowt ahn.

Wi ku laan wahn lat fahn dehnya too faytful man. Wen wi stodi Ilaihyu egzampl, wi ku laan how fi kongsl ahn komfert sombadi weh need it. Eevn doa ih noh eezi, wahn chroo fren wahn bee aanis wid yu ahn tel yu wen yu di du sohnting rang. (Proverbs 27:6) Wee waahn bee da kaina fren. Wi waahn bee kain ahn inkorijin tu dehn wan weh need it, eevn wen dehn seh tingz weh dehn noh meen bikaaz dehn di goh chroo wahn haad taim. If wan day wee mait need fi geh kongsl bowt sohnting, wee ku fala Joab egzampl ahn lisn tu di kongsl insteda jos ignoar it. Aala wi need kongsl ahn karekshan. If wi aksep it, ih ku en op di sayv wi laif.—Proverbs 4:13.

Wail Ilaihyu mi-di taak ih mi menshan di breez, di klowd dehn, di tonda, ahn di laitnin. Dis da weh ih mi seh bowt Jehoava: “Lisn ahn pay atenshan tu ih powaful vais.” Lee wail afta dat, Ilaihyu mi rifaa tu wahn “haad breez fahn wahn staam.” (Job 37:2, 9) Ih pasabl dat wail Ilaihyu mi-di taak tu Joab, dehn kuda mi si wahn staam di kohn kloasa ahn kloasa ahn di geh schranga ahn schranga. Ih mi en op fi bee wahn powaful winstaam. Ahn den sohnting eevn moa amayzin mi hapm. Dehn staat tu hyaa Jehoava vois di taak eena di win!—Job 38:1.

Wi feel hapi wen wi reed bowt di wandaful tingz weh Jehoava mi seh tu Joab. Jos laik how wahn winstaam powaful inof fi bloa weh gyaabij, da mi laik if Jehoava werdz mi bloa weh aala di foolish tingz weh Elifaz, Bildad, ahn Zoafar mi seh. Jehoava nat eevn mi taak tu dehndeh man til laytaraan. Fi hihn foakos mi deh onli pahn Joab, ahn hihn mi kongsl ih servant eena wahn kain way, jos laik how wahn pa wuda karek ih son.

Jehoava mi andastan di payn weh Joab mi-di goh chroo. Hihn mi feel kompashan fi Joab, jos laik how ih feel it wen eni wan a ih faytful servant di sofa. (Isaiah 63:9; Zechariah 2:8) Bot hihn mi aalso noa dat Joab mi-di “taak widowt noa aal di faks,” ahn dat onli mi mek ih sichuwayshan wers. Soh Jehoava mi haftu karek Joab way a tinkin. Ih mi aks Joab sohn kweschan fi mek ih tink. Ih aks ahn: “Weh yoo mi deh wen Ai mi mek di ert? Tel mi, if yu tink yu andastan.” Wen Gaad staat tu kriyayt tingz, “di maanin staar dehn,” Gaad famili a aynjelz, mi showt ahn klap bikaaz a di wandaful kriyayshan. (Job 38:2, 4, 7) Bot Joab kudn ansa bikaaz hihn neva noa notn bowt dat.

Jehoava mi kantinyu fi taak bowt di tingz weh ih kriyayt. Wi ku seh dat Jehoava gi Joab wahn lee saiyens klaas. Ih teech ahn tingz bowt di staarz ahn di planet dehn, di plaants an animal dehn, ahn di nachral laa dehn eena di yoonivers. Jehoava mi diskraib som a di animal dehn weh Joab mi don noa bowt: di laiyan, di blak berd, di mongtin goat, di wail dongki, di wail bul, di oschrij, di haas, di falkon, di eegl, Beheemot (weh da praabli wahn neks naym fi di hipopatmos), ahn Levaiyatan (weh da praabli wahn neks naym fi di aligayta er krokodail). Yoo kuda imajin di geh wahn saiyens lesn fahn di Kriyayta a di yoonivers; di Wan weh mek evriting? *

