Hihn mi-di sidong pahn di grong, ih badi mi kova fahn hed tu toa wid sohn paynful soar. Chrai picha ahn eena yu main: ih mosi mi deh bai ihself wid ih hed heng dong. Ih mosi mi luk laik ih redi fi giv op; ih mi bayli eevn ga inof enerji fi chays weh di flai dehn weh mi-di pich pan ahn. Ih mi-di sidong eena ashiz fi shoa dat ih mi-di moan, an ih mi-di skrayp ihself wid wahn pees a klay pat. Hihn mi looz evriting; ih mi yoostu bee sombadi weh evribadi rispek bot now dehn mi hayt ahn! Ih fren dehn, ih nayba dehn, an ih famili membaz mi ton dehn bak pan ahn. Peepl yoostu tek ahn mek papishoh, eevn di pikni dehn yoostu teez ahn. Hihn mi tink dat ih Gaad, Jehoava, mi ton gens ahn tu, bot hihn mi rang bowt dat.—Job 2:8; 19:18, 22.

Dis persn da-mi Joab, ahn dis stoari da bowt hihn. Gaad mi seh dis bowt ahn: “Nobadi els noh deh laik hihn pahn di ert.” (Job 1:8) Honjridz a yaaz layta, Jehoava mi stil si Joab az wan a di moas raichos man dehn weh mi eva liv.—Ezekiel 14:14, 20.

Yoo di fays chroblz ahn chraiyalz? Joab stoari ku bring yu wahn lata komfert. Ih ku aalso help yu fi ga wahn beta andastandin a kwalitiz weh evri faytful servant a Gaad need fi ga—fayt ahn laayalti. Peepl shoa dis kaina fayt ahn laayalti wen dehn yooz dehn hoal laif fi serv Gaad, ahn wen dehn kip aan di du weh rait eevn wen dehn di goh chroo chraiyalz. Mek wi laan moa fahn Joab.

Wi ga reezn fi bileev dat sohn taim afta Joab mi ded, wahn nada faytful man, Moaziz, mi rait dong di stoari a Joab laif. Gaad hoali spirit mi help Moaziz fi rait dong weh aal mi hapm tu Joab yasoh pahn di ert, an ih mi aalso help ahn fi rait dong weh aal mi-di hapm da hevn joorin da taim deh.

Da di biginin a di stoari, wi reed dat Joab mi-di liv wahn gud ahn hapi laif. Hihn da-mi wahn rich man, evribadi eena di lan a Uz mi noa bowt ahn an rispek ahn. Uz praabli mi deh eena di naadan paat a di konchri a Arabia. Hihn mi veri jenaros wid poa peepl an ih mi sopoat ahn protek dehn wan weh kudn protek dehnself. Jehoava mi bles Joab an ih waif wid ten pikni. Bot moa dan eniting els, Joab da-mi wahn spirichwal man. Hihn mi du ih bes fi pleez Jehoava jos laik how ih relitiv dehn Aybraham, Aizak, Jaykop, ahn Joazef mi du. Jos laik ada faytful man bak den hoo yoostu kyaa fi wahn big famili ahn tek di leed eena wership, Joab mi ak az wahn prees fi ih famili. Ih yoostu aafa op sakrifais tu Gaad an aks Ahn fi fergiv ih pikni dehn.—Job 1:1-5; 31:16-22.

Bot, sodn-wan, Joab laif mi chaynj. Wi geh fi reed weh hapm eena hevn, ahn wi geh fi noa bowt tingz weh Joab neva noa bowt. Jehoava faytful aynjel dehn mi gyada tugeda fronta Gaad chroan, ahn Saytan, di ribelyos aynjel, mi kom een monks dehn tu. Jehoava mi noa dat Saytan mi hayt di raichos man Joab, soh Gaad mi taak tu Saytan, an ih point owt dat Joab mi reeli faytful ahn laayal. Den Saytan tel Gaad: “Yu tink dat da jos fi notn Joab fyaa yoo? Da neva yoo put wahn fens rong ahn, ih hows, an evriting weh ih gat?” Saytan hayt wen peepl faytful ahn laayal tu Gaad. Wen peepl serv Jehoava Gaad wid dehn hoal haat, dehn proov dat Saytan noh lov nobadi ahn dat da hihn ton ih bak pahn Gaad. Soh Saytan mi insis dat Joab mi selfish ahn dat ih onli mi-di serv Gaad bikaaz a weh Hihn mi bles ahn. Saytan mi klaym seh dat if Joab wuda mi looz evriting, ih wuda mi kers Gaad tu ih fays!—Job 1:6-11.

Joab neva noa it, bot Jehoava mi-di giv ahn wahn big apachooniti fi proov Saytan rang. Jehoava mi alow Saytan fi tek weh evriting weh Joab mi ga. Di onli ting Ih neva alow ahn fi du da-mi fi fizikali hert Joab. Soh Saytan staat tu du eevl tingz. Eena wan day, wahn lata terabl tingz mi hapm tu Joab. Fers ih mi looz ih kow an ih dongki dehn, den ih sheep dehn, ahn den ih kyamil dehn; aala dehn mi ded owt sodn-wan. Wers dan dat, di servant dehn weh mi tek kayr a ih animalz mi ded tu. Eena wan a di kays dehn, wahn mesinja mi kohn tel Joab dat “faiya fahn Gaad,” weh kuda mi bee laitnin, mi kohn dong ahn kil ih sheep dehn an ih servants tu. Bifoa Joab kuda mi eevn tink bowt ih servant dehn weh mi ded er bowt di fak dat ih mi wahn bee poa now, sohnting eevn wers dan dat mi hapm. Ih ten pikni mi deh tugeda da Joab oaldis son hows, wen sodn-wan, wahn staam wid schrang schrang breez bloa dong di hows ahn kil evribadi een deh!—Job 1:12-19.

Ih haad fi eevn chrai imajin how Joab mi feel. Hihn mi tayr aaf ih kloaz, kot aaf ih hyaa, ahn jrap dong tu di grong. Joab mi tink dat Gaad mi tek weh evriting weh ih mi bles ahn wid. Af koars, da Saytan mi mek ih luk laik da-mi Gaad kaaz dehndeh dizaasta fi hapm. Bot stilyet, Joab neva kers Gaad laik weh Saytan mi seh ih wuda mi du. Rada, Joab mi seh: “Mek di naym a Jehoava kantinyu fi geh prayz.”—Job 1:20-22.

Saytan mi beks bad, bot ih mi rifyooz fi giv op. Hihn gaahn fronta Jehoava agen wahn neks taim wen di aynjel dehn mi gyada tugeda. Jehoava mi prayz Joab agen fi how ih shoa fayt ahn laayalti eevn wen Saytan mi-di atak ahn. Saytan ansa ahn seh: “Skin fi skin. Wahn man wahn giv op evriting weh ih gat fi sayv ih laif. Bot, jos fi chaynj op tingz, schrech owt yu han ahn schraik ih boan ahn flesh, ahn fi shoar ih wahn insolt yu ahn ton ih bak pahn yu.” Saytan mi shoar dat if Joab mi geh sik inof, ih wuda mi ton ih bak pahn Gaad. Bot Jehoava mi ga kanfidens dat Joab mi wahn stay faytful ahn laayal, ahn soh ih alow Saytan fi tek weh Joab helt—az lang az ih neva kil ahn.—Job 2:1-6.

Afta dat, Saytan mi mek Joab geh wahn terabl siknis, di sayhn siknis weh yu mi reed bowt da di biginin a dis aatikl. Imajin ih poa waif. Shee mi don dipres bikaaz a weh ih looz ih ten pikni dehn, ahn now ih kudn du notn fi help ih hozban, ih onli kuda mi wach ahn az ih mi-di sofa! Wid aal di payn eena ih haat, shee tel ahn: “Yoo stil di insis fi stay laayal tu Gaad? Yu noh tink ih beta mek yu jos insolt Gaad ahn ded!” Dat da neva sohnting weh Joab waif wuda mi naamali seh. Joab mi figa dat shee onli mi seh dat bikaaz shee neva mi-di tink schrayt. Bot hihn mi stil rifyooz fi insolt Gaad. Hihn neva seh notn bad gens Gaad.—Job 2:7-10.

Yoo mi noa dat dis sad bot chroo stoari afek yoo persnali? Noatis dat Saytan neva onli akyooz Joab, bot ih mi-di akyooz evribadi. Hihn mi seh: “Wahn man  wahn giv op evriting weh ih gat fi sayv ih laif.” In ada werdz, Saytan bileev dat non a wi wahn stay faytful ahn laayal tu Gaad. Hihn insis dat yoo noh ga reel lov fi Gaad, dat yoo wuda hori ton yu bak pahn Gaad jos fi sayv yu oanself. Soh, da laik Saytan di seh dat yoo jos az selfish az hihn! Yoo wuda waahn proov hihn rang? Eech wan a wi ga da apachooniti. (Proverbs 27:11) Mek wi si wich ada chalenj Joab mi fays afta dat.

Di Baibl tel wi bowt chree man weh mi noa Joab az ih fren dehn. Dehn mi get fi hyaa bowt weh mi hapm tu Joab ahn dehn disaid fi vizit hihn ahn fi komfert ahn. Wen dehn mi si ahn fahn wahn distans, dehn kudn eevn rekonaiz ahn. Ih mi eena soh moch payn, an ih skin mi blak bikaaz a di dizeez weh ih mi gat, dat hihn neva luk laik di sayhn man weh dehn mi noa. Di chree man dehn—Elifaz, Bildad, ahn Zoafar—mi ak laik dehn mi feel reeli sad fi Joab; dehn mi baal owt ahn chroa dos pahn dehn hed. Den dehn sidong pahn di grong kloas tu Joab, bot dehn neva seh notn. Dehn mi sidong deh, day ahn nait, fi wahn hoal week widowt seh wan werd. Bot jos bikaaz dehn mi-di sidong deh noh meenz dat dehn mi-di gi Joab eni komfert. Dehn neva eevn tek inchres eena Joab ahn chrai fi fain owt how ih mi-di feel, ner aks ahn notn. Bot dehn mi noa dat ih mi deh eena lata payn.—Job 2:11-13; 30:30.

Fainali, da Joab mi haftu staat op di kanvasayshan. Di way how hihn mi tel dehn dat ih kers di day ih mi ban shoa humoch payn ih reeli mi deh eena. An ih mi seh dat ih mi feel soh mizarabl bikaaz ih mi tink dat da Gaad mi-di mek ih sofa! (Job 3:1, 2, 23) Joab neva looz ih fayt eena Gaad, bot ih mi stil need sohn komfert. Bot wen dehndeh man mi oapm dehn mowt ahn staat tu taak, Joab mi riyalaiz dat ih mi beta wen dehn mi sailent bikaaz dehn neva ga no werdz a komfert fi aafa Joab.—Job 13:5.

Elifaz da-mi praabli di oaldis wan monks dehn; ih mi praabli moch oalda dan Joab, ahn da hihn mi staat tu taak fers. Aftawodz, di ada too mi staat tu taak tu. Wi ku seh dat maybi dehn mi jos di fala Elifaz way a tinkin. Maybi dehn neva tink dat dehn neva mi-di seh eniting bad bikaaz dehn mi jos di ripeet tingz weh moas peepl yoostu seh ahn bileev bowt Gaad. Dehn mi seh dat Gaad ga wahn hai pozishan ahn dat hihn ponish bad peepl ahn dat ih bles gud peepl. Aala dehn ting da-mi chroo, bot fahn di biginin, di tingz weh dehn mi seh mi shoa dat dehn neva reeli mi-di bee kain tu Joab. Elifaz mi-di reezn wid Joab eena wahn way weh mait luk laik ih mi mek sens, bot akchwali, ih mi-di ignoar impoatant faks. Di way hihn mi see’t, if Gaad gud an ih ponish bad peepl, ahn now Joab di sofa, den Joab mosi mi du sohnting bad fi mek Gaad di ponish ahn now.—Job 4:1, 7, 8; 5:3-6.

Ih noh sopraiz wi dat Joab neva agree wid dis kaina tinkin non ataal. (Job 6:25) Bot dehn chree man mi eevn moa kanvins dat Joab mi du sohnting bad ahn dat ih mi-di haid it. Dehn mi tink dat hihn mosi mi du sohnting fi mek ih dizerv evriting weh mi-di hapm tu ahn. Elifaz mi seh dat Joab mi tink dat hihn beta dan ada peepl, dat ih mi wikid, ahn dat ih neva ga no rispek fi Gaad. (Job 15:4, 7-9, 20-24; 22:6-11) Zoafar mi tel Joab dat ih need fi stap du eevl tingz ahn dat ih need fi stap injai sin. (Job 11:2, 3, 14; 20:5, 12, 13) Ahn Bildad mi seh sohnting veri kruwil. Hihn mek ih song laik Joab pikni mi dizerv fi ded bikaaz dehn mosi mi komit sin tu, ahn dats wai dehn mi ded laik dat.—Job 8:4, 13.

Dehnya man mi du sohnting eevn wers dan dat. Dehn neva onli ga dowts bowt Joab fayt ahn laayalti, bot dehn mi gaan az faar az fi seh dat ih noh eevn mek sens fi chrai stay faytful tu Gaad! Di fos taim wen Elifaz mi taak, hihn mi taak bowt wahn taim wen hihn mi meet wahn spirit. Afta hihn mi meet da deemon, Elifaz mi staat tu bileev dat Gaad noh ga no kanfidens eena ih servant dehn, ahn dat hihn eevn fain faalt wid ih aynjel dehn. If dis aidyaa mi reeli chroo, ih wuda meen dat hyoomanz kuda neva pleez Gaad! Dis kaina tinkin daynjaros bikaaz ih kuda mek sombadi looz dehn fayt eena Gaad. Laytaraan, Bildad mi klaym seh dat Gaad neva eevn kay if Joab mi stay laayal ahn faytful tu hihn, saym way laik how ih wudn kay if wahn werm mi stay laayal tu hihn!—Job 4:12-18; 15:15; 22:2, 3; 25:4-6.

Yoo eva chrai fi komfert sombadi weh di sofa? Ih noh eezi. Bot wee ku laan wahn lat fahn Joab fren dehn—wi moasli laan weh wi shudn seh. Fi egzampl, notn weh dehn mi seh mi shoa kompashan fi Joab; dehn neva eevn kaal ahn bai ih naym! Dehn neva kay dat Joab mi dipres ahn sad, ahn dehn neva tink dat dehn mi need fi chreet ahn wid lov ahn kainis. * Soh if sombadi feel sad, chrai fi shoa lov ahn bee kain. Chrai fi bil op da persn fayt ahn chrai inkorij ahn; help ahn fi chros eena Gaad ahn help ahn fi bileev eena fi Hihn grayt kainis, mersi, ahn jostis. Dat da weh Joab wuda mi du fi fi hihn fren dehn if dehn mi deh eena fi hihn sichuwayshan. (Job 16:4, 5) Bot da weh hihn mi du wen dehn mi-di kweschan fi hihn fayt ahn laayalti?

Poa Joab mi don deh eena wahn haad sichuwayshan an ih mi don feel dipres wen dehn man mi tel ahn dehndeh tingz. Fahn di biginin hihn mi admit dat som a di tingz weh hihn mi-di seh da-mi jos “krayzi taak” ahn “di werdz a wahn man weh noh ga no hoap.” (Job 6:3, 26) Wi ku andastan wai ih mi-di taak laik dat; hihn mi reeli dipres. Wi ku aalso tel dat hihn neva reeli andastan wai dehnya ting mi-di hapm. Joab mi tink dat da Jehoava mi-di kaaz aala di tingz weh mi hapm tu hihn ahn tu ih famili, bikaaz evriting mi hapm sodn-wan an eena wahn schraynj way. Bot wahn lata tingz mi-di hapm weh Joab neva noa bowt, soh dats wai hihn mi ga di rang aidyaa.

Stilyet, Joab da-mi wahn man weh mi ga reeli schrang fayt. Wi ku si Joab fayt eena di tingz weh ih mi seh joorin da lang kanvasayshan. Hihn mi menshan tingz weh mi byootiful, chroo, ahn weh inkorij wee wahn lat tudeh. Di way how hihn mi diskraib kriyayshan da mi eena wahn way weh no hyooman kuda mi pasabli noa bak den, anles da Gaad mi mek ih noa it. Fi egzampl, hihn mi seh dat Jehoava “heng di ert pahn notn,” sohnting weh saiyentis neva noa bowt til towznz a yaaz layta. * (Job 26:7) Ahn wen Joab mi taak bowt ih hoap fi di fyoocha, hihn mi diskraib di sayhn hoap weh ada faytful man mi ga tu. Joab mi bileev dat eevn if hihn mi ded, Gaad wuda mi memba hihn, an ih wuda bring ahn bak tu laif wen di taim kohn.—Job 14:13-15; Heebrooz 11:17-19, 35.

Mek wi goh bak tu di ishu bowt fayt ahn laayalti. Elifaz an ih too fren dehn mi insis dat ih noh mek no difrens tu Gaad weda er nat wi ga fayt ahn laayalti. Yu tink dat Joab mi aksep da lai? No. Joab mi shoar dat wi fayt ahn laayalti mata tu Gaad. Hihn mi seh dis bowt Jehoava: “Hihn wahn rekonaiz mai laayalti.” (Job 31:6) Aalso, Joab mi si klyaa-wan dat ih soa-kaal fren dehn mi akchwali di atak ih fayt ahn laayalti. Dis mi moov Joab fi mek ih langis speech, ahn da speech mi soh powaful dat dehnya chree man neva noa weh fi seh afta dat.

Joab mi andastan dat wahn persn need fi shoa fayt ahn laayalti eena evriting weh ih seh ahn du. Ahn hihn mi shoa dehnya kwaliti eena ih laif. Fi egzampl, hihn neva wership aidol; ih mi chreet adaz wid kainis ahn rispek; hihn mi stay moarali kleen, ih mi stay faytful eena ih marij; ahn moa dan eniting els, ih mi stay faytful ahn laayal tu di onli chroo Gaad, Jehoava. Soh Joab kuda mi seh wid ih hoal haat: “Ah noh wahn giv op mi laayalti, eevn if Ah haftu ded!”—Job 27:5; 31:1, 2, 9-11, 16-18, 26-28.

Fayt ahn laayalti impoatant tu yoo? Joab mi noa dat ih noh inof fi jos seh dat wi laayal ahn faytful, bot wi haftu shoa it bai weh wi du. Wi shoa dat lov Gaad wid aal wi haat wen wi obay ahn an wen wi du weh rait eena wi evriday laif—eevn wen wi di fays chraiyalz. If wi liv laik dat, wi wahn reeli mek Jehoava haat hapi ahn wi wahn foschrayt ih enimi, Saytan, jos laik weh Joab mi du wahn lang taim agoa. Dis da di bes way wi ku kapi Joab fayt!

Bot dis da noh di en a Joab stoari. Hihn mi soh bizi di proov dat hihn da-mi wahn raichos man dat ih mi faget fi difen Gaad gud naym. Ih mi need karekshan ahn spirichwal help. An ih mi stil need lata komfert bikaaz ih mi stil di moan ahn deh eena lata payn. Weh Jehoava mi du fi help dis faytful ahn laayal man? Wahn neks aatikl wahn diskos dis kweschan.