Gaad ku si evriting ahn tek akshan eniway wehpaat ih waahn. (Proverbs 15:3; Heebrooz 4:13) Bot di Baibl noh teech wi dat ih deh evriway an eena evriting. Insteda dat, ih shoa wi dat hihn da wahn persn ahn dat hihn ga wahn plays wehpaat ih liv.

•   Weh kaina badi Gaad gat? Gaad da wahn spirit. (Jan 4:​24) Soh hyoomanz kyaahn si ahn. (Jan 1:​18) Wen di prafit dehn mi si wahn vizhan a Gaad, dehn mi aalwayz si hihn da hevn. Dehn neva si hihn az sombadi weh deh evriway ner eena evriting.​—Isaiah 6:​1, 2; Revilayshan 4:​2, 3, 8.

•   Wehpaat Gaad liv? Gaad liv da hevn. Eena di Baibl, dis noh di taak bowt di yoonivers ner spays, ih di rifaa tu di spirichwal hevnz, di plays wehpaat spirits liv. (1 Kings 8:​30) Di Baibl menshan wahn taim wen aala di aynjel dehn “kom een fi stan op fronta Jehoava,” a ahn dis shoa dat Gaad ga wahn spesifik “plays” wehpaat hihn deh.​—Job 1:6.

If Gaad noh deh evriway an eena evriting, how hihn ku kay bowt mee az wahn persn?

 Gaad kay bowt eech wan a wi wahn lat. Eevn doa hihn liv da hevn, Gaad tek noatis a evribadi hoo waahn pleez ahn dong ya pahn di ert, ahn hihn du tingz fi help dehn. (1 Kings 8:​39; 2 Chronicles 16:9) Dehnya da som a di wayz how Jehoava shoa dat ih kay bowt ih servant dehn:

•   Wen yu pray: Jehoava lisn tu yu pryaa az soon az yu seh it.​—2 Chronicles 18:31.

•   Wen yu feel dong: “Jehoava kloas tu dehn wan weh sad eena dehn haat; hihn sayv di wan dehn weh feel diskorij.”​—Psalm 34:18.

•   Wen yu need gaidans: Jehoava “wahn gi yu andastandin ahn teech yu” chroo ih Werd, di Baibl.​—Psalm 32:8.

Sohn rang bileef bowt Gaad:

 Rang bileef: Peepl bileev dat Psalm 139:8 di tel wi dat Gaad deh eena evriting an evriway bikaaz ih seh: “If Ai wuda goh op da hevn, yu wuda si mi. If Ai wuda di sleep eena di Grayv, yoo wuda fain mi deh tu.”

 Chek di faks: Di skripcha noh di taak bowt wehpaat Gaad deh. Da jos wahn poawem weh teech wi dat Gaad ku help wi noh mata wehpaat wee deh.