Wat da-mi di point a aala dis? Joab mi reeli need fi hombl ihself. Joab mi-di komplayn ahn seh dat Gaad neva mi-di chreet ahn gud, bot dat onli mi-di damij ih rilayshanship wid Jehoava. Soh Jehoava aks Joab oava ahn oava bowt wehpaat hihn mi deh wen Jehoava mi Kriyayt aala di wandaful tingz weh egzis eena di yoonivers, an ih mi aks ahn bowt weda hihn ku feed, taym, er kanchroal di ting dehn weh Hihn mi mek. If Joab kudn eevn kanchroal di ting dehn weh Gaad mi kriyayt, how hihn kuda mi eva tink dat hihn mi ga di rait fi tel di Kriyayta weh fi du? Evriting weh Jehoava seh an du mi way beta dan weh Joab kuda mi eva andastan!

Eena evriting weh Jehoava mi du an seh, ih mi shoa deep lov fi Joab. Da laik if Jehoava mi-di tel Joab: ‘Mi son, if Ai ku kriyayt ahn tek kayr a aala dehnya tingz, yoo reeli tink dat Ai noh wahn tek kayr a yoo? Yoo tink Ai wuda abandan yu, tek weh yu pikni dehn fahn yu, tek weh yu meenz a livin, ahn tek weh yu helt fahn yu? Hoo da di onli Wan weh ku giv yu bak evriting weh yu looz ahn heel yu payn? Af koars da mee!’

Joab mi onli ansa Jehoava too taim wail Hihn mi-di aks ahn kweschanz, bikaaz dehndeh kweschan da-mi fi mek Joab tink. Hihn neva aagyu, ner chrai mek ekskyoos fi ihself. Hihn mi hombl ihself an admit dat, reeli, hihn neva noa notn moch, an ih mi sari fi di tingz weh ih mi seh. (Job 40:4, 5; 42:1-6) Soh wi ku si Joab egzampl a fayt. Afta evriting weh ih mi gaahn chroo, hihn da-mi stil wahn faytful man. Hihn mi aksep karekshan fahn Gaad, an ih mi chaynj ih atichood. Soh den, wee kuda aks wiself dis kweschan, ‘Ai hombl inof fi aksep karekshan ahn kongsl?’ Aala wi need fi geh help eena da way. Wen wi aksep it, wi di kapi Joab egzampl a fayt.

Jehoava mi noa dat Joab mi-di sofa, soh ih du sohnting fi komfert ahn. Now Jehoava mi staat taak tu Elifaz, hoo da-mi praabli di oaldis wan owta Joab chree fren dehn. Jehoava seh: “Ah bloo beks wid yoo ahn yu too fren dehn, kaaz unu noh taak di chroot bowt mi. Joab taak di chroot bowt mi, bot unu noh du laik hihn.” (Job 42:7) Tink bowt dehnya werdz. Yu tink Jehoava mi-di seh dat evriting weh dehn man mi seh mi rang, an dat evriting weh Joab mi seh mi karek? Af koars nat. * Bot dehn mi gat wahn big difrens bitween Joab an ih soa-kaal fren dehn. Joab mi reeli sad, an ih mi-di sofa wahn lat bikaaz a aala di faals tingz weh dehn mi-di seh gens ahn. Soh wi ku andastan wai Joab mi seh di tingz weh ih mi seh. Bot Elifaz an ih too fren dehn neva deh eena di saym sad sichuwayshan weh Joab mi eena. Dehn mi meen fi seh wikid tingz, bikaaz dehn mi prowd ahn dehn fayt eena Gaad mi week. Dehn neva onli atak wahn inosent man, bot eevn wers dan dat, dehn mi mek ih luk laik Jehoava mi kruwil ahn wikid!

No wanda Jehoava mi mek dehn man aafa op wahn ekspensiv sakrifais. Dehn mi haftu sakrifais sevn bul ahn sevn ram—dat mosi mi kaas dehn wahn lat, bikaaz laytaraan, anda di Laa weh Gaad mi giv Moaziz, di hai prees mi fi aafa op wahn bul if fi hihn sin mi mek di hoal nayshan a Izrel gilti. (Leviticus 4:3) Dis da-mi di moas ekspensiv kaina animal sakrifais weh dehn kuda mi aafa op anda di Laa. Pan tap a dat, Jehoava mi seh dat ih onli mi wahn aksep di man dehn sakrifais if Joab mi pray fi dehn fos. * (Job 42:8) Ih mosi mi reeli komfert Joab fi si dat Gaad mi-di difen ahn an mek shoar ih geh jostis!

Jehoava mi ga kanfidens dat Joab mi wahn du weh Hihn mi aks ahn fi du. Dat mi wahn shoa dat Joab mi fagiv dehndeh man weh mi reeli hert ahn. Ahn Joab neva disapoint Jehoava. (Job 42:9) Hihn mi obay, ahn dat mi shoa dat hihn mi laayal ahn faytful tu Jehoava. Ahn bikaaz a Joab obeedyans, Jehoava mi bles ahn eena lat moa wayz.

Jehoava ‘haat mi oanli saaf tuwaadz’ Joab. (Jaymz 5:11) Eena weh way? Jehoava mi mek Joab get bak helti agen. Imajin how Joab mi feel wen ih mi riyalaiz dat ih badi mi “geh heltiya dan wen ih mi yong,” jos laik weh Ilaihyu mi prafesai! Fainali, ih famili ahn frenz mi giv ahn di sopoat weh ih mi need, dehn mi komfert ahn an giv ahn gifs. Jehoava mi gi bak Joab ih richiz; ih giv ahn dobl di richiz weh ih mi ga bifoa. Ahn weh Jehoava mi du fi help Joab wid di moas terabl ting weh mi hapm tu ahn, di det a ih chiljren? Wel, aldoa Joab an ih waif mi stil mis dehn chiljren weh mi ded, dehn mi ga ten moa chiljren, ahn dat mi gi dehn bak sohn hapinis. Aalso, Jehoava mi mek Joab liv moch langa. Joab mi liv fi 140 moa yaaz, dat da-mi lang inof fi si ih grayt-grayt-gran-pikni dehn baan ahn groa op. Ahn den wi reed: “Ahn afta Joab mi liv wahn lang hapi laif, ih ded.” (Job 42:10-17) An eena Paradais, Joab an ih waif wahn deh wid dehn famili agen, ahn dat inklood di ten chiljren weh Saytan mi tek weh fahn dehn.—Jan 5:28, 29.

Wai Jehoava mi bles Joab eena soch a wandaful way? Di Baibl gi wi di ansa: “Unu yehr bowt Joab, how ih hoal aan aal chroo fi hihn chroblz ahn neva giv op?” (Jaymz 5:11) Joab mi gaahn chroo moa chroblz dan wen moas a wi kuda eevn imajin. Dis skripcha teech wi dat Joab mi du moa dan jos servaiv dehndeh chraiyalz. Hihn mi bayr op, an fi hihn fayt an ih lov fi Jehoava mi stay schrang. Rada dan geh beks ahn mizarabl, hihn mi wilin fi fagiv eevn dehn wan weh mi reeli meen fi hert ahn. Hihn neva looz ih preshos hoap, an ih mi aalwayz protek ih fayt ahn laayalti.—Job 27:5.

Eech wan a wi need fi bayr op chroo chraiyalz tu. Wi ku bee shoar dat Saytan wahn chrai diskorij wi, jos laik how ih mi chrai diskorij Joab. Bot if wi kip wi fayt schrang, if wi stay hombl, if wi wilin fi fagiv adaz, an if wi stay laayal, den wi wahn ku hoal aan tu wi preshos hoap. (Heebrooz 10:36) If wi faytful laik Joab, wi wahn mek Saytan geh beks bad, ahn wi wahn mek Jehoava, di Wan weh reeli lov wi, reeli reeli hapi!