No. Wahn stodi a di aynshent manyuskrip dehn shoa dat di Baibl noh chaynj chroo hischri eevn doa dehn kapi it wahn lata taimz, oava towznz a yaaz, pahn difrent kaina mateeryal weh eezi fi geh dischrai.

 Dehn don fain towznz a oal Baibl manyuskrip. Som a di manyuskrip gat een sohn tingz weh difrent, weh shoa dat di chranslayta dehn did mek sohn mistayk wen dehn mi-di kapi di Baibl. Moas a dehn da smaal mistayk ahn dehn noh chaynj di meenin a di teks. Bot som a di manyuskrip gat een sohn big mistayk, ih seemz laik dehndeh mistayk dehdeh bikaaz som peepl akchwali mi-di chrai chaynj di Baibl mesij. Mek wi luk pahn too egzampl:

1.   Da 1 Jan 5:7, sohn oalda Baibl chranslayshan gat een dehnya werdz: “eena hevn, di Faada, di Werd, an di Hoali Goas: ahn dehnya chree da wan.” Bot sohn ada manyuskrip weh moa karek proov dat dehndeh werdz neva deh eena di orijinal teks. Dehn mi geh ad een laytaraan. a Bikaaz a dat, sohn gud ahn op-tu-dayt Baibl chranslayshan noh gat een dehndeh werdz.

2.   Gaad persnal naym deh eena sohn oal Baibl manyuskrip towznz a taimz. Bot, lata Baibl chranslayshan chaynj it ahn put een sohn taitl laik “Laad” er “Gaad.”

 Nowadayz, dehn don fain soh moch manyuskrip dat ih geh eeziya fi fain eni mistayk. b Wen dehn kompyaa dehnya dakyument wid eech ada, weh dat shoa bowt di Baibl?

•   William H. Green, sombadi weh stodi Baibl manyuskrip, seh dis bowt di Heebroo Skripchaz (weh peepl naamali rifaa tu az di “Oal Testiment”): “Wi ku seh dat no ada aynshent werk eva geh paas dong chroo di yaaz ahn chranslayt soh gud.”

•   Wen ih kohn tu di Kristyan Greek Skripchaz, er di “Nyoo Testiment,” F. F. Bruce, sombadi weh stodi Baibl manyuskrip seh: “Wi ga soh moch proof dat weh deh eena di Nyoo Testiment da di orijinal mesij. Wi ga moa evidens fi dat dan fi wahn lata di ada faymos raitin dehn, ahn yet nobadi eva kweschan dehndeh faymos raitin.”

•   Sir Frederic Kenyon, wahn ekspert pahn Baibl manyuskrip, mi seh dat sombadi “ku put di hoal Baibl eena ih han an ih noh haftu frayd wen ih seh dat ih di hoal di chroo Werd a Gaad, weh geh paas dong fahn jenarayshan tu jenarayshan fi honjridz a yaaz widowt looz ih reel meenin.”

•   Jooish ahn Kristyan peepl weh kapi di Baibl lef een di akonk dehn weh taak bowt di seeryos mistayk dehn weh Gaad peepl mi mek. c (Numbers 20:12; 2 Samuel 11:​2-4; Galayshanz 2:​11-​14) Sayhn way soh, dehn lef een di akonk dehn weh kandem di Jooish nayshan bikaaz dehn neva obay Gaad ahn weh shoa wich teechinz peepl mek op. (Hosea 4:2; Malachi 2:​8, 9; Machyu 23:​8, 9; 1 Jan 5:​21) Bikaaz a weh dehndeh peepl kapi di Baibl ahn lef een aala da infamayshan, wi noa dat dehn da peepl weh ga lata rispek fi Gaad hoali Werd ahn dat wi ku chros weh dehn rait.

•   Ih mek sens dat sins Gaad mi mek dehn rait di Baibl eena di fos plays, hihn aalso protek di karek mesij weh sopoas tu deh een deh. d (Isaiah 40:8; 1 Peeta 1:​24, 25) Aftaraal, hihn neva onli waahn mek ih help peepl weh mi liv eena di paas, bot hihn mi waahn mek ih help wee tudeh day tu. (1 Korintyanz 10:11) In fak, “evriting weh mi rait dong eena di Skripcha fahn way bak mi rait dong fi teech wi ahn inkorij wi, soh dat wi ku luk faawod wid payshens tu weh wahn kohn.”​—Roamanz 15:4.

•   Jeezas an ih falowaz mi yooz di kapi a di Heebroo Skripchaz weh mi avaylabl tu dehn widowt menshan eni dowt er woriz dat ih neva karek.​—Look 4:​16-​21; Aks 17:​1-3